Read saamia Esekeeli 24 Bible Online

Esekeeli 24 - saamia bible

Esekeeli 24

¹Hu ludaalo lw'ehumi, lw'omwoosi kw'ehumi, mu mwaaka kwa hataanu-na-hane nihuli mu buwaambe, Omwaami yalomaloma naange n'aboola ati:

² “Ewe omwaana w'omuundu,” “yandiika oludaalo lw'omwoosi olw'olwaleero luno. Olwohuba luno nilwo oludaalo lu mutuki wa Bbabbilooni achaakiraho ohuseeta Yerusalemu.

³Kaadira abaandu bajeemu abomu syaalo olukaado obaboolere oti, Omwaami Nasaae aboola ati: ‘Ta enuungiro hu mayika, mani oyiichusemo amaachi.

⁴Taamo ebipaande by'enyama, taamo ebipaande bilai byoong'ene, eby'enyama y'esinama neende oluliho, oyiichusemo neende amakuumba kahiramo obulai.’

⁵Bukula enyama y'esyaayo sihiramo obulai; ote eehwi mu mayika. Mani obitokose bulai muno; enyama neende amakuumba ebyo biyiire elalira.”

⁶Mani sakira Omwaami Nasaae aboola ati: “Kanyoole esiko sitemo esyo. Siri koti enuungiro yilalire, mani obulale bwayo haba sibunyala huruudwaho daawe. Tusamo buli sipaande, n'otadooleremo daawe.

⁷Olwohuba busisiiriwo obutemo mu siko esyo. Nae haba sisyabwiiha olufu hu mabaanga keediswa. Nae syaakaleha alafu.

⁸Amabaanga keediswa ako kalehere hu lwaanda luhaya, mani kahaye ohubwiihwaho. Mani sakira kasaanguluuse etima lyaange, nyale ohwetuunga.”

⁹Sakira Omwaami Nasaae aboola ati: “Kanyoole esiko sitemo esyo. Syesi njia ohuhola esituuli sy'ehwi sihoongo.

¹⁰Meedaho eehwi nyiingi mani otubuleho omuliro. Deeha amaachi kahamemo, mani ebipaande bilale.

¹¹Bulaanu enuungiro yilalire eyo yite hu maanda, male oyilehe yibale, mani omugasa kwaayo kuye kwaahanye, obulale bwasyo busaanguluhe, busihirire.

¹²Nae nyaahaniire buhaya, obulale bwaayo haba sibuyitulaho daawe, kata omuliro kwahasaamba kutye.

¹³Yerusalemu, obucheke bwao buhunyaasire, kata ndahahulabya endye, nae haba siwalafuya daawe. Haba soochia hulafuya daawe, ohwoola lu ndahahumalireho etima lyaange.

¹⁴Ese Omwaami, Niise olomaloome, mani esiha syahoole, mani hole si mboolere. Haba siinjia ohukobola enyuma, haba siinja ohuhulehera daawe. Njia ohuhuheengera omusaango ohweema hu biima byao neende ebiholwa byao.” Nilwo lu Omwaami Nasaae aboola.

¹⁵Omwaami haandi yalomaloma naange n'aboola ati:

¹⁶“Ewe omwaana w'omuundu, bona, njia ohuhutusaho omuundu yi waheera muno, oyo y'otingaalaho mani waasaangaala. Nae haba sohoyere ohumulira oba ohumokosaho kata esika.

¹⁷Mikuhana sa, nae omanyaanga oliraho abaandu nibawulira. Weboye esitaambaya hu mutwe, wefwaale ebiraato. Otebwiiha mu moni, omanyaanga olyaaho ebyohulya byohu masika ako.”

¹⁸Nae obwiire nibwahya, ndalomaloma neende abaandu. Nae hu ludaalo olwo engoloobe, omuhasi waange naafwa. Nae hu ludaalo luloondaho, ndahola koti lu Omwaami yali niyandagiire ohuhola.

¹⁹Abaandu baandeeba bati: “Tuboolere amahuluundu kakera niweehola oti?”

²⁰Mbaboolera endi: “Omwaami alomaloome naange, n'aboola ati:

²¹‘Boolera Abaisiraeli oti, Omwaami Nasaae aboola ati: Bone, njia ohunyaasa abuundu waange woolerefu, akeraanga nimumanyihana koti lu muli ab'amaani, haandi yi mwekoomba ohubona n'abasaangaasa emyooyo. Mani abaana beeng'we basyaani neende abahaana bamwaleha mu Yerusalemu baheeterwe mu biita.

²²Olwo nilwo lu mwahaholere koti lu ese holere. Haba simwahebwiihe mu bweeni, haandi simwahalye ebyohulya byohu masika.

²³Ekofia cheeng'we chahadoong'e hu mitwe, haandi ebiraato byeeng'we byahadoong'e mu makulu. Haba simwahabeho neende esibeera oba kata ohuchereenjesaho. Nae mu hweyendeherera hulw'ebyonoono byeeng'we, buli muundu hweeng'we yahekanyiirisire owaasye engisa yae.

²⁴Mani Esekieli yahabe ahalolero habalabula, mani ebyo byoosi-byoosi bi aholere, mwesi mwahahole. Ebyo nibyahakweeo, niwo yimwahamanyire muti, Niise Omwaami Nasaae.’ ”

²⁵Omwaami yaboola ati: “Ewe omwaana w'omuundu, hu ludaalo olwo, nilwo lu ndahabatusireho esyo esikeraanga nibamanyihana koti lu bali ab'amaani, esikeraanga nibeniinia, si bekoombaanga, esibasaangaasaanga emyooyo. Haandi ndahabatuseho abaana baabwe basyaani neende abahaana.

²⁶Hu ludaalo olwo, oyo owahabe n'awonereo, yaheeche yooli ohuhweekesa.

²⁷Hu ludaalo olwo, wahachaake haandi ohulomaloma neende oyo owahabe n'awonereo. Ao niwo yi wahabe ahalolero eyiri abaandu abo; haandi niwo yibahamanyire bati, Niise Omwaami.”