Read saamia Danieli 7 Bible Online

Danieli 7 - saamia bible

Danieli 7

¹Mu mwaaka kutaangira okw'obutuki bw'omutuki Bbelisasa, omutuki wa Bbabbilooni, ese Danieli nindoota esilooto mani ndaaboneherwa mu siro esyo, nindeyaliise mu sitaanda syaange. Mani ninyaandiika esilooto esyo, mani ninganiaaya ebiindu bi ndabona.

²Ndakaniaaya endi: “Muhuboneherwa hwaange esiro, mani bone, ndabona omuyaka nikudiirire enyaande chine echohu kulu nikuyiisa enyaanja hoongo.”

³Mani ebisolo bine bihoongo nibituumbuha nibitula mu nyaanja, buli situlayo nisitafwaanana neende esyaasye.

⁴Esisolo syataangira syali nisifwaana koti edalang'i, nae syali neende embaya koti ech'eeswi. Nae nindatingaala, mani embaya chaasyo nichimanyulwaho. Mani nisiniiniswa ohutula hu loba mani nisyeema hu makulu kabiri koti omuundu; nisibereswa ebibaaso koti eby'omuundu.

⁵Nae bone, esisolo siindi, esyali nisifwaanana koti elyaaka. Syali nisyasingiswa hu lwaande lulala. Syali neende embafu chidatu muhanwa wasyo, nichiyaandire mu meeno kasyo. Mani nibasiboolera bati, “Siingira, mani olye enyama nyiingi.”

⁶Nindali nitingaala, nae bone, nimbona esisolo siindi esifwaana koti eengwe, nae hu mukoongo kwasyo hwaliho embaya chine koti ech'eyoni; haandi esisolo esyo syali neende emitwe kine. Mani esisolo syo nisibereswa obunyala bw'ohutuka.

⁷Nae bino nibyaawa, mani muhuboneherwa hwomu siro, nae bone, mani nimbona esisolo syohune, esitiisa muno haandi esyalaba muno haandi esy'amaani maangi muno. Syali neende ameeno mahoongo haandi ak'ebibya. Syalichaanga haandi nisimenena buli siindu sisyabukanaanga. Mani nisisenakiriraanga mu makulu kasyo buli siindi syali nisidoong'ereo. Haandi esisolo sino syali nisitafwaanana neende ebisolo byoosi ebyasitaangirira ohuboneha. Haandi syali neende enjika ehumi.

⁸Nae nindali nisitingaalaanga, nae bone, mani nimbona olwiika luundi ludiidi nilumera. Mani niliiyamo enjika chidatu chiindi. Nae bone, mu lwiika luno, mwalimo emoni koti ech'omuundu, neende omunwa kulomaloma ebiindu bihunuufu.

⁹Nindali nisitingaalaanga, mani nimbona ebisaala by'obutuki nibiteerweo. Oyo owaliwo ohutula hale-na-haandi mani niyehala hu sisaala silala. Ebyefwaalo byae bali nibyalafuya koti enyaange, haandi embuchi chohu mutwe nichalafuya koti epaamba. Esisaala sy'obutuki syae nisimyeesuha-myeesuha enjeserye ch'omuliro, haandi emikuruduumu ch'esisaala esyo chali omuliro kwaaduha.

¹⁰Mani omwaalo kw'omuliro nikuhulukusa nikutula yaali. Mani mu moni wae waliwo abaandu elifu neende elifu abamuhalaabaniraanga, haandi elifu ehumi amahabi elifu ehumi nibeemere mu moni wae. Ao mani omusaango nikuchaaka ohuwulirwa, mani ebitabo nibikulwao.

¹¹Nindali nisitingaalaanga, mani nimbulira ekono ly'emboosi ch'ohweniinia neende ohwesuunga chi lwiika ludiidi lwali nilulomaloma. Mani nindatingaala, esisolo syohune nisiitwa, mani omulaambo kwasyo nikusihiriswa nikusukunwa mu muliro kusaambwa.

¹²Nae ebisolo bidoong'ereo, obunyala bwaabyo bwatusibwao, nae nibifukiirirwa ohudoong'a nibiri ebilamu ebiha biheengerweo.

¹³Muhubonehera hu ndanyoola mu esiro, ndabona esiindu sifwaana koti omwaana w'omuundu niyeehera hu bireesi byomu kulu, mani niyeecha eyiri Oyo Owaliwo ohutula hale-na-haandi, mani nibamumanyisa mu moni wae.

