Read saamia Hosea 5 Bible Online

Hosea 5 - saamia bible

Hosea 5

¹“Tekeerese hu kano, eng'we abalaamisi! Mwehalirise, eng'we abaandu ba Yisiraeli! Tekeerese, eng'we abomu lwaanyi lutuki! Eng'we muhoyere ohuhengaanga emisaango neende obwadyeeri mani omusaango kuchia ohubakwaaho! Eng'we mumalire ohweehola omuteego kuli mu Misipa, haandi olweero lwabaambulwa hu Lugulu lwa Taboori,

²haandi obuko bwooloberera muno obuli mu Siko Akasia; mani ese njia ohubasaandya sa eng'we mweesi.

³Ese manyire bulai bweene koti Yisiraeli yifwaana haba saanyala ohundeekisaho daawe. Yali otaali omweesikwa, mani abaandu bae haba sibayera ohunyinamiraanga daawe.”

⁴Ebyonoono bi baandu bahola, bibakairaanga ohukobola eyiri Nasaae waabwe. Ohwiinamiraanga ebiloongaloongwe hwabadiira neende amaani maangi muno, mani haba sibanyala ohumanya Omwaami daawe.

⁵Ohudyaabuha hw'abaandu ba Yisiraeli, ohweene hubalira-bulira. Ebyonoono byaabwe nibyo ebikera nibeegumula mani nibakwa, haandi abaandu ba Yuda bosi nibeemao nibakwiira aasi alala nabo.

⁶Babukulaanga amakoondi kaabwe abeene, haandi neende eng'oombe chaabwe abeene, ohuchia nibabiyaanayo koti ebiyaanwa eyiri Omwaami, nae byaahayaho esiindu syoosi esilai sibanyoolamo daawe. Haba sibanyala ohumwakaana daawe, olwohuba oyo yamala ohubatulaho hale bweene.

⁷Bali abataali abeesikwa eyiri Omwaami; mani abaana baabwe haba sibamwebaliraho daawe. Mani sakira bulaanu, abeene abo alala neende amaloba kaabwe, bachia ohusihiriswa bwaangu buno.

⁸Hubbira olwiika lw'ebiita mu Gibbeya! Lisira eturumbete mu Rama! Yayulira aakulu oluwuungu lw'ebiita mu Bbetafeeni! Muweere mu hulwaana, eng'we abasaacha ba Bbenjamini!

⁹Oludaalo lw'ohusaandisibwa luli ohwiicha, mani Yisiraeli yinyaaswe. Eng'we abaandu ba Yisiraeli, sino ohwoola sikweeo!

¹⁰Omwaami aboola ati, “Ese ndi omunyoolefu olwohuba abeemirisi ba Yuda baseetere Yisiraeli mani baamala baamuyaayaho eloba. Mani sakira ese njia ohubabbwomoolaho esibonereso koti amaachi k'ofwomboole.

¹¹Yisiraeli ali ohusaanda ohweema hu hufwiinyirirwa; amalire ohung'uulwa eloba elyali elyaabwe lyeene libahoyera, olwohuba yahaira hu hukoonya obuhoonyi ohutula hu abo abataali neende obuhoonyi bu banyala ohubaberesa daawe.

¹²Mani ese njia ohuleeta omunyaahano hu Yisiraeli neende ohunyaasibwa eyiri abaandu ba Yuda.

¹³“Mani Yisiraeli niyeecha yaabona ohulwaala huyali naali nahwo, haandi Yuda yesi niyeecha yaabona amakoonjo kae omweene, mani Yisiraeli yeecha yaachia Asiria ohusaba omutuki muhunuufu oyo obuhoonyi, nae yaahaya ohunyala ohubawonia daawe, kata sa ohunyala ohuwonia amakoonjo kaabwe.

¹⁴Ese mani njia ohuseeta abaandu ba Yisiraeli neende Yuda koti edalang'i. Ese mweene njia ohubabosyoolamo ebituundu-tuundu mani male mbalehe endyo. Niimba niinjia ohubahuruudya mbamaleyo, abulao oyo yeesi ochia ohunyala ohubawonia daawe.

¹⁵“Ese njia ohujwaang'a abaandu baange, ohwoola lu balinyala ohusaanda ebiyeraana neende ebyonoono byaabwe, mani bachaaka ohwichaanga nibaangoonya abeene. Awuundi, mu husaanda hwaabwe ohwo, bachia ohunyala ohuteemaho ohungoonyaanga.”