Read saamia Esekeeli 6 Bible Online

Esekeeli 6 - saamia bible

Esekeeli 6

¹Omwaami yamboolera ati:

²“Ewe omwaana w'omuundu, tingaale ena ngulu cha Yisiraeli, ochiyaalire emboosi yaange,

³mani ochiboolere oti, ‘Eng'we engulu cha Yisiraeli, tekeerese emboosi ch'Omwaami Nasaae! Omwaami Nasaae aboolera engulu neende ebigulu, emyaalo neende ehooho ati; Bone, Ese, Ese mweene njia ohuleeta ebiita, mani nyaase buli abuundu yi mwaberesa oluyaali, yi baandu beenamiraangamo ebiloongaloongwe.

⁴Alutaari cheeng'we chahalehwe ao bihaya, neende alutaari cheeng'we ch'ohuniooheseraho obubbaani chahalikulwe. Abaandu beeng'we baheetwe, ndahabasukune mu moni w'alutaari ch'ebiloongaloongwe bibeenamira.

⁵Ndahasalaanie emilaambo ky'Abaisiraeli mu moni w'ebifwaanani byaabwe; haandi ndahasalaanie amakuumba kaabwe ohwebodoohania alutaari chaabwe.

⁶Woosi-woosi yi Abaisiraeli bamenyaanga, ebiko byaabwe byahasihirire, Abuundu Woolerefu yi beenamiraanga byahalehwe ao bihaya. Alutaari chaabwe chifunakwe mani chisihiriswe, alutaari chaabwe ch'ohuniooheseraho obubbaani chahalikulwe, haandi ebiloongaloongwe byoosi bi bahola byahamalirweo elalira.

⁷Abaandu baheetwe balikwa akatikaati weeng'we, mani hu mumanye muti Niise Omwaami.’

⁸“Nae ndahaleheo abaandi hweeng'we nibali abalamu. Abo abahabe nibawonereo mu biita, mani nimwahasalaanire mu byaalo koti ababoye,

⁹mani eng'we abahabe nibawonereo, bahanjichulise nibali eyomu byaalo bi bayirwamo mu buwaambe. Bahamanye koti lu ndafunaka-funaka emyooyo kyaabwe kitaali emyeesikwa, ekyaandulaho, neende emoni chaabwe chaofula echakera nibakaluuhanira eyiri ebiloongaloongwe byaabwe nibabiinamira nibaandulaho. Abeene baheebwaabe nibabweene ebyonoono bi bahola, neende eby'omusiro byaabwe byoosi.

¹⁰Bahamanye bati Niise Omwaami, haandi bati haba sindabatiisa-tiisaanga sa nimboola endi njia ohubaholaho esibi.”

¹¹Omwaami Nasaae aboola ati: “Hubbe amayu, haandi hubbe embiindo, mani muboole muti; katunyoole hulw'ebyonoono byoosi neende eby'omusiro byoosi bi Abaisiraeli bahola. Olwohuba bachia ohwiitirwa mu biita, balifwa enjala, neende amalwaae.

¹²Abo abali eyale, bachia ohulwaala bafwe; nae abo abali aambi baheeterwe mu biita; nae abo abahadoong'eo, balifwa enjala. Eyo niyo engeri yi njia ohubamaliraho etima lyaange.

¹³Emilaambo ky'abaheetwe, nikyahabe nikilaambaalire akatikaati w'ebiloongaloongwe byaabwe, nikyebodohaanie alutaari chaabwe, hu buli bigulu bileeyi, neende aakulu w'engulu, neende aasi wa buli musaala muhoongo kuliho amasaafu, neende aasi w'omutuumba muhoongo, buli abuundu yibayaaniraangao ebiyaanwa bisaambwa eyiri ebiloongaloongwe bi beenamiraanga byoosi, ao niwo yibahamanyire bati Niise Omwaami.

¹⁴Mani ndahasiingise omuhono kwaange ohubalwaania, ndoondobanie esyaalo syaabwe si bamenyamo, sihole sibe ekuunda, ohutulira elalira hu siparara ohwoola Ribbila. Ao niwo yibahamanyire bati Niise Omwaami.”