Read saamia Esekeeli 43 Bible Online

Esekeeli 43 - saamia bible

Esekeeli 43

¹Ebyo nibiweere, omusaacha oyo yaanjira hu siruwa sy'ebukwe

²Mani bone, oluyaali lwa Nasaae wa Yisiraeli lweecha nilutulira ebukwe. Ekono lya Nasaae lyali koti ohuwoola hw'amaachi maangi; mani esyaalo nisimesa-mesa hulw'oluyaali lwae.

³Ohuboneherwa huno hwali koti ohwo hu ndanyoola, Nasaae niyeecha ohusihirisa esiko sya Yerusalemu, neende ohwo hu ndanyoola nindali hu genya ly'omwaalo kwa Kebbari. Ndakwa aasi hu loba mafumaame.

⁴Obulafu bw'oluyaali lw'Omwaami nibwiingira mu Nyuumba ya Nasaae, nibubitira mu siruwa syatingaala ebukwe.

⁵Mani Mwooyo w'Omwaami niyangiinga, niyandeeta mu lwaanyi lwomuukati. Nae bone, oluyaali lw'Omwaami nilwiichula Enyuumba ya Nasaae.

⁶Omusaacha oyo niyali n'asyeemere naange, ndawulira ekono ly'Omwaami naalomaloma naange naali mu Nyuumba ya Nasaae;

⁷yamboolera ati: “Ewe omwaana w'omuundu, buno nibwo obweyaango bw'esisaala syaange sy'obutuki. Njia ohumenya ano alala neende abaandu baange Abaisiraeli, haandi mbatuke endaalo choosi pe. Abaisiraeli alala neende abatuki baabwe haba sibacha ohunyaasa eliita lyaange lyoolerefu nibeenamira ebiloongaloongwe, oba nibeesa oluyaali mu milaambo ky'abatuki baabwe.

⁸Abatuki bageeng'a emiwaango neende emilyaango ky'amadooho kaabwe hu ndulo w'amakutu neende emilyaango ky'Enyuumba yaange, esida syoong'ene nisyo esyali nisitukabula Ese nabo. Banyaasa eliita lyaange lyoolerefu neende ebiindu by'emisiro bi bahola, sakira etima lyandiira mani nimbasihirisa.

⁹Bulaanu, lehe baakamire ao ohutaba abeesikwa, baakamire ao ohwiinamira ebiindu bitali Nasaae, haandi bamaleo ohwiisa oluyaalo mu milaambo ky'abatuki baabwe.”

¹⁰Omwaami haandi yemeeda ohumboolera ati, “Ewe omwaana w'omuundu,” “Boolera Abaisiraeli ebidiira hu nyuumba ya Nasaae, lehe babone koti lu yifwaana neende endekeha yao, mani lehe esoni chibadiire hulw'ebiholwa byaabwe bibi.

¹¹Nae esoni nichibadiira hulw'ebyonoono bi bahola, niwo y'oba obeekesere endekeha y'Enyuumba ya Nasaae neende koti lu yifwaana owohwiingirira neende owohutulira, neende koti lu yoosi yifwaana, neende amalako kayo koosi neende ebilagiro byao byoosi. Obaandiikire boosi babibone, mani banyale ohumanya koti lu Enyuumba ya Nasaae yoosi yitekeehwe, neende amalako kayo koosi, haandi babidiire bulai.

¹²Lino nilyo elako ly'Enyuumba ya Nasaae: abuundu woosi ayebodohaanie hu lugulu aakulu achia ohuba woolerefu. Bone, lino nilyo elako ly'Enyuumba ya Nasaae.”

¹³Bino nibyo ebipiimo by'alutaari, niwehoonyera esipiimo nasilala neende esyo sibapiimira Enyuumba ya Nasaae. Ohwebodoohania obwiihalo bw'alutaari, yoosi, waliwo omutaro kw'esetimiita amahumi kataanu obwooloberefu, neende esetimiita amahumi kataanu obutakalafu, nihuliho engata erwaanyi wakwo ey'esetimiita amahumi kabiri neende chitaanu.

