Read saamia Esekeeli 18 Bible Online

Esekeeli 18 - saamia bible

Esekeeli 18

¹Omwaami haandi yalomaloma naange, yandeeba ati:

² “Lwasiina musiikaadanga olukaado luno mu syaalo sya Yisiraeli nimuloonda-loondamo nimuboola muti: ‘Abeebusi balya emisabbiibbu kiita ameeno, nae ameeno k'abaana baabwe kaafwa’?

³Ese Omwaami Nasaae ndeechuba endi, koti lu ndi Nasaae mulamu, olukaado luno simuchia ohulwehoonyeraho haandi mu Yisiraeli.

⁴Bone, niise otuka obulamu bwa buli muundu; obulamu bw'omwiibusi neende obulamu bw'omwaana bwoosi bwaange. Oyo onaholaanga esyonoono, niye onafwichaanga.

⁵“Omuundu n'aba naali omuluungifu, aloondakana neende obwadyeeri haandi yaahola ebilai.

⁶Haba saaliira hu ngulu ebyohulya bi bayaaniire ebiloongaloongwe oba Yeenamira ebiloongaloongwe bi Abaisiraeli beenamira. Haba saakwa hu muhasi w'owaasye, oba yaakona neende omuhasi oli mu mwoosi.

⁷Haba safwiinyirira omuundu yeesi, nae akobosera omweeyoli esiindu sy'aaba n'amweyosereho. Haba simuliichaki daawe. Aberesa ebyohulya abo ababula nabyo, neende abo ababula esy'ohwefwaala, ababeresa ebyefwaalo.

⁸Haba siyeosa eseende naali neende esifune syohunyoolamo engaanga oba ohweehola omuyiinda daawe. Haba saafukiirira ohwonoona haandi naakaya abaandu, abaheengera emisaango ataali ohwehubbira daawe.

⁹Omuundu oyo adiira amalako kaange haandi yooseresa bulai bi mulagira. Omuundu oyo muluungifu niye, haandi achia ohuba omulamu.” Nilwo lu Omwaami Nasaae aboola.

¹⁰“Nae omuundu oyo niyeebula omwaana, mani omwaana wae yaaba omunyaka haandi omutemo,

¹¹haandi natooseresa bi ahoyere ohuhola, ohutusaho aliira hu ngulu ebyohulya bi bayaaniire ebiloongaloongwe, oba yaakwa hu muhasi w'owaasye.

¹²Muliichaki haandi afwiinyirira abamanani neende abo abali mu budahano. Haba sakoboseraanga omuundu omwewolereho esiindu syaaba namusereho. Yeenamira ebiloongaloongwe haandi yaahola eby'emisiro.

¹³Niyeosa eseende, aba neende esifune sy'ohunyoola engaanga neende ohweehola omuyiinda. Mani omuundu oyo ahoyere ohuba omulamu? Haba daawe, saacha huba omulamu. Aholere eby'omusiro ebyo byoosi, mubwadyeeri bweene achia ohufwa, olwohuba omweene niye oweleteere ohufwa ohwo.

¹⁴“Nae omuundu w'engeri yino niyeebula omwaana, mani omwaana oyo yabona ebyonoono bi laatang'ene ahola, mani yaatya, yaahaya ohuloondakana neende ebiholwa bya laatang'ene,

¹⁵otaliiranga hu ngulu ebyohulya bi bayaaniire ebiloongaloongwe, oba yeenamira ebiloongaloongwe bi Baisiraeli beenamira. Haandi haba sakwiichanga hu muhasi w'owaasye,

¹⁶oba yeehola omuliichaki. Nae akabanaanga ebyohulya byae neende abo ba enjala yiluma haandi afwaasa abo ababula esy'ohwefwaala.

¹⁷Mani niyebwaaba ohuhola obubi hu bamanani, haandi n'atafukiirira ohweosa eseende naali n'esichiririrwa sy'ohunyoola engaanga neende ohuba omuyiinda. Yadiira amalako kaange haandi naahola koti lu mulagira. Oyo haba saacha hufwa hulw'ebyonoono bya laatang'ene, nae mubwadyeeri bweene, achia ohuba omulamu.

