Read saamia Esekeeli 47 Bible Online

Esekeeli 47 - saamia bible

Esekeeli 47

¹Omusaacho oyo yangobosayo hu mwiingira kw'Enyuumba ya Nasaae; nae bone, amaachi kali nikasoboha nikatulira aasi w'omwiingira w'Enyuumba ya Nasaae nikahulukusa nikachiira ebukwe (olwohuba Enyuumba ya Nasaae yali niyatingaala ebukwe). Amaachi kali nikahulukusa nikeehirira emwaalo hu lwaande lw'emwaalo lw'amwiingira ao, emwaalo w'alutaari.

²Omusaacha oyo niyaanjira erwaanyi w'Enyuumba ya Nasaae nihubitira mu siruwa sy'emukulu, niyambodoohania ohwoola hu siruwa sy'erwaanyi, esyo esyali nisyatingaala ebukwe. Niimbona amaachi kahulukusa nikatulira hu lwaande lw'emwaalo lw'esiruwa.

³Omusaacha oyo yakeenda n'achiira ebukwe naadiirire esikero mu muhono kwae. Yapiima emiita emia chitaanu (500) naachiira ebukwe, niyamboolera ohwaambuha amaachi. Amaachi ako kali nikaanjola sa hu bibboonge.

⁴Haandi yapiima emiita chiindi emia chitaanu (500), mani niyanyambusa amaachi, mani amaachi ako nikaanjola hu mahuumbo. Haandi yemeedayo ohupiima emiita chiindi emia chitaanu (500), yaanyambusa amaachi, mani amaachi ako nikaanjola mu sibuno.

⁵Haandi yapiima emiita chiindi emia chitaanu (500), mani nikuba omwaalo ku tahanyala ohwaambuha, olwohuba amaachi kakwo kali nikatumbire muno ka otahanyala ohwaambuha. Kali nikeeholere omwaalo kw'olusiba ku muundu asogamo, ku otahanyala ohwaambuhamo n'okeenda.

⁶Nihwoola ao omusaacha yandeeba ati, “Ewe omwaana w'omuundu, wehaliirise amahuwa kano bulai?” Omusaacha oyo haandi n'ayangobosayo hu ndulo w'omwaalo.

⁷Nae nindali ningobolayo, bone, ndabona endi, hu ndulo w'omwaalo okwo, hwaliho emisaala miingi muno hu buli lwaande.

⁸Mani niyamboolera ati, “Amaachi kano kahulukusa nikachiira ebukwe haandi nikeehirira mu hooho lya Yorodaani, mani nikachuha mu Nyaanja y'Omunyu. Nae nikoola mu Nyaanja y'Omunyu eyo, katereesaanga amaachi kayo k'omuunyu ako kaba amalai.

⁹Buli abuundu yi maachi ako kahulukusira, buli siindi silamu sikalimo, syahabe esilamu, haandi mwahabeemo eng'eeni nyiingi muno. Olwohuba amaachi kano kahulukusireyo, amaachi komu Nyaanja y'Omunyu ako kachia ohuba amalai. Buli abuundu yi mwaalo kuno kwahoole, buli siindu syahabecheenge esilamu.

¹⁰Abanaabi baheemeenge hu genya ly'enyaanja eyo, mani baaniha enjero chaabwe ohwooma. Ohutula Engedi ohwoola Enegulaimu, wahabeeo abuundu w'ohwaaniha enjero. Mwahabeemo eng'eeni nyiingi muno echa buli ngeri, koti echiri mu Nyaanja Hoongo ya Mediterania.

¹¹Nae amaachi komu bidiba neende akomu saa; kahadoong'eenge nikalimo omuunyu. Haba sikahooywe kaatereeswa daawe.

¹²Hu genya lw'omwaalo okwo, olwaande-n'olwaande, hwahamereho emisaala kya buli ngeri, ekyaamaho ebyaamo biriibwa. Amasaafu k'emisaala ekyo haba sikyahahoohe daawe, haandi sikyahaakameho ohwaamaho ebyaamo. Buli mwoosi, kyahaameengeho ebyaamo biyaaha, olwohuba amaachi kaking'weesa kahulukusaanga nikatula Abuundu Woolerefu. Ebyaamo byakyo byahabe ebyohulya, haandi amasaafu kaakyo kahabe amalesi kawonia.”

¹³Omwaami Nasaae aboola ati: “Chino nicho enjaho ch'esyaalo simwahakabaniemo enono ehumi-na-chibiri echa Yisiraeli. Enono ya Yosefu yahanyoole emikabo chibiri.

¹⁴Ndeechuba ohuberesa bakuuka yeeng'we esyaalo sino, musikabane nimwaakanirisa, mani sichia ohuba esyeeng'we.

¹⁵“Chino nicho echichia ohuba enjaho ch'esyaalo esyo: olwaaho lw'emukulu, lutula hu Nyaanja Hoongo, niluchiira Hetulooni, ohwoola hu mulyaango kwa Hamati, haandi ohwoola Sadadi.

¹⁶Lwahabite Bberoota, Sibbiraimu (esiri akatikaati w'olwaho lukabula obwaami bwa Damasiko neende obwa Hamati), mani luchie lwoole Hasaritatikooni, esiri hu lwaaho lwa Haurani.

¹⁷Olwaaho lw'emukulu, lwahatule hu Nyaanja Hoongo ya Mediterania, lwiiche lwoole Hasarenoni esiri ebukwe, hu lwaaho neende Damasiko, neende Hamati hu lwaande lw'emukulu. Luno nilwo olwaaho lw'emukulu.

¹⁸“Olwaaho lw'ebukwe luchia ohwihirira emwaalo, nilulutulira akatikaati wa Hasarenoni neende Damasiko, mani lwoole hu Mwaalo kwa Yorodaani, okukabula Gileadi hu lwaande lw'ebukwe neende esyaalo sya Yisiraeli hu lwaande lw'emuumbo, ohwoola Tamari, esiri hu Nyaanja y'Omunyu. Olwo nilwo olwaaho lw'ebukwe.

¹⁹“Olwaaho lw'emwaalo, lutula Tamari, mani nilwoola hu maachi ka Meribba, mani niluchia hu haalo hali hu lwaaho neende Misiri, ohwoola hu Nyaanja Hoongo ya Mediterania. Olwo nilwo olwaaho lw'emwaalo.

²⁰“Olwaaho lw'emuumbo lwahabe Enyaanja Hoongo ya Mediterania, ohutula hu lwaaho lw'emukulu, ohwoola abuundu atingaalire hu mulyaango kwa Hamati. Olwo nilwo olwaaho lw'emuumbo.

²¹“Mwahakabane esyaalo sino mu njia cheeng'we.

²²Mwahakabane esyaalo sino nimuhubba eha, sibe esyeeng'we sy'olwibulano, neende walukeenda babamenyamo, haandi abeebuliire mweeng'we abaana, bosi bahoyere ohunyoola omukabo nimukabana esyaalo ohweema hu nono cha Yisiraeli. Abo bahabalwe koti abeebulanwa ba Yisiraeli badyeeri, haandi bahakabanire alala naang'we mu nono cha Yisiraeli.

²³Mu nono yi walukeenda yahabeemo, omwo nimwo mumwahamubeereenge omukabo kw'eloba lyae. Nilwo lu Ese Omwaami Nasaae, mboolere.”