Read saamia Amaliro 5 Bible Online

Amaliro 5 - saamia bible

Amaliro 5

¹Ewe Omwaami, yichulisa ebyatukwaaho; Tingaala, mani obone ohudiirwa esoni hweefwe!

²Ebiindu byeefwe biri mu bunyala bwa walukeendaa, amadaala keefwe kali mu bunyala bw'abateende.

³Hweholere bamulehwa, hubula baseefwe; bang'inayeefwe bali koti abahasi bafwiire.

⁴Amaachi kahung'wa hukatuungira, eehwi ch'ohudeehera huli n'ohukula.

⁵Huboywa emikoye mu kosi mani nihuhwehweeswa; hujoong'a, nae hubula obuuluhiro.

⁶Husaba Abamisiri neende Abasiria ebyohulya huhunyale ohudoong'a abalamu.

⁷Bakuuka yeefwe bahola bafwa hale; mani efwe huli ohusaanda hulw'ebyonoono byaabwe.

⁸Hutukwa neende abawaambe; mani abulao onyala ohutwaabina mu bunyala bwaabwe.

⁹Huwaayo obulamu bweefwe, hu hukoonye ebyohulya, olwohuba abatemo batweebodoohaanie hu nyaande choosi.

¹⁰Enjala yitulwaasire, emibiri kibalire koti etanuuru.

¹¹Abahasi beefwe babakwiiraho mu Siyooni bweene, abahaana bataamanyire eby'abasaacha babakwiiraho mu biko byomu Buyudaaya.

¹²Abachweenufu beefwe bayirwa ohwiitwa; Abahuluundu beefwe haba sibeeswamo oluyaali.

¹³Abaana basyaani beefwe bayiikwa ohusya hu lukina koti abawaambe; haandi abaana bayere badandaamira olw'obusito bw'eehwi chibakiinga.

¹⁴Abaandu bahuluundu haba sibasiihala mu siruwa sy'esiko, abaana baraaga haba sibasyeemba daawe.

¹⁵Hubula esangaalo lyoosi mu bulamu bweefwe; mu bweyaango bw'ohuhina, huli mu masika.

¹⁶Hubula esiindu situberesa oluyaali. Chitwakaanire, olwohuba hwahola ebyonoono!

¹⁷Olwohuba sino, engisa yitudiirire hu mwooyo, olwohuba ebiindu bino, emoni chikwiireho olububi,

¹⁸olwohuba Olugulu lwa Siyooni luleherwe ao lutyo. Ebinamiindi nibyo ebikeenderaho.

¹⁹Nae ewe, Omwaami, niiwe otuka endaalo choosi pe; esisaala syao sy'obutuki sy'endaalo choosi pe.

²⁰Lwasiina otwibirira endaalo choosi, lwasiina otwebwaaba otyo?

²¹Ewe Omwaami, tukobose y'oli, ofunyiseo ebilai byeefwe byaahale!

²²Kose otwebwabiire elalira? Etima lyao liingi elyo haba silyahaakame daawe?