Read saamia Danieli 10 Bible Online

Danieli 10 - saamia bible

Danieli 10

¹Mu mwaaka kwohudatu okw'obutuki bwa Sairasi, omutuki wa Perisia, omulaanga mani nikubonehera Danieli, owali niwakulihwa eliita mbwe Bbelitesaasa. Ohubwiihulirwa ohwo hwali ohwadyeeri, haandi ohudinyu muno ohumanya. Mani Danieli n'amanya amahuluundu kakwo muhuboneherwa.

²Mu ndaalo echo, ese Danieli ndamala ejuma chidatu nindira.

³Haba sindalyaaho ebyohulya bilai, haba sindahoombaho enyama yoosi oba esyohung'wa syoosi. Haandi sindebahaho amafuta omualira elalira ejuma chidatu echo choosi.

⁴Nae hu ludaalo lw'amahumi kabiri-na-hane, olw'omwoosi kutaangira, ndali ninyemere hu ndulo w'omwaalo muhoongo kwa Tigiriisi.

⁵Mani nindasiingisa emoni, mani bone, ndabona omusaacha yefwaalire engubo ndafu, niyeeboyere mu sibuno olusibiro lw'esaabbu ndai muno ey'e Wufaasi.

⁶Omubiri kwae kwali nikumesya-mesya koti ekina ly'engaanga y'aakulu muno. Obweeni bwae bwali nibumesya-mesya koti olumesyu, haandi emoni chae chali nichaaduha koti omuliro. Amahono kae neende amakulu kae, byali koti esihomo sirudirwe. Haandi naalomaloma, ekono lya lyali koti ely'abaandu baangi muno.

⁷Mani ese, Danieli, niise syeeng'ene owabona ohuboneherwa ohwo. Abaandu bali naange, sibulao esiindu sibabona daawe, ohumalaho batya muno, mani nibeyiruhira ohwekisa.

⁸Mani nidoong'ao syeeng'ene, nindewuunja eby'amayia by'amaani bi ndabona muhuboneherwa. Efwaani yaange niyikaluuhanira elalira. Mani omuundu wubona yeesi haba saanyala mumanyirisa daawe. Mani nibweeramo elalira amaani.

⁹Mani nimbulira ekono lyae nililomaloma, nae nindawulira ekono lyae nililomaloma, ndaakwa hu loba mafumaame.

¹⁰Mani bone, omuhono kwandiiraho, ao amahono kali nikateengereha mani nisigama aasi.

¹¹Mani n'amboolera ati: “Ewe Danieli, omuundu oheerwa muno, tekeeresa bulai muno emboosi chi ndi ohuhuboolera, mani siingira weeme tiiri. Olwohuba ndumirwe yooli.” Niyali naasilomalomaanga naange, mani nisiingira ninyema, nisiteengereha.

¹²Ao mani n'amboolera ati: “Danieli, leha ohutya, olwohuba otulira elalira hu ludaalo lu wachaakiraho ohutekeha ebibaaso byao ohumanya amahuluundu, haandi omweene niweloongoyasa mu moni wa Nasaae wao, Nasaae yawulira ohusaba hwao, mani sakira njichire yooli.”

¹³Nae omuhuluundu w'obutuki bwa Perisia yamala endaalo amahumi kabiri neende lulala niyanyiinganianga. Nae, Mikaeli, mulala hu bamalaika bahuluundu, yeecha mani yahoonya. Mani nimuleha ao neende omuhuluundu w'obutuki bwa Perisia.

¹⁴Mani bulaanu njichire ohuhuboolera omanye ebyahakwe hu baandu bao mu ndaalo chichiaayo. Olwohuba ebiindu bi wabona muhuboneherwa, by'endaalo chichiaayo.

¹⁵Niyamala ohumboolera emboosi echo, ndatingaala aasi mani nibihaya ohulomaloma.

¹⁶Nae bone, Oyo ofwaanana neende omwaana w'omuundu n'adiira hu munwa kwaange, mani ninjasama ninjaaka ohulomaloma. Mani nimboolera oyo owali niyeemera mu moni waange endi: “Ewe Omwaami waange, ohuboneherwa huno hundeteere ohweyendeherera huungi muno. Mani amaani kambwereeremo elalira.

¹⁷Ndi koti omuhalaabani muwaambe. Nyale endye ohulomaloma naawe, Omwaami waange? Olwohuba bulaanu amaani kambweeremo, haandi omuuya kuumbweeremo.”

¹⁸Haandi oyo owali nafwaanana koti omuundu yandiraho mani n'angalusamo amaani.

¹⁹Mani n'amboolera ati: “Ewe, omuundu owaheerwa muno, otatya daawe. Omuleembe kube naawe. Kobolamo amaani mani ogume.” Nae niyalomaloma naange atyo, mani ningobolamo amaani nimboola endi: “Omwaami waange, lomaloma, olwohuba wungobosemo amaani.”

²⁰Mani n'ateeba ati: “Omanyire esikerere ninjicha yooli? Njia ohukobolayo ohulwaania omuhuluundu wa Perisia.” Mani nindahamale ohumulwaania, ao ni omuhuluundu wa Bugiriki naamala yeecha.

²¹Nae njia ohuhuboolera ebyandiikwa mu sitabo sy'obwadyeeri. Abulao owuundi owahoonyaho ohubalwaania, ohumalaho Mikaeli, malaika omuliindi wa Yisiraeli.