Read saamia Amaliro 2 Bible Online

Amaliro 2 - saamia bible

Amaliro 2

¹Omwaami mu bwaalaba bwae abwiihire esiirima hu Siyooni. Oluyaali lwa Yisiraeli lw'aakulu muno, Omwaami alwiisire aasi. Hu ludaalo lw'etima lyae, Omwaami haba sadeebere hu Nyuumba yae yohwiinamiramo daawe.

²Omwaami asihirisa ataali esisa ebyaalo byomu Buyudaaya byoosi. Mu bwaalaba bwae buungi, alikuule ebiko by'amaani byomu Buyudaaya. Amalire elalira oluyaali mu butuki neende mu batuki baamwo.

³Mu tima lyae lyaalaba, amalireo amaani ka Yisiraeli. Omwaami yahaya ohutuhoonyaho omusuku n'atuseetere. Yatunyoolerera koti omuliro kwaaduha muno okusihirisa buli abuundu.

⁴Omwaami yatuchoomia obuyiingo bwae, mani n'atulasa obusaale koti omusuku. Yeetere abo boosi abatusangaasaanga. Ano mu Yerusalemu hubweene obwaalaba bwae bwaaduha koti omuliro.

⁵Omwaami yeholere koti omusuku, mani n'asihirisa Yisiraeli. Asihiriise amadooho kasyo koosi, mani n'aleha ebiko byasyo by'amaani byaaba amakuunda. Ameedere mu bomu Buyudaaya obuchuuni neende amaliro kataakama.

⁶Omwaami alikuule esikaali syae koti esyomu ndalo, Amalireo ameenamiro kae mahuluundu kahoyera. Omwaami yakaamye mu Siyooni endaalo huluundu neende Sabbaato, haandi mu tima lyae lyaalaba, anyoolereere abatuki neende abalaamisi.

⁷Omwaami yebwabire alutaari yae haandi yaafudatira abuundu wae woolerefu. Alehere abasuku balikula ebida by'amahooho kasyo. Bayingiire mani bayokera nibasangaalira mu nyuumba y'Omwaami koti lu hweenamiraanga nihusangaala hu ludaalo luhuluundu.

⁸Omwaami amaliriire ohusihirisa esiha sya Siyooni. Yaabawulao neende olwaaho; mani yaahaya ohwaakamya ohusisihiirisa. Yakera eminaara neende esida ohulira mani byoombi byaakwa byaaba amakuunda.

⁹Ebiruwa byasyo bibiire mu loba; mani ebyuuma by'emitaliimbo chabyo bifunaakwe. Abatuki neende abachweenufu basyo bulaanu bali mu buwaambe. Amalako haba sikasihoonya daawe. Abanabbi basyo haba sibasinyoola ohuboneherwa daawe ohutula eyiri Omwaami.

¹⁰Abaandu bahuluundu bomu Siyooni beehala aasi hu loba nisibulao sibalomaloma. Bebbuuka olufu hu mitwe haandi nibefwaala ebigunia. Abahaana baraaga bomu Yerusalemu bewunamira emitwe nikiri aasi hu loba.

¹¹Emoni chaange chihoohere olw'ohulira; omwooyo kwaange kuli mubuchuuni. Engisa yiinjichuule hu mwooyo olwohuba abaandu baange basihiriire. Olwohuba abaana bayere neende abadoto basihirira hu ngira chomu siko.

¹²Balirira bang'inaabwe nibateeba bati: “Ebyohulya neende ebyohung'wa biri yeena?” Bakwa mu ngira ch'esiko koti abaandu banyayaalirwe, mani kala-kala nibakwiisira omwooyo mu mahono ka bang'ina abwe.

¹³Ewe Yerusalemu, ndaahuboolere siina, oba ndaahukeraanie hu siina? Ndaahukeraanie neende wiina, hu nyale ohuhulemya omwooyo ewe omuheerwa wa Siyooni? Olwohuba obuchuuni bwao buungi muno; haba sibwaakama daawe. Esuubi lyao linaatule yeena?

¹⁴Abanabbi bao bahubonera ebibonehero bitaali ebyadyeeri haandi eby'obubacha; mani baahaya ohuhuboolera ebyonoono byao, baahukobosera ehabi chao. Nae bahubonera omulaanga kutaali okwadyeeri haandi okudoondobania.

¹⁵Abo boosi ababitao beepaama mu mahono; bawukaho sa mani nibayuuya emitwe nibabona koti lu Yerusalemu yisihiriiswe, nibeteeba bati: “Sino nisyo esiko sibalaangaanga bati esilai muno, esangaalo y'esyaalo syoosi?”

¹⁶Abasuku bao boosi bahukaluuhaniire mani baahusyuula. Bahulekeeresa, mani beeluma ebisinini, baboola bati: “Husisihiriise! Eee, luno nilwo oludaalo lu hwaliindaanga; bulaanu nduno lwolere; hulubona.”

¹⁷Omwaami aholere esiindu si yatekeha, yosereese esyo siyatulabula koti lu yatekeha ohutula hale; atusihiriise ataali esisa. Akerere abasuku beefwe batweehoyeraho, mani yaababeresa amaani k'ohutuyiingira.

¹⁸Ewe Yerusalemu, lirira Omwaami! Leha amasika kao kahulukuse koti emyaalo esiro neende esideete! Otawuluuhaho kata nabudiidi, oba wakuunuhaho.

¹⁹Siingira, mani wekongooye Omwaami, mu siro syoosi. Muboolere Omwaami ebihuli hu mwooyo byoosi. Siingisa amahono wekongooyere abaana bao bayere babe abalamu abo abafwa enjala hu buli ngira yomu siko.

²⁰Ewe Omwaami, tingaala mani obone! Wiina wuundi y'osaandisye otyo? Silai abahasi olia abaana baabwe, abaana baabwe ba balera? Silai abalaamisi neende abanabbi beeterwe mu Nyuumba y'Omwaami mweene?

²¹Abaraaga neende abakofu bafwiire mani balaambaalire mu ngira. Abasyaani neende abahaana beteerwe mu biita. Obeetere hu ludaalo lw'obwaalaba bwao, obasiinjire ataali ohubakwiira esisa.

²²Olaangire abasuku baange koti olaanga abaandu hu sidyaalo beeche ohutula hu mbeka choosi. Abulao oweyiba oba owawonao hu ludaalo lw'obwaalaba bw'Omwaami. Abaana baange bandalera haandi ndahusa abasuku baange babasihirisa.