Read saamia Esekeeli 15 Bible Online

Esekeeli 15 - saamia bible

Esekeeli 15

¹Haandi Omwaami yalomaloma naange n'aboola ati:

²“Ewe omwaana w'omuundu, onyala ohukeraania omusabbiibbu neende omusaala kwoosi? Kuliwo omusaala kwomu sichaha kw'onyala ohukeraania neende esaga ly'omusabbiibbu?

³Omusabbiibbu kunyala kwatulamo embaao mani chabaachwamo esiindu syoosi? Oba banyala batusamo esihoondo bi bahaanihiraho esiindu syoosi?

⁴Bone, banyala ohukwaadusamo omuliro kwoong'ene. Nae nikumala ohuya olwaande neende olwaande, kwaadoong'a akatikaati, abulao obuhoonyi bu wahakunyoolamo daawe.”

⁵Bone, koti lu musabbiibbu kubula obuhoonyi nikusisiiri omulamu, nae omuliro nikumalire ohulisaamba mani lyaaya, lwosi haba silyahaba neende obuhoonyi.

⁶Mani sakira Omwaami Nasaae aboola ati; “Koti sibulao esiindu sy'onyala ohunyoola mu musabbiibbu mu misaala kyomu sichaha kyoosi, ohumalaho ohwaadusamo omuliro byoong'ene, nilwo lu ndahaweeyo abaandu bamenya mu Yerusalemu mani mbasaandye.

⁷Njia ohubasaandya, kata baheeruha ohweeyiba omuliro, nae omuliro kwahabasihirise. Ao niwo yimwahamanyire nimbasaandya, muti Niise Omwaami.

⁸Njia ohuhola esyaalo sibe ekuunda, olwohuba abaandu baamwo bahayire ohuba abeesikwa. Nilwo lu Omwaami Nasaae aboola.”