Read saamia Esekeeli 19 Bible Online

Esekeeli 19 - saamia bible

Esekeeli 19

¹Omwaami yamboolera ati: “Bulaanu chaaka ohulirira abachweenufu ba Yisiraeli:

²Obaboolere oti, ‘Makoo yali edalang'i ehasi ey'amaani. Yahusira abaana bae akatikaati w'edalang'i saacha enjalaba.’

³Yahusa mulala hu baana bae yaaba edalang'i ndaaga, yayeekesa ohuyiima; mani niyichaaka ohulya abaandu.

⁴Ebyaalo nibimuhubbira embuungu; nibamuwaambiisye mu buko bwaabwe; baamuhweesa neende amalobo nibamuyira mu syaalo sy'e Misiri.

⁵Ng'ina n'aliinda ohwoola lu yabona ati esuubi libulao. Yahusa omwaana wae wuundi, yahula niyehola edalang'i njalaba.

⁶Nae niyahula yaangala, yahuumbira mu dalang'i chaasye. Yesi yeeka ohuyiima alala neende ohulya abaandu.

⁷Yafunaka-funaka enyuumba chaabwe, niyisihirisa ebiko byaabwe. Esyaalo syoosi neende abaandu bamwo boosi batichaanga n'abawuliraanga nabuluula.

⁸Ebyaalo byebuusa alala ohumulwaania; abaandu nibeecha ohutula mu buli mbeka. Bayiteka neende omuteego; mani niyikwa mu buko bwaabwe niyidiirwa.

⁹Bayihweesa neende amalobo nibayiikalira mu sikaali, bayiyirira omutuki w'e Bbabbilooni. Mani nibamuliindira mu buwaambe, ohubuluula hwayo huhaye ohuwulirihana haandi muungulu cha Yisiraeli.

¹⁰“Mao yali koti omusabbiibbu kwataakwa mu ndalo aambi neende amaachi. Olwohuba kwali aambi neende amaachi, kwahula kweechulaho amasaafu neende ebyaamo.

¹¹Amasaga kakwo moomu, babaachamo emikwaajo ky'abatuki. Omusabbiibbu kwahula kwaleeya ohwoola hu bireesi; buli muundu amasaafu kakwo maangi neende obuleeyi bwakwo.

¹²Nae abasuku baakwo nibakwiiya, nibakung'uluula neende emisi kyakwo mani nikukwa aasi. Omuyaka kutula ebukwe kweecha kwoomya ebyaamo byakwo. Amasaga kaakwo nikafunakwaho; nikooma mani nikasaambwa omuliro.

¹³Bulaanu omusabbiibbu okwo kutaakirwa haandi mu siparara, mu syaalo syomu haandi esibulamo amaachi.

¹⁴Omuliro kutulire hu sisina syakwo; mani nikusaamba amasaga kakwo neende ebyaamo byakwo. Amasaga kakwo haba sikasisiiri amoomu, sikacha hubaachwamo emikwaajo ky'abatuki. Luno nilwo olweembo lw'engisa; balweembere nibaluloonda-loondamo.”