Read saamia Esekeeli 25 Bible Online

Esekeeli 25 - saamia bible

Esekeeli 25

¹Omwaami yalomaloma naange, n'aboola ati:

²“Ewe omwaana w'omuundu,” tingaala eyiri Abaamooni, mani olaangirire ebidiira hu bichia ohubakwaaho.

³Boolera Abaamooni oti: Wulire bi Omwaami Nasaae aboola. Omwaami Nasaae aboola ati, koti lu mwasaangaala ohubona muti abuundu waange woolerefu anyaasirwe, haandi ohubona muti esyaalo sya Yisiraeli nisyeholere ekuunda, haandi mwaasaangaala ohubona Abayudaaya nibayirirwe mu buwaambe.

⁴Mani sakira njia ohuleha abaandu batula ebukwe babaambe. Bachia ohwoombaha amayeema kaabwe mu syaalo syeeng'we, bamenye mu syaalo syeeng'we. Bahalye ebyaamo bi mulimire haandi baang'wa amabeere k'ebyaayo byeeng'we.

⁵Njia ohuhola esiko sya Rabba sibe esidwooli sy'engamia, haandi hole ebiko by'Abaamooni bibe obwaayiro bw'ebyaayo. Ao niwo yimwahamanyire muti, Niise Omwaami.

⁶“Olwohuba Omwaami Nasaae aboola ati: Koti lu mwapaama amayu haandi mwaaduuma-duuma nimweehoya, mweekesa emyooyo kyeeng'we kimuli nakyo eyiri esyaalo sya Yisiraeli.

⁷Mani sakira, bone, njia ohubasaandya mani mbalehe mu bunyala bw'ebyaalo biindi. Njia ohubasihirisira elalira muhaye haandi ohubaaho esyaalo daawe, oba ohuba neende esyaalo syeeng'we-hu-bweeng'we. Olwo nilwo lu mwahamanyire muti, Niise Omwaami.”

⁸Omwaami Nasaae aboola ati: “Olwohuba abaandu ba Moabbu baboola bati, bone, Ebuyudaaya siri sa koti ebyaalo biindi byoosi,

⁹mani sakira njia ohuleha ebiko bikayirira enjaho cha Moabbu biseetwe. Omwo nimwo omuli ebiko bino: Bbetiyesimooti, Bbaalimeyooni, neende Kiriataimu.

¹⁰Njia ohuleha abaandu batula ebukwe baseete Abamoabbu neende Abaamooni mani babayiingire, muhaye haandi ohuba esyaalo daawe.

¹¹Njia ohusaandya Abamoabbu, ao niwo yibahamanyire bati, Niise Omwaami.”

¹²Omwaami Nasaae aboola ati: “Abaandu b'Edomu bahola bubi muno ohwetuungira hu Bayudaaya ataali ohubakwiira esisa kata nabudiidi.

¹³Mani sakira, Ese Omwaami Nasaae mboola endi, njia ohusaandya Edomu, mani njite simalemo buli muundu neende buli sisolo. Njia ohuhola esyaalo sy'Edomu sibe ekuunda. Abaandu baamwo baheeterwe mu biita, ohutula Temani ohwoola Dedani.

¹⁴Njia ohwehoonyera abaandu baange Abaisiraeli ohwetuunga hu Edomu, mani bachia ohuhola hu Edomu bi ndaha ohweema hu tima lyaange neende obwaalaba bwaange. Ao niwo yi baandu b'Edomu bahamanyire ohwetuunga hwaange.” Ese Omwaami Nasaae, Niise oboolere.

¹⁵Omwaami Nasaae aboola ati: “Olwohuba Abafilisiti betuungira hu basuku baabwe b'endaalo choosi, beekesa emyooyo ky'ohwetuunga, mani baabasihirisa nibechuule etima;

¹⁶Omwaami Nasaae aboola ati; bone, njia ohusaandya Abafilisiti abo mani mbasihirisire elalira. Njia ohusihirisira elalira Abakereti, malireyo elalira abahabe nibawonereo abali hu lwaasi lw'enyaanja.

¹⁷Njia ohubasaandya neende obwaalaba buungi, mani ndetuungire hu syaalo syaabwe. Olwo nilwo lu bahamanyire bati, Niise Omwaami, nindahetuungire hu syaalo syaabwe.”