¹⁸Nae laatang'ene, olwohuba yeeyira bubi, haandi yaanyaka abaandu baasye, haandi yaahola ebyo ebitaali ebilai mu baasye, bone, achia ohufwa hulw'ebyonoono byae.

¹⁹“Nae mweteeba muti, ‘Lwasiina Omwaana haba siyoolobwa hulw'ebyonoono bya laatang'ene?’ Omwaana n'ahola ebyadyeeri haandi ebilai bi ahoyeere ohuhola, yaadiira amalako kaange koosi haandi yaakoseresa, omwaana oyo mubwadyeeri bweene achia ohuba omulamu.

²⁰Omuundu yonoona niye olifwa. Omwaana haba saachia husaanda hulw'ebyonoono bya laatang'ene, noomba omwibusi yaasaanda hulw'ebyonoono by'omwaana wae. Omuudnu muluungifu ananyooleenge omukabo ohweema hu buluungifu bwae. Haandi omuhola-mbi, yesi ananyooleenge omukabo ohweema hu bibi byae.

²¹“Nae omuundu mubi, n'akaluuhana mani yaalehana neende ebyonoono byoosi bi yahola, mani n'adiira amalako kaange koosi haandi yaahola ebyadyeeri neende ebilai, mubwadyeeri bweene, achia ohuba omulamu, haba saacha hufwa daawe.

²²Ebyonoono byae byoosi bi yahola bichia ohumuleherwamo, mani abe omulamu; hulw'ebiholwa biluungifu byaaba n'aholere, aba achia ohuba omulamu.

²³Mubaasa muti, saangaliraanga ohufwa hw'omuundu mubi? Haba daawe, nae ndaha yeyolobye mani abe omulamu. Nilwo lu Omwaami Nasaae aboola.

²⁴“Nae omuundu muluungifu, n'alehana neende obuluungifu bwae, mani yaahola ebiindu nasilala koti bi muundu mubi ahola, mubaasa muti aba anaba omulamu? Haba daawe, sibulao esilai kata silala hu biholwa bi yahola esiba nisichia ohwiichuliswa daawe. Aba achia ohufwa olwohuba yahaya ohuba omweesikwa haandi neende hulw'ebyonoono bi yahola.

²⁵“Nae eng'we muboola muti: ‘Esiindu si Omwaami ahola haba si syadyeeri.’ Wulire eng'we Abaisiraeli. Mubaasa muti Ese esiindu si ndi ohuhola haba si syadyeeri? Mubaasa muti ebiindu bi muhola nibyo ebyadyeeri?

²⁶Omuundu muluungifu n'akaluuhana mani yaleha obuluungifu bwae, yaahola ebyonoono, achia ohufwa hulw'ebyonoono ebyo. Achia ohufwa ohweema hu bibi bi yahola.

²⁷Haandi omuundu mubi, n'akaluuhana mani yaaleha obubi bwae, yaahola ebiindu biluungifu haandi ebilai, aba aliwonia obulamu bwae.

²⁸Olwohuba omweene yabona bi yali naahola mani yakaluuhana ohutula hu bubi bu yali n'aholere, mubwadyeeri bweene, achia ohuba omulamu, haba saachia hufwa.

²⁹Nae eng'we Abaisiraeli muboola muti, ‘Esiindu si Omwaami ahola haba si syadyeeri.’ Eng'we Abaisiraeli, mubaasa muti bi hola haba si byadyeeri? Mubaasa muti ebiindu bi muhola nibyo ebyadyeeri?”

³⁰“Mani sakira njia ohuheengera buli muundu omusaango ohweema hu biholwa byae omweene. Nilwo lu Omwaami Nasaae aboola. Mweyolobye mutule mu byonoono byeeng'we byoosi, ataali ao, ebyonoono byeeng'we bichia ohubasihirisa.

³¹Mweetuseho ebyonoono byeeng'we byoosi bi mwahola, munyoole ebibaaso biyaaha neende omwooyo muyaaha. Eng'we Abaisiraeli, lwasiina mwedahisa ohufwa?

³²Olwohuba Ese haba sisaangalira mu hufwa hw'omuundu kata mulala. Mukaluuhane mutule mu byonoono byeeng'we, mani mube abalamu. Nilwo lu Omwaami Nasaae aboola.”