¹⁴Esituundu sy'aasi sy'alutaari, ohutula hu ngata ohwoola hu bweeru bwaayo, yali emiita ndala. Esituundu siloondaho syali esetimiita amahumi kataanu ohwebodoohania, neende emiita chibiri obuleeyi. Esituundu siloondaho syosi syali esetimiita amahumi kataanu ohwebodoohania.

¹⁵Esituundu sy'emukulu, sibasaambiraho ebiyaanwa, syosi syali emiita chibiri obuleeyi. Alutaari yihoyeere ohubaaho enjika chine echiniina aakulu.

¹⁶Esituundu sy'aakulu w'alutaari syakanakana enyaande chao chine choosi, emiita chisaasaba obutakalafu.

¹⁷Esituundu sy'alutaari esy'akati syosi syali nisyakanilirira enyaande chasyo chine choosi, emiita chitaanu-na-chibiri buli lwaande. Syali neende engata y'erwaanyi, eyali esetimiita amahumi kabiri neende chitaanu obuleeyi. (Omutaro kwali esetimiita amahumi kataanu obutakalafu). Amadaara kaniina aakulu eyo, kali hu lwaande lwayo olw'ebukwe.

¹⁸Omusaacha oyo yamboolera ati, “Ewe omwaana w'omuundu, Omwaami Nasaae aboola ati: ‘Kano niko kahola hu alutaari, nibahoombahe alutaari ohuyaaniraangaho ebiyaanwa bisaambwa, neende ohunyusiraho amabaanga k'ebisolo biyaanirwe.

¹⁹Abalaamisi Abaleefi neende ab'olwiibulo lwa Sadoki, nibo boong'ene abanecheenge mu moni waange ohuhalaabanira. Ese, Omwaami Nasaae, ndusa elako lino. Onababecheenge esurusi ndaaga ohuyaana koti esiyaanwa hulw'ebyonoono.

²⁰Ochia ohubukulaanga amabaanga kayo, mani okata hu njika chine ech'alutaari, neende hu soonda chine ech'esituundu sy'akati esy'alutaari, neende hu ngata yebodoohania alutaari. Olwo nilwo lu ochia ohuyitereeseraanga mani oyiberesa ehabi.

²¹Haandi ohoyere ohubukulaanga esurusi yohuyaana hulw'ebyonoono, mani oyisaambira abuundu wadoolwao womu Nyuumba ya Nasaae, erwaanyi w'abuundu woolerefu.

²²Hu ludaalo luloondaho, wahayaane ehole eyitaaliho embala yoosi koti esiyaanwa sy'ebyonoono; mani alutaari yiba yicha ohulabiswa, koti lu yalabiswa neende esurusi.

²³Nooba noomalire ohuhola esyo, ohoyere oyaane esurusi ndaaga neende emiiku raaga, byoombi ebitaaliho embala, ohutula mu byaayo biindi.

²⁴Ochia ohubileeta mu moni w'Omwaami, omulaamisi ochia ohubyaanyusiraho omuunyu mani abiyaaneyo koti ebiyaanwa bisaambwa eyiri Omwaami.

²⁵Ohumala buli ndaalo chitaanu-na-chibiri, ochia ohutekehaanga buli ludaalo embusi yohuyaanayo hulw'ebyonoono, haandi banaatekeheenge esurusi yosi neende emiiku lyosi, ebitaaliho embala ohutula mu byaayo biindi.

²⁶Hulweembaka y'endaalo chitaanu-na-chibiri, abalaamisi banayaanireenge hu alutaari ebiyaanwa bisaambwa neende ebiyaanwa by'ohusaasania, mani baberese alutaari ehabi haandi baitekehe ohuyaaniraho ebiyaanwa haandi.

²⁷Endaalo chitaanu-na-chibiri ni chahawe, ohutula hu ludaalo lwa chitaanu-na-chidatu ohwemeeda mu moni, abalaamisi banayaanireenge hu alutaari ebiyaanwa byeeng'we bisaambwa, neende ebiyaanwa by'ohusaasania. Ao niwo yi njia ohubasaangaaliraanga. Ese Omwaami Nasaae, Niise olomaloome.”