Read saamia Hosea 9 Bible Online

Hosea 9 - saamia bible

Hosea 9

¹Eng'we abaandu ba Yisiraeli, lehere ao ohuhusaanga ebidyaalo koti abakafiiri bahola. Eng'we mwamala ohukaluuhana ohutula hu Nasaae weeng'we, mani mwamala ohweehola abataali abeesikwa yaali. Hu syaalo huno hwoosi, eng'we mwandeemalaho nimweekusa koti abadaamba eyiri nasaae Bbaali, haandi mwamala ohuheerana neende emere yi mwabaasaanga muti niyo yi yabakulaanga!

²Nae esiha syeene esyo, eng'we haba simuchia ohunyala ohunyolaanga emere yimala neende amafuta k'enaasi akamala daawe, haandi siyichia ohuba ni yisiiri hooyo amalwa koosi kata nabudiidi.

³Abaandu ba Yisiraeli haba sibachia ohudoong'a nibali mu mahono k'Omwaami daawe, nae bachia ohwoola bakoboleho haandi Misiri, mani haandi boole baliicheenge ebyohulya byakaanwa mu Asiria.

⁴Mani nimusisiiri mu byaalo bikeni ebyo, haba sibachia ohuba nibanyala oyanaanga ebiyaanwa by'amalwa eyiri Omwaami oba ohuleetaanga ebiyaanwa byaabwe yaali. Ebyohulya byaabwe bichia ohubechaanga nibinyala ohubahaanga omukwoobo buli muundu obiryaaho, koti ebyohulya biriibwaanga mu masika. Bicha ohuba nibyehoonyerwaanga ohwiikusaanga enda chaabwe; abulao kata silala hu byohulya ebyo esichia ohuba nisinyala ohuyiribwaanga mu nyuumba y'Omwaami.

⁵Mani esiha nisichia ohwoola esy'ebidyaalo byateebwao ohwisaanga oluyaali mu Omwaami, baba bachia ohubihola batye?

⁶Obudinyu nibwahakweeo mani abaandu basalaana, Abamisiri nibo abachia ohunyala ohubabuusa alala ohubabuusa basiihwe mu Mefisi! Obunyali bwaabwe bw'efeesa, neende abuundu yi madaala kaabwe kali nikali, achia ohuba niyamala ohufuunihwa neende esiino, haandi neende ebichaha by'amawa.

⁷Esiha sy'esibonereso mbano simalire ohwoola, esiha si baandu bachia ohunyooleramo ebyo ebibahoyera. Mani esyo nisichia ohumala ohubaao, ao niwo yi Yisiraeli yichia ohusimanyira! “Omunabbi wuno,” mbwe eng'we muboolaanga, “musiru niye. Omusaacha olimo omwooyo wuno mulalu niye.” Abaandu eng'we mwasyuula hale, olwohuba mbwe ebyonoono byeeng'we bihunuufu muno.

⁸Nasaae yaanduma koti omunabbi, ohulabula Yisiraeli, abaandu bae. Kata katyo, buli yi njiira, mutemaangaho ohuundeka koti eyoni. Kata neende mu Nyuumba ya Nasaae bweene, abaandu boosi basuku b'omunabbi wuno.

⁹Badinyu babi muno mu buli siindu sibahola, koti sa lu bali nibali mu Gibbeya. Nasaae achia ohwoola yeechulise ebyonoono byaabwe, mani abasaandye hulw'ebyeene ebyo.

¹⁰Omwaami aboola ati, “Nindataangira ohunyoola Yisiraeli, ndali koti onyoolere enduli chahulira mu siparara. Yindachaakira ohubonanaanga neende bakuukaao, byali koti oyo oli ohubonaanga enduli cheengere chichaaka enoka. Nae nibeecha boola hu Lugulu Peyori, bachaakaniramo ohwiinamiraanga Bbaali mani bwaangu bweene obwo, beecha beehola baaba abasinyisa koti banasaae ba bali nibaheera.

¹¹Abahunuufu ba Yisiraeli bachia ohubburuha baweeo koti eyoni, mani eyo yihaeyo ohubaao omwaana yeesi obebulwamo, yaahaya ohubaayo omuhasi yeesi oyeraho enda, haandi yaahaya ohubaayo omwaana yeesi oyerwa daawe.

¹²Nae kata nibiba mbwe banyalaho ohuhusaho abaana, ese mba njia ohubanyuula mbatuseo, mani abuleo oyo yeesi odoong'a naali omulamu. Ese niinjia ohujwaang'a abaandu bano, ebiindu by'amatiichasi nibyo ebiba nibichia ohubeeholehaho.”

¹³Omwaami, ese mbano nyala ohubonaho abaandu baabwe, nibali ohuyiimwa mani beetwe.

¹⁴Siindu siina syeene siimba sihoyeere ohuhusaba oholere abaandu bano boosi? Ewe kuumbya sa abahasi baabwe! Bahole babe abatahanyala ohuleraangaho abaana baabwe!

¹⁵Omwaami aboola ati, “Obuholi bw'ebibi bwaabwe bachaakira mu Giligaali. Eyo niyo yi ese ndachaakira ohubasyuulaanga. Mani ohweema hu bibi bi bali nibaholaanga, ese njia ohubeerusa batule mu loba lyaange. Ese haba siinjia ohwemeeda ohubaheeraanga haandi daawe; olwohuba abeemirisi baabwe boosi bamala ohunjeemera.

¹⁶Abaandu ba Yisiraeli bano bali koti esimera si misi kyasyo kyamala ohufwa, mani ekitanyala ohwaamaho esyaamo syoosi daawe. Haba sibachia ohunyala ohubaaho neende abaana daawe, nae kata neende nibaba nibanyala ohubaaho neende abaana, ese mba njia ohwiita abaana abo abakoosi baabwe muno.”

¹⁷Nasaae oyo yi ese halaabaniraanga achia ohujwaang'a abaandu bae, olwohuba bahaya ohumuwulira daawe. Bachia ohweehola abang'aabani mu byaalo ebyo.