Read saamia Yeremia 44 Bible Online

Yeremia 44 - saamia bible

Yeremia 44

¹Omwaami yalomaloma naange ebidiira hu Bayudaaya boosi abali mu syaalo sya Misiri mu biko bya Migidooli, neende Tapaneesi, neende Mefisi, neende mu situundu sya Patiroosi.

²Omwaami w'Obunyala, Nasaae wa Yisiraeli aboola ati: “Abeene mubweene esyonoono syoosi singwiisire hu Yerusalemu neende hu biko bya Buyudaaya byoosi. Bone, bulaanu byehola amakuunda, haandi abulao omuundu obimenyeremo,

³olwohuba abaandu bamwo bonoona, mani nibasiingisa etima lyaange, nibanioohesera banasaae baandi obubbaani haandi nibahalaabanira banasaae abo, ba beene bali nibataamanyire, noomba bakuuka yaabwe.

⁴Ndabatumiraanga abahalaabani baange abanabbi butoli-toli, ohubalabula bati, ‘Mutaholaangaho esiindu sy'omusiro sindasyuula.’

⁵Nabo nibahaya ohuwulira, haandi nibatataaho omwooyo ohuleha ebyonoono byaabwe neende ohunioohesa obubbaani eyiri banasaae baandi.

⁶Mani sakira obwaalaba neende etima byaandiira, mani nimbiidisa hu biko byomu Yerusalemu neende hu ngira chomu Yerusalemu; mani nibyeehola amakuunda omutaali omuundu ohwoola buti.”

⁷Mani bulaanu Omwaami Nasaae w'Obunyala, Nasaae wa Yisiraeli ateeba ati: “Lwasiina abeene mweereteera esyonoono sihoongo syakiira ao? Lwasiina mudaha ohusihirisa abasaacha neende abahasi, abaana badoto neende abayere, ohutula mu Buyudaaya, abuleo odoong'ao mulwiibulo lweeng'we?

⁸Lwasiina muundiisa etima olw'ebiindu bi muhola, nimunioohesera obubbaani eyiri banasaae baandi abomu syaalo sya Misiri simuchia ohumenyamo? Lwasiina muhola mutyo, ohwesihirisa neende ohulekeereswa, neende ohubwaabwa neende abaandu bomu byaalo byohu syaalo byoosi?

⁹Mwiibiriire ebyonoono bya bakuuka yeeng'we, neende eby'abatuki bomu Buyudaaya, ebyonoono by'abahasi baabwe, ebyonoono byeeng'we beene neende ebyonoono by'abahasi beeng'we, bi baholera mu syaalo syomu Buyudaaya neende mu ngira chomu Yerusalemu?

¹⁰Mani ohwoola buti, haba simwaakamaanga ohwehuduumbasa daawe, noomba ohuhayaanga ohuunjisamo oluyaali, noomba ohuhayaanga ohuholeraanga hu malako kaange, ka ndababeresa, eng'we neende bakuuka yeeng'we.”

¹¹Mani sakira Omwaami w'Obunyala, Nasaae wa Yisiraeli aboola ati: “Bone, njia ohubatingaala neende obwaalaba, mani sihirise Buyudaaya syoosi.

¹²Haandi abaandu bomu Buyudaaya abadoong'ao mani baheengao ohuchia ohumenya mu syaalo sya Misiri, njia ohubasihirisirayo boosi. Boosi-boosi, abahuluundu neende abayere, bachia ohufwiira mu syaalo sya Misiri. Bachia ohufwiira mu biita, oba ohufwa enjala. Bahabe esyohutya, esibwaabo, neende osyohulekwa eyiri abaandu.

¹³Njia ohusaandya abamenya mu syaalo sya Misiri koti lu ndasaandya Yerusalemu nindehoonyera ebiita, enjala neende endwaae.

¹⁴Mani abaandu bomu Buyudaaya abadoong'ao mani nibachia ohumenya mu syaalo sya Misiri, abuleo owahaone oba yaadoong'ao oba yaakobola mu syaalo syomu Buyudaaya, haba sibekoomba ohukobolayo bamenyemo. Olwohuba abulao owahakoboleyo, ohumalaho bawalukeenda badiidi muno.”

¹⁵Ao mani abasaacha boosi abali nibamanyire bati abahasi baabwe banioohesa obubbaani eyiri banasaae baandi, neende abahasi boosi abali nibeemere ao, neende esidiiyiha sy'abaandu sihoongo, neende abaandu boosi abali mu syaalo sya Misiri Patiroosi, nibakobola mu Yeremia nibaboola bati:

¹⁶“Haba sihudaha huwulira emboosi ch'otuboolera mu liita ly'Omwaami.

