Read saamia Esekeeli 4 Bible Online

Esekeeli 4 - saamia bible

Esekeeli 4

¹Nasaae yaboola ati, “Ewe omwaana w'omuundu, bukula etafwaali mani olite mu moni wao, olichooreho esifwaanani sy'esiko sya Yerusalemu.

²Mani weekese koti lu sichia ohuwaambwa, yoombaha engeri yi sichia ohuseeterwamo; oliteeho ekaambi chosi echichia ohusiseeta, haandi olyoombaheho ebichia ohulikula ebida byasyo hu buli lwaande.

³Mani bukula olusaani lw'esichuma, oluteeo lube koti esida sy'echuma akatikaati wao neende esiko esyo; mani otingaale esiko esyo sibe koti esiseeterwe, mani obe koti niiwe osiseetere. Hano niho ahachia ohuba ahalolero ahalabula esyaalo sya Yisiraeli.

⁴“Weyalisire hu muhono kwao mukaada, mani njia ohuhutaaho ohusaanda hw'esyaalo sya Yisiraeli. Olwohuba endaalo ch'onaamale n'olweyalisiireho, ochia ohutuungiraho ebyonoono byaabwe.

⁵Huheengereo embaka y'endaalo emia chidatu neende amahumi kataanu-na-kane (390), echaakana neende embaka y'emyaaka kibahamale nibasaanda. Mani nilwo lwoochia ohumala endaalo echo niwedwiihire ohusaanda hw'esyaalo sya Yisiraeli.

⁶Niwahamaleho endaalo echo, waheyalise ehabi lyoohubiri, nae hu muhono kwao muluungi, mani wedwiihe ohusaanda hw'esyaalo sya Buyudaaya, hubereese embaka y'endaalo amahumi kane, buli ludaalo lwaakane neende omwaaka kw'ohusaandiraho hwaabwe.

⁷Mani ochia ohutingaala hu siko sya Yerusalemu siseeterwe, osyekese esifuusi sy'ofumbaate, obaboolere ebichia ohusikwaaho.

⁸Bona, njia ohuhuboya emikoye ohaye ohukaluuhana weyalisire olwaande luundi, ohwoola lu endaalo ch'ohuseetwa hwao chahaweereho.

⁹“Bulaanu bukula engaano neende amabere masuungu, amaraagwe, neende eng'ooli ch'olaayo, neende obule, obikaandire alala, mani obite mu sifulya silala, obyuubbemo omugaati. Ebyo nibyo byonaalicheenge ohumala endaalo emia chidatu neende amahumi kataanu-na-kane (390) chooneyalisireenge hu muhono kwao mukaada.

¹⁰Ebyahulya byonalicheenge binakerweengwe. Binaabecheenge esituundu silala hu bituundu bitaanu by'ekilo; onaabilicheenge mu siha silala hu buli ludaalo.

¹¹Haandi amaachi konaang'wecheenge kosi kanaakerweenge, ebituundu bibiri hu bituundu bidatu by'elita, haandi onaakang'wecheenge ehabi lala buli ludaalo.

¹²Ebyohulya ebyo onabilicheenge nibyuubbirwe koti omugaati kwa amabere masuungu, haandi binaahubbirweengwe hu syooso sy'amafwi k'abaandu, onakuhubbeenge abaandu nibabona.”

¹³Ao Omwaami haandi yaboola ati: “Endyo nilwo lu Abaisiraeli bahalicheenge ebyohulya byaabwe bitali ebyoolerefu, nibali mu byaalo bi njia ohubasalaanisiramo.”

¹⁴Ao mani nimboola endi, “Haba, Omwaami Nasaae! Bona, ese omweene sisiiri ohwonoonaho daawe, olwohuba ohutula mubuyere bwaange ohwoola buti, sisiiri ohulyaho enyama y'esolo sifwiire esyeene, oba esiitirwe neende ebisolo byaasye, noomba ndaalyaho esiindu sy'omusiro.”

¹⁵Ao mani Omwaami niyamboolera ati, “Bona, bulaanu hufukiirira ohwehoonyera amasiingo k'eng'oombe mu bweyaango bw'ohwehoonyera esyoosyo sy'amafwi k'abaandu, sy'ochia ohuubbiraho omugaati kwao.”

¹⁶Haandi niyamboolera ati, “Ewe omwaana w'omuundu, njia ohuhendeesa ebyohulya mu Yerusalemu; abaandu banaalicheenge ebyohulya bikere haandi nibeyendehereere; haandi banaang'wecheenge amaachi makere nibali mu ngisa.

¹⁷Bahahaywe ebyohulya neende amaachi kohung'wa, mani baliingalaneho nibali mu ngisa, bibaheehere bang'ae hulw'ebyonoono byaabwe.”