Read saamia Esekeeli 38 Bible Online

Esekeeli 38 - saamia bible

Esekeeli 38

¹Omwaami yalomaloma naange, n'aboola ati:

² “Ewe omwaana w'omuundu, tingaala Googi, omutuki wa Meseki neende Tubbali, mu syaalo sya Magoogi, olaangirire ebidiira hu masira kachia ohumukwaaho.

³Muboolere oti, Omwaami Nasaae aboola ati: ‘Bona, ewe Googi, omutuki wa Meseki neende Tubbali, Ese ndi omusuku wao.’

⁴Njia ohuhukaluuhania, mani nde amalobo muusaya mwao, mani hulobe, ewe neende eye lyao, neende efaraasi chao neende abeerusi b'efaraasi, boosi nibefwaalire bulai ebyefwaalo by'ohulwaana, eye hoongo muno, nibali neende engabo neende ehuumba, haandi nibali neende engaanga njoki.

⁵Aba Perisia, Kuusi, neende Libbya, bahabe alala nabo, boosi nibali neende engabo neende ekofia ch'ebichuma.

⁶Abalwaani b'amaye boosi abatula mu syaalo sya Gomeri neende Bbetitogarima ohutula eyale mu bituundu bihira ohuba emukulu muno, neende abatula mu byaalo biindi biingi muno, boosi bahabe alala naang'we.

⁷“Weetekehe, obe nooli omwetekefu, ewe neende ab'amaye bao boosi abebuusiire nibahwebodohaanie, mani obe omuliindi wako.

⁸Nae endaalo yiingi nichibitireo, wahaseetwe. Nae mu myaaka kiichayo, wahaseete esyaalo sya Yisiraeli esyawoniswa ebiita. Esyaalo syadoong'a ao nisiri koti ekuunda ohumala emyaaka miingi muno, nae bulaanu abaandu baamwo boosi bakobooswe nibatuswa mu byaalo biingi, haandi nibali mu muleembe hu ngulu ch'esyaalo sya Yisiraeli esyo nibataali neende ohutya hwoosi.

⁹Ewe neende eye lyao, neende abaandu bomu byaalo biingi abali naawe, mwahaseete haandi mwaanyaka, mani mwabwiiha hu syaalo esyo koti ebireesi lu bibwiiha.”

¹⁰Omwaami Nasaae ahuboolera ewe Googi ati: “Hu ludaalo olwo, wahanyoole ebibaaso bibi, mani wahahole endekeha oyohulyamo olukwe.

¹¹Wahaboole oti, ‘Njia ohuchia seete ebyaalo bitasitwa neende olukaka. Njia ohuseeta abaandu bali mu muleembe haandi abataali neende esyonoono syoosi sibetekeheere, haandi abataali neende endekeha y'ohweliinda yoosi daawe.’

¹²Ochia ohunyaka mani onyoole ebiindu bi onyakire, mu biko byali nibireherwe ao mani nibisiha nibiba ekuunda, nae bulaanu ebirimo abaandu ababuusirwe alala ohutula mu byaalo, abanyoolere bulaanu amayiicho k'ebyaayo, neende ebiindu bilai biindi, haandi abali akatikaati w'esyaalo syoosi.

¹³Abaandu ba Seebba neende Dedani, neende abachurusi ba Tarusiisi neende engoongo chayo choosi, bahahuteebe bati, ‘Wiichire ohutunyakaho ebiindu? Obuusire alala eye lyao ohukiinga ebiindu bi onyakire, Wiichire ohunyaka onyoole efeesa neende esaabbu, haandi oyire ebiindu neende ebyaayo, onyake ebiindu biingi?’

¹⁴“Mani sakira ewe omwaana w'omuundu, laangirira oboolere Googi oti, Omwaami Nasaae aboola ati, ‘Hu ludaalo olwo, abaandu baange Abaisiraeli nibahabe nibali mu muleembe, wahamanye omweene.

¹⁵Wahatule eyo yi wamenya eyale muno neende mu bituundu by'emukulu, mani wiichie neende eye hoongo ly'amaani, ely'abalwaani b'amaye abatula mu byaalo biingi, boosi nibeerusa efaraasi.

¹⁶Waheechie mani oseete abaandu baange Abaisiraeli nooli koti esireesi sidiirire hu syaalo. Esiha nisyahoole, ndahahutume oseete esyaalo syaange, mani ebyaalo binyale ohuumanya, nibyahabone koti lu hwehoonyeere ewe Googi, ohweekesa koti lu ndi omwoolerefu.

¹⁷“Omwaami Nasaae aboola ati: ‘Ewe niiwe yi ndalomalomaho hale, nindehoonyera abahalaabani baange, abanabbi ba Yisiraeli, abo abatusaanga obunabbi hulw'embaka y'emyaaka miingi bati, njia ohuhutuma obaseete.’”

¹⁸Omwaami Nasaae aboola ati: “Nae hu ludaalo olwo lu Googi yahaseetereho esyaalo sya Yisiraeli, etima lyaange lyahasaanguluhe.

¹⁹Mu mbaliha neende etima lyaange lyeesera, ndeechuba endi, hu ludaalo olwo, yahabeeo ohuteengereha hw'esyaalo huhoongo muno mu syaalo sya Yisiraeli.

²⁰Eng'eeni chomu nyaanja, neende amayoni kabburuha aakulu, neende ebisolo byomu siino, neende ebiindu byambaakira hu loba, neende abaandu bali hu syaalo boosi, byahateengerehere mu moni waange nibitiire. Engulu chahasukunwe aasi, enyaanda chahaadihe chaakwa aasi, neende buli sida syoohu siko syahalikuhe syaakwa aasi.

²¹Omwaami Nasaae aboola ati, njia ohulaanga ebitiisa byabuli ngeri ohulwaania Googi. Buli muundu odiirire olugaanga yahalwaanie owaasye mweene.

²²Njia ohwehoonyera amalwaae neende ohwiidisa amabaanga saandye Googi. Haandi njia ohumukwiisaho, alala neende ebyaalo biingi biri alala nae, efula nyiingi muno, eyirimo amakina, neende enjeserye ch'omuliro kw'esibbiriiti.

²³Olwo nilwo lu njia ohweekesera ebyaalo biingi obunyala bwaange neende obwoolerefu bwaange. Olwo nilwo lu bahamanyire bati, Niise Omwaami.”