¹⁷Nae huchia ohwemeeda ohuhola buli siindu sihuheengereo ohuhola. Huchia ohunioohesa obubbaani eyiri nasaae muhasi w'ekulu haandi huchia ohumuchuhira ebiyaanwa by'ohung'wa, koti lu efwe neende bakuuka yeefwe, neende abatuki beefwe, neende abachweenufu beefwe hwaholaango mu biko byomu Buyudaaya neende mu ngira chomu Yerusalemu; olwohuba olwo nilwo lu hwabechaanga neende ebyohulya biingi muno, mani nihuba bulai, haandi sibulao esiindu syatunyasaho daawe.

¹⁸Nae ohutula luhwaakama ohunioohesa obubbaani eyiri nasaae muhasi w'ekulu, neende ohumuchuhira ebiyaanwa byohung'wa, bulaanu hubula esiindu syoosi haandi husihisiriswa neende ebiita neende enjala.”

¹⁹Mani abahasi nibameedaho bati, “Nihwanioohesaanga obubbaani eyiri nasaae muhasi w'ekulu haandi hwamuchuuhiraanga ebiyaanwa by'ohung'wa, abasaacha beefwe babechaangao mani nibasiira bi hwaholaanga.”

²⁰Mani nimboolera abaandu boosi, abasaacha neende abahasi abali nibangoboolemo batyo endi:

²¹“Obubbaani bumwanioohesera mu biko byomu Buyudaaya neende mu ngira chomu Yerusalemu, eng'we neende bakuuka yeeng'we, abatuki beeng'we neende abachweenufu beeng'we, neende abaandu bomu syaalo, mubaasa muti Omwaami haba siyabumanya, oba muti yabwiibirira?

²²Omwaami haba siyanyala ohwesimiirisa ebyonoono byeeng'we neende eby'omusiro bi mwahola; mani sakira esyaalo syeeng'we syeehola ekuunda syabwaabwa mani syadoong'a nisibulamo omuundu osimenyamo, ohwoola buti.

²³Amasira ako ka muli ohubona kabakwaaho olwohuba mwanioohesa obubbaani, haandi olwohuba mwonoona eyiri Omwaami, mani mwaahaya ohuwulira ekono ly'Omwaami oba ohuholera hu malako kae, mani sakira amasika kano kabakwaaho ohwoola buti.”

²⁴Mani nimboola abaandu boosi neende abahasi boosi endi: “Wulire Emboosi y'Omwaami, eng'we Abayudaaya mweesi abali mu syaalo sya Misiri,

²⁵Omwaami Nasaae w'Obunyala, Nasaae wa Yisiraeli aboola ati, ‘Eng'we neende abahasi beeng'we mulomalome neende eminwa kyeeng'we, haandi mwooseresa neende amahono keeng'we, nimuboola muti, muchia ohuhola bi mweechuba, ohunioohesera nasaae muhasi w'ekulu obubbaani, neende ohumuchuhira ebiyaanwa by'ohung'wa.’ Mani mwomiise ebyeeyamo beeng'we haandi muhole bi mweeyama.”

²⁶“Mani sakira eng'we Abayudaaya mweesi abali mu syaalo sya Misiri, wulire Emboosi y'Omwaami: Omwaami aboola ati: Bone, ndeechuba mu liita lyaange ly'oluyaali endi, Sisiifukiirisa kata mulala hweeng'we abomu Buyudaaya abali mu syaalo sya Misiri, ohweechuba niyehoonyera eliita lyaange, n'aboola ati: ‘Koti lu Omwaami Nasaae lwaali omulamu.’

²⁷Bone, njia ohubona endi haba simunyoola ebilai nae amasira niko akachia ohubakwaaho. Abasaacha Bayudaaya boosi abali mu syaalo sya Misiri bahafwiire mu biita, oba bahafwe enjala, ohwoola lu boosi bahasihirire bawaao.

²⁸Nae abo abahawoneo baahaya ohwiitwirwa mu syaalo sya Misiri, mani baakobolayo mu syaalo sya Buyudaaya, bahabe abadiidi muno. Mani abahadoong'eo mu Buyudaaya, abo abahabe abalamu nibatulire mu syaalo sya Misiri, bahamanye oba emboosi chaange nicho echadyeeri oba echeeng'we.

²⁹Omwaami aboola ati, omweeni niye ochia ohubaberesa ahalolero hachia ohwomiisa hati, achia ohubasaandira abuundu ano, hu mumanye muti emboosi yae eyilaangirira amasira ka njia ohubakwiisaho, yicha ohwoolerera.

³⁰Omwaami aboola ati, bone, njia ohuyaanayo Hofira omutuki wa Misiri wa Misiri mu mahono k'omusuku wae neende mu mahono k'abo abakiiya ohumwiita, koti lu ndayaanayo Sedekia omutuki wa Buyudaaya mu mahono ka Nebukadineesa omutuki wa Bbabbilooni, owali omusuku wae haandi owali nakiiya ohumwiita.”