¹⁴Owafwaanana koti omwaana w'omuundu oyo, mani nibamuba obunyala neende oluyaali, neende obutuki, hu baandu b'oluyia lwoosi, neende abomu byaalo byoosi, neende ab'enimi choosi banyale ohumuhalaabanira. Obunyala bwae, bunyala bw'endaalo choosi, obutahakame daawe, haandi obutuki bwae obwo haba si bwohusihiriswa daawe.

¹⁵“Mani ese Danieli, nindeyendeherera muno mu mwooyo kwaange, hulw'ebiindu bi ndabona muhuboneherwa, mani ndatya muno.”

¹⁶Mani ndasuda aambi neende mulala hu abo abali nibeemere ao, mani nimuteeba esyadyeeri sidiira hu biindu ebyo byoosi. Mani naamboolera, haandi naanjekesa amahuluundu k'ebiindu ebyo.

¹⁷Mani n'aboola ati: “Ebisolo bihoongo bine ebyo, nibo abatuki bane abahabeeo hu syaalo.

¹⁸Nae aboolerefu ba Oyo Ow'Aakulu Muno, bahanyoole obutuki, mani buchia ohuba obwaabwe endaalo choosi.”

¹⁹Mani nindekoomba ohumanya obwadyeeri budiira hu sisolo syohune, esyali nisikabuhana neende ebyaasye biindi, haandi esyali nisitiisa muno, ameeno k'esisolo esyo kali ak'ebibya haandi amadete kasyo kali ak'esihomo; syalichaanga haandi syafunaka-funakaangamo buli siindu sisyanyoolaanga, haandi nisisenakira mu makulu kasyo buli siindu syadoongaangao.

²⁰Haandi mani nindaha ohumanya ebidiira hu njika ehumi, echali hu mutwe kwasyo, neende hu lwiika luundi olwamera mani nilubboongolaho enjika chiindi chidatu. Olwo nilwo olwiika lwaliho emoni neende omunwa kwalomalomaanga emboosi huluundu ech'ohweniinia, haandi olwabonehana ohuba olwomiifu ohuhiraho enjika chaasye.

²¹ “Nindali nisitingaalaanga, mani olwiika olwo niluchaaka ebiita neende aboolerefu ba Nasaae, mani nilubayiingira,

²² ohwoola lu Oyo Owaliwo Endaalo choosi yeechia, mani n'aheengera bulai omusaango aboolerefu ba Oyo Ow'Aakulu Muno, mani ebiha nibyoola aboolerefu nibanyoola obutuki.”

²³Mani Oyo Owaliwo Endaalo choosi naamboolera amahuluundu kasyo ati: Esisolo syohune, bwahabeeo obutuki bwohune hu syaalo, obwahakabuhane hu butuki buundi bwoosi, haandi bwahalye esyaalo syoosi, mani bwasiseenakira, haandi bwasifunakafunakamo mu bituundu-tuundu.

²⁴Nae enjika ehumi, chitula mu butuki buno, nibo abatuki ehumi abahatuleo, mani yiritulao omutuki wuundi; owahakabuhane neende abatuki bamutaangira, mani yahamaleo abatuki badatu.

²⁵ Yahalomalome bubi hu Oyo ow'Aakulu Muno, haandi yahafwiinyirire aboolerefu ba Oyo ow'Aakulu Muno. Mani yahateemeho ohukaluuhania ebidyaalo by'endaalo huluundu neende amalako k'ediini. Mani yahatuke aboolerefu abo hulw'embaka ndala, hulw'embaka chibiri, neende esituundu sy'embaka.

²⁶Nae esiina syaheehaswe ohuheenga omusaango, mani obunyala bwae bwahamumalweho, ohubwao neende ohusihiriswa elalira.

²⁷Mani Obwaami neende obunyala neende oluyaali lw'obutuki bwoosi obuli hu syaalo bwahabereswe aboolerefu b'Oyo ow'Aakulu Muno. Mani obutuki bwaabwe buliba obw'endaalo choosi, haandi ab'obunyala boosi bahamuhalaabanire haandi bamuwulira.

²⁸“Ao mani niyo yi mboosi chine chaakama. Nae ese Danieli, ebibaaso byaange byakera ndaatya muno, mani efwaani yaange niyikaluuhana. Nae nimbiiha emboosi echomu mwooyo kwaange.”