Read saamia Yeremia 49 Bible Online

Yeremia 49 - saamia bible

Yeremia 49

¹Ebidiira hu Abaamooni. Omwaami ateeba ati: Babulao abasaacha mu Yisiraeli, kose? Babulahoo abanyala ohuwaabina esyaalo syaabwe? Lwasiina mani baleha abaandu beenamira Moleki esituundu sy'enono ya Gaadi, baamenya mu biko byasyo?

²Mani sakira, bone, ebiha bichia ohwoola, Omwaami niye oboola, lu njia ohukera ohulira hw'ebiita huwuliirihanire mu Rabba, esiko sihoongo sy'Abaamooni. Haandi syahalehwe nisiri ekuunda, haandi engoongo chasyo chahasaambwe omuliro. Olwo nilwo lu Yisiraeli syaheekobosere ebituundu byasyo ebyasinyakwaho. Omwaami niye oboola.

³“Abaandu ba Hesibboni, muhubbe embuungu, olwohuba Ai sinyakirwe! Eng'we abahaana ba Rabba, mulire! Mweefwaale ebigunia, mulire, mwiiruhire mu ngaka nimudikaana! Olwohuba Moleki, nasaae weeng'we achia ohuyirwa mu jeela, alala neende abalaamisi bae neende abachweenufu bae.

⁴Eng'we abaandu bataali abeesikwa, lwasiina mweefumya neende amahooho keeng'we? Eng'we abeesika obuyiinda bwako, nimuboola muti, ‘Wiina onatuseete?’

⁵Omwaami w'Obunyala aboola ati, bone, njia ohubaleetera esitiisa ohutula hu mbeka choosi. Mani buli muundu yaheeruhe ohuwonia obulamu bwae, abuleo ogumya amaye keeng'we.

⁶“Nae luunyuma, njia ohukobosera Abaamooni ehabi chaabwe. Ese Omwaami, Niise oboolere.”

⁷Ebidiira hu Edomu. Omwaami w'Obunyala aboola ebidiira hu Edomu ati: “Mu baandu ba Temani, mubulamo ab'amakesi daawe? Abakesikesi haba sibasiinyala ohukeraka daawe? Amakesi kaabwe kakota kose?

⁸Eng'we aba Dedani, mukaluuhane, mwiiruhe mweekise! Olwohuba njia ohukwiisa hu beechuhulu ba Esau amasira, esiha sy'ohubasaandya syoolere.

⁹Abaandu nibanoka emisabbiibbu, balehaangaho ekiindi. Abeebi nibeecha esiro, bayiraangaho ebiindu bi badaha byoong'ene.

¹⁰Nae Ese, fwaluliire elalira abeechuhulu ba Esau, mani niimbaleha bihaya, nimbwiihula ebituundu bi beekisamo, mani haba sibanyala hweekisa daawe. Abaana ba Edomu boosi basihiriire, neende bamwaanang'ina, neende abaasye boosi, abulao odoong'ereo kata.

¹¹Mulehe bamulehwa beeng'we, njia ohubaliinda bulai; haandi lehe abahasi bafwiirwe beeng'we baandeesike.”

¹²Olwohuba Omwaami ateeba ati: “Nikali mbwe abo abatahoyerwa ohusaanda, bosi basaandisibwa, eng'we mubaasa muti haba simuchia husaandisibwa daawe? Haba simuchia hulehwa daawe, nae muchia ohusaandisibwa.

¹³Olwohuba ese Omwaami mweene, niise oweechubire endi esiko sya Bbosura syaheehole esitiisa, ekuunda, neende esibwaabo; haandi engoongo chisyebodoohaanie chaheehole amakuunda endaalo choosi.”

¹⁴Mani nimboola endi: Edomu, mbuliire omulaanga ohutula eyiri Omwaami, haandi wamwaanda amalire ohutumwa mu byaalo ohuboola ati: “Bibuuse alala amaye kabyo ohuhulwaania, kachie mu biita!”

¹⁵Olwohuba, bone, Omwaami achia ohuhuhola obe omudiidi mu byaalo, mani abaandu bahulekerese.

¹⁶Ohwehuduumbasa hwao ohwo huhubachirisa sa. Abulao ohutya koti lw'obaasa. Ewe omenya mu njafwa ch'olwaanda, aakulu woolugulu luleeyi. Kata awahaba nooli aakulu muno koti eeswi, njia ohuhwaanulayo, Omwaami niye oboola.

¹⁷Omwaami aboola ati: “Amasira kahakwe hu Edomu kahabe akatiisa muno, buli owahabiteengeo yahaticheenge mani awukaho sa.

¹⁸Koti lu Sodomu neende Gomora neende ebiko bibyebodohaanie byasihiriswa, nilwo sa lu Edomu syahasihiriswe, mani abuleo omuundu omenyamo, haandi yibuleo walukeenda olisibaamo. Omwaami niye oboola.

