Read saamia Esekeeli 9 Bible Online

Esekeeli 9 - saamia bible

Esekeeli 9

¹Ao mani nimbulira Omwaami n'alomalomera mu kono ly'aakulu, n'aboola ati: “Musude aambi eng'we abachia ohusaandya esiko. Buli muundu yeeche n'adiirire mu muhono esilwaaniso syae.”

²Mani bone, abasaacha basaasaba nibatulira olwaande lw'esiruwa sy'emukulu, esyatingaala emukulu. Beecha buli muundu n'adiirire esilwaaniso syae esy'ohwiita. Mwaabo mweecheramo omusaacha yefwaalire engubo ndafu, n'akiingire muumbafu wae esyohwandiikira. Beengira mani nibeema hu ndulo w'alutaari y'omugasa.

³Bulaanu, oluyaali lwa Nasaae wa Yisiraeli lwali nilutulire aakulu w'abakerubbi yi lwali niluli, niluchia hu mulyaango kw'Enyuumba ya Nasaae. Omwaami yalaanga omusaacha wali niyefwaalire engubo ndafu, owali nakingiire muumbafu wae esyohwandiikira.

⁴Omwaami yamuboolera ati, “Chia obitire mu siko, obitire mu Yerusalemu, mani ote ahalolero mu bweeni bw'abaandu bali mu ngisa haandi abalira hulwa eby'emisiro byoosi byaholerwa mu siko esyo.”

⁵Haandi eyiri abaandi, Omwaami yababoolera nimbulira ati: “Eng'we mubite mu siko nimumuloondaho enyuma, mani mwiite abaandu. Mutalehao omuundu kata mulala, haandi mutakwiiraho esisa omuundu kata mulala.

⁶Mwiite abasaacha bakofu, abaana baraaga, abahaana baraaga, abaana bayere neende abahasi. Nae mutaholaho esyonoono hu muundu yeesi oliho ahalolero hu bweeni. Mani muchaakire Abuundu Woolerefu waange.” Ao mani nibachaakira hu bakofu abali nibeemere mu moni w'Enyuumba ya Nasaae.

⁷Nasaae haandi yababoolera ati: “Munyaase Enyuumba ya Nasaae eyo, mani mwiichuse olwaanyi lwayo emilaambo ky'abaandu beeterwe.” Ao mani nibachia, nibeeta abaandu mu siko.

⁸Nibali nibeeta, nae ese nindoong'ere ao syeeng'ene, ndakwa hu loba mafumaame, mani nihubba wuuwi, nindeeba endi, “Aaa, ewe Omwaami Nasaae! olw'etima lyoli nalyo, onaasihirise Abaisiraeli badoong'ereo, obamaleo?”

⁹Nae Omwaami niyaangobolamo ati, “Ebyonoono by'esyaalo sya Yisiraeli neende Buyudaaya bibitiriire obuungi! Esyaalo sichuulemo amabaanga k'abaandu batemuulwe, haandi esiko sichuulemo obutaali obwadyeeri. Olwohuba baboola bati, ‘Omwaami yebwaabire esyaalo, mani haba s'abona bi bahola.’

¹⁰Mani sakira syesi haba siinjia ohubaleha daawe, noomba ohubakwiira esisa. Nae njia ohubahola esyo sibahola abaandu baandi.”

¹¹Nae bone, omusaacha wali niyefwaalire engubo ndafu, naali neende esyohwandiikira muumbafu wae, yakobola neende omulaanga, n'aboola ati: “Holere koti lu wundagiire.”