Read saamia Yoeli 1 Bible Online

Yoeli 1 - saamia bible

Yoeli 1

¹Chino nicho emboosi chi Omwaami yaberesa Yoeli, omwaana wa Petueli.

²Wulire sino, eng'we abasaacha bakofu, tekeerese, eng'we mweesi abali mu Buyudaaya! Esiindu siri siti syali nisibeereo hooho mu ndaalo cheeng'we, oba mu ndaalo cha bakuuka yeeng'we?

³Boolereho abaana beeng'we, haandi lehe bosi basiboolereho abaana baabwe, haandi abaana baabwe basiboolereho olwiibulo luloondaho.

⁴Bi esike chiheenga chalehao, esike chibburuha chalya. Bi esike chibburuha chalehao, esike chiduumakala chalya, haandi bi esike chiduumakala chalehao, esike chisihirisa chaalya.

⁵Eng'we abameesi, simuhe, mani mulire amasika; eng'we abang'wi b'amalwa mweesi, chereenjese, olwohuba emisabbiibbu kioonyuhwamo amalwa kanyunyuula, kisihiriiswe.

⁶Olwohuba eye ly'esike liseetere esyaalo syaange; esike ch'amaani muno haandi sichibaliha daawe. Ameeno kachio kali koti ak'edalang'i, haandi mooki koti ak'edalang'i ehasi.

⁷Chisihiriise emisabbiibbu kyaange, haandi chisyeere emisaala kyaange ky'emituli, chikyoobuuleho amoola kakyo mani kyaakwa aasi; amasaga kadoong'ere nikalafuuye.

⁸Lire koti omuhaana weboyere ebigunia n'alira omusaacha y'abeere achia ohudeehera.

⁹Abalaamisi, mulire, eng'we abahalaabanira Omwaami. Olwohuba ebiyaanwa by'emere neende eby'ohung'wa haba sibisisiiri mu nyuumba y'Omwaami.

¹⁰Emikuunda kidoong'ere ebihaya, esyaalo siwuungire. Olwohuba engaano yisihiriiswe, emisabbiibbu kyoomere, emituli chihoohere.

¹¹Eng'we abalimi, mweyendeherere, eng'we abaheheta emisabbiibbu, lire. Olwohuba engaano neende amabere masuungu; neende ebyo byoosi ebikeswa, bisihiriiswe.

¹²Emisabbiibbu kyooma, emituli kihooha. Epomeguranaate, enaasi, neende amapeera, neende emisaala kyoosi eky'ebyaamo, kyoomere. Mani esangaalo libulao mu baandu.

¹³Eng'we abalaamisi, mweeboye ebigunia mani mulire, Eng'we abahalaabanira hu alutaari, chereenjese. Mwiingire mu nyuumba y'Omwaami, mani mweeyalise nimweboyere ebigunia, Eng'we abahalaabani ba Nasaae waange. Olwohuba ebiyaanwa by'emere neende ebiyaanwa by'ohung'wa haba sibisileetwa mu nyuumba ya Nasaae weeng'we.

¹⁴Laangirire ohusiiba, mulaange omuhung'ano mwoolerefu. Buuse alala abeemirisi neende abaandu boosi abomu Buyudaaya. Lehe beeche mu nyuumba y'Omwaami Nasaae weeng'we; mani mulirire Omwaami Nasaae weeng'we.

¹⁵Oludaalo lw'Omwaami luli aambi ohwoola, olwo nilwo lu Omwaami, omunyala w'ebiindu byoosi, alileeteraho ohusihirira. Oludaalo olwo lwahabe olutiisa muno.

¹⁶Emere yeefwe yisihiriiswe nihubona sa, esangaalo neende omweehoyo biweere mu nyuumba ya Nasaae weefwe!

¹⁷Emwo yifwiira mu loba, ebibiihiro bireherwe buhaya; ebyaaki bisaasakuuhe, olwohuba ekesa haba sirisisiiriwo daawe.

¹⁸Ebisolo bibiinduha, eng'oombe chiheheerwe, olwohuba obunyaasi buwulao. Kata amayiicho k'amakoondi kosi kasaanda.

¹⁹Ewe Omwaami, ese hulirira. Olwohuba obunyaasi neende emisaala kyomu siino, biri koti ebisaambirwe neende omuliro.

²⁰Kata ebisolo byomu siino bihulirira olwohuba amaachi komu myaalo kahamire, haandi omuliro kusaambire obunyaasi bwomu siino.