Read saamia Amaliro 4 Bible Online

Amaliro 4 - saamia bible

Amaliro 4

¹Esaabbu yeefwe ying'enaang'ena yihubbire emberebende; esaabbu endai muno yitalaage. Amakina moolerefu ak'Enyuumba ya Nasaae kasalaniiswe hu buli ngira.

²Abaraaga bomu Siyooni abali ab'engaanga y'aakulu koti esaabbu bulaanu bayirwa koti endamu ch'eloba, omulimo kw'omuloongi w'endamu.

³Kata amabbwe kebuule kanuunia obwaana bwaako, nae abaandu baange beeholere koti amawudo komu siino akaalabira abaana bako.

⁴Olulimi lw'abaana bwako lwaanda mu sisinini olw'obuluwo. Abaana bayere basaba esyohulya, nae abulao obaberesa daawe.

⁵Abaandu balichaanga ebyohulya bihiriramo elalira obulai, bafwiira hu ngira hulw'enjala. Abo abahuswa bulai neende oluyaali, bulaanu bakoonyeresa esyohulya mu bikoha bibasukuune.

⁶Olwohuba abaandu baange basaandire muno ohuhiraho koti abaandu ba Sodomu lu basaanda, ba Nasaae yasihirisa mu biha bidiidi muno.

⁷Abachweenufu beefwe bali aboolerefu muno koti amakina k'efula, abalafu muno ohuhiraho amabeere. Emibiri kyaabwe kyali eky'amaani ohuhiraho amakina komu nyaanja, haandi bali abanyirifu nibaboneha bulai muno.

⁸Nae bulaanu, bagubire koti efiro ly'endamu. Abulao onyala ohubamanya nibali hu ngira. Esihoba syaabwe syebaandire hu makuumba kaabwe, syoomere koti oluhwi.

⁹Abo abeeterwa mu biita bali bulai hooho ohuhira bano abeetwa enjala, abaweerera kaala ohwoola lu bahafwe olw'ohuhaywa esyohulya.

¹⁰Abahasi beebusi abali neende ohudaha huungi, badeeha abaana baabwe beene; mani babalya, mu husihirira hw'abaandu baange.

¹¹Omwaami aboloole obwaalaba bwae, achuhire etima lyae lyeesera; mani yaahubula omuliro hu Siyooni, mani nikusisaamba syawerao elalira.

¹²Abatuki bohu syaalo haba sibasifukiirira daawe, oba omuundu wohu syaalo yeesi, bati omusuku yahanyalire ohuyiingira mani yeengira mu biruwa bya Yerusalemu.

¹³Nae esyo syanyaliha hulw'ebyonoono by'abanabbi basyo neende abalaamisi basyo, abatemuliramo abaandu baluungifu.

¹⁴Badiikaa-diika koti abawofu hu ngira chamwo, nibeenyasire muno neende amabaanga, abulao onyala ohudiira hu ngubo chaabwe.

¹⁵Abaandu nibabeetusaho nibaboola bati: “Mbwere-eyi! Mbwere-eyi! Otandiiraho!” Mani nibeehola abateende haandi abayikaani; mani abaandu bomu byaalo nibaboola bati, “Haba sibachia hudoong'a naafwe.”

¹⁶Omwaami mweene niye owabasalaania, haba sasibadeebaho daawe. Abalaamisi neende abeemirisi haba sibasiiswamo oluyaali daawe.

¹⁷Hwatingaala nihuliinda obuhoonyi nae ohuliinda hwali ohwabihaya. Hwaliinda obuhoonyi bw'esyaalo nae esyaalo haba sisyanyala ohutuwonia.

¹⁸Omusuku yali n'atukiiya mani nihutya kata ohukeenda hu ngira cheefwe. Ohusihirira hweefwe hwali aambi, endaalo cheefwe chali nichiduuduye olwohuba enjakamo yeefwe yali niyoolere.

¹⁹Abo abatukiiya baangu muno ohuhiraho eeswi cho muukulu; batwoongaho ohwoola hu ngulu, mani nibatutekera mu siparara.

²⁰Bawaambisya mu buko bwaabwe omutuki weefwe yi Omwaami yadoola, oyo yi hwali nihuboola huti, “Mu bunyala bwae huchia ohunyala ohuyiingira mu byaalo.”

²¹Sangaale haandi mwehoye, eng'we abomu Edomu, neende eng'we aba Wuusi. Nae mwesi amasira kahabakweeho; mwesi mwahadandaamire mani mwefwaalula mwadoong'a esyeekenye.

²²Ewe Siyooni, ohusaanda hwao hulw'ebyonoono byao hwakaame, Omwaami haba saachia huhuleha mu buboye daawe. Nae eng'we abomu Edomu, Omwaami achia ohubasaandya, Achia ohubwiihula alafu ebyonoono byeeng'we.