¹⁹Bone, koti lu dalang'i yahabbiichuhe niyitulira mu bichaha biri hu ndulo w'omwaalo kwa Yorodaani, mani niyichia mu bwaayiro bulai, syesi nilwo lu ndaheeche mani njiruse ab'Edomu mu syaalo syaabwe byaangu endyo. Mani omweemeresi yindahadoole niye owahatuke mu Edomu. Wiina mweene onyala ohundeekeraniaho? Wiina mweene onyala ohuunyiingania? Mutuki siina onyala ohuunyiingania?

²⁰Mani sakira wulire bi Omwaami yetekeehe ohuhola hu baandu bomu Edomu, neende esichiiririrwa sy'ohuhola hu baandu bomu siko sya Temani. Kata neende abaana baabwe bayere bachia ohuhwehweeswa bayirwe, mani buli muundu yahateteeng'ale sa.

²¹Edomu nisyahakwe, syahabeeo esiyoka sy'amaani esyahakere esyaalo syoosi syaateengeereha, mani ekono lyasyo lyawuliirihana ohwoolera elalira hu Nyaanja Njahanyu.

²²Bone, omusuku yahaseete Bbosura koti eeswi, niyibaambuule embaya chalyo. Hu ludaalo olwo, abasikaari b'amaani ba Edomu bahatye koti omuhasi olumwa engasi.”

²³Ebidiira hu Damasiko Bino nibyo bi Omwaami yalomaloma ebidiira hu Damasiko: “Abomu biko bya Hamati neende Aripaadi bibaheheere, olwohuba bawuliire emboosi chitiisa. Ohweyendeherera hubechuule mu myooyo. Haba sibanyala huyenjeera daawe.

²⁴Abaandu bomu Damasiko baweeremo amaani, bakwiiremo oluteengo. Obuchuuni neende engisa bi badiirire, bali koti omuhasi olumwa engasi.

²⁵Esiko simanyihaane haandi esyalichiingimo esangaalo syebwaabire.

²⁶Mani sakira abasaacha baraaga bamwo bachia ohwiitirwa mu ngira chaamwo, haandi abasikaari basyo boosi bachia ohusihirira hu ludaalo olwo. Omwaami w'Obunyala niye oboola.

²⁷Njia ohuyaambya omuliro hu bida bya Damasiko, mani kuchia ohusaamba amadooho k'omutuki Bbenadaadi.”

²⁸Ebidiira hu Kedari neende obwaami bwa Hasoori bi Nebukadineesa omutuki wa Bbabbilooni yaamba. Omwaami aboola ati: Siingire, museete abaandu ba kedari! Musihirise oluya lw'abaandu b'ebukwe!

²⁹Munyake amayeema kaabwe neende ebyaayo byaabwe, mudiire obutimba bwaabwe neende ebiindu biindi ebiri mu mayeema kaabwe. Muyire engamia chaabwe, mani mubaboolere muti: Ebitiisa bi bali hu nyaande choosi!

³⁰“Eng'we abaandu ba Hasoori, Yiruhe, muchie mweekise eyale muno. Omwaami niye oboola. Olwohuba Nebukadineesa omutuki wa Bbabbilooni yetekeehe ohubaholaho esibi, haandi abahobere.

³¹“Siingire, muchie museete abaandu bomu syaalo esyo, abo abawulira bati bali mu muleembe. Omwaami niye oboola. Ebiko byaabwe bibulaho emilyaango kata sa ebiikalao, haandi sibisiiliindwa daawe.

³²Engamia chaabwe chichia ohunyakwa, eng'oombe chaabwe chichia ohuyaaywa. Njia ohusalaanisira hu nyaande choosi abaandu abo abahendeesa efwiiri lyaabwe lyeembikitana. Njia ohubakwiisaho amasira ohutula hu nyaande chaabwe choosi. Omwaami niye oboola.

³³Hasoori syaheehole esiparara sy'endaalo choosi, abuundu yi mabbwe kamenya. Abulao omuundu wahamenyemo, haandi yibulao walukeenda owahamenye hoomo.”

³⁴Sedekia niyali hu yaheehola omutuki wa Buyudaaya sa ati, Omwaami yalomaloma ebidiira hu Elamu, niyamboolera ati:

³⁵Ese Omwaami w'Obunyala mboola endi: “Bona, njia ohwiita abalasi b'obuyiingo boosi, abo abahola Elamu ohuba esy'amaani.

³⁶Njia ohuwuucha hu elamu omuyaka ohutula hu nyaande choosi ech'ekulu. Njia ohusalaania abaandu basyo boosi, mani sibuleo esyaalo kata silala sibanyala ohwiiruhiramo.

³⁷Njia ohuleetera abaandu bomu Elamu ohutya abasuku baabwe, neende abo abakiiya ohubeeta. Mu bwaalaba bwaange bw'amaani, njia ohubakwiisaho amasira. Njia ohubatumira amaye ohwoola lu ndahabasihirise ndaabamalao boosi.

³⁸Njia ohusihirisa abatuki baabwe, mani male nde mu Elamu esisaala syaange sy'obutuki. Ese Omwaami, Niise oboola.”

³⁹“Nae luunyuma, njia ohubakobosa haandi ehabi liindi mu Elamu. Ese Omwaami, Niise oboola.”