Read saamia Yoeli 2 Bible Online

Yoeli 2 - saamia bible

Yoeli 2

¹Hubbeho eturumbete mu Siyooni; hubbeho embuungu hu Lugulu Lwaange lwoolerefu. Lehe abaandu bomu Buyudaaya boosi bateengerehe, olwohuba oludaalo lw'Omwaami lwiicha, luli aambi.

²Oludaalo olwo luliba olw'esiirima neende olw'ohweyendeeherera, oludaalo lw'ebiresi-resi neende olw'esiirima sya titititi. Eye hoongo ly'esike, liicha niliri koti esiirima sibwiihire hu lugulu. Haba sichibechaangao esike nyiingi koti chino, noomba sichahabeeo esike nyiingi koti chino. Emyaaka neende emyaaka kyoosi pe.

³Buli yichirya ebimera, yiba koti yi muliro kusaambire. Mu moni yi chichia, esyaalo silai koti endalo y'Edeni. Nae yichitula, yiba koti esiparara syoong'ene. Sibulao esiindu sichitaliire daawe.

⁴Esike echo chifwaanana koti efaraasi, haandi chiiruha koti efaraasi chomu biita.

⁵Chiduumakalira aakulu w'engulu, mani nichiwuuma koti ebigaari. Chituliha koti olusaambu lusaambwa omuliro. Cheyaanjire enyiriri koti eye lyeetekehera ebiita.

⁶Obuti budiira abaandu nichisuda aambi, mu bweeni bwaabwe nimusaamuuha.

⁷Chiseeta koti abalwaani, mani nichiniina ebiko koti ab'amaye. Buli yitulayo yihuumbira mu ngira yayo, mani yibulao kata ndala eyitula hu lunyiriri lwao.

⁸Yibulao eyisiindiha eyaasye, buli yitulayo, yikeendera hu ngira yayo. Chihalakania nichibita mu baliindi, mani abulao onyala ohuchikayira daawe.

⁹Chiduumakirira hu siko esyo, mani nichiiruhira hu bida. Chiniina mani hu nyuumba, mani nichibitira mu madirisa koti omwiibi.

¹⁰Esyaalo sidengaana nichisuda aambi, mani ekulu niliteengereha. Esiirima sidiira elyuuba neende omwoosi, mani eng'ining'ini chaakama ohwaaduha.

¹¹Omwaami alagira eye lyae. Eye lyae hoongo muno haandi limuwulira muno. Olwohuba oludaalo lw'Omwaami luhoongo muno haandi lutiisa. Abulao onyala ohulwesimiirisa daawe.

¹²Omwaami aboola ati: “Kata bulaanu buti, mweyolobisire elalira, mani mukobole yi ndi neende omwooyo kwoosi, ni musiiba, nimuchereenjesa haandi nimulira amasika.

¹³Lehe emyooyo kyeeng'we kyeefunake, ataali ebyefwaalo byeeng'we.” Kaluhe eyiri Omwaami, Nasaae weeng'we, olwohuba w'esisa haandi aleheramo. Haba saanyoolera bwaangu, haandi yeechula obuheeri butaakama, haandi akwiira esisa abahola-mbi.

¹⁴Wiina omanyire Omwaami n'atakaluuhaanie ebibaaso byae mani yeyolobya, mani yaleha n'ababereese ehabi, mani nimuba neende ekesa liingi, nimuyaanira Omwaami Nasaae weeng'we ebiyaanwa by'emere neende ebyohung'wa.

¹⁵Hubbe eturumbete mu Siyooni; laangise esisiibo; haandi buuse alala oluhung'aano lwoolerefu.

¹⁶Buuse abaandu alala, laange oluhung'aano lwoolerefu; buuse alala abaandu bakofu; leete abaana bayere, kata neende abo abasinuuna. Lehe abahadeehisania, batule mu siseenge syaabwe mani beeche.

¹⁷Lehe abalaamisi, abahalaabani b'Omwaami, balire nibeemere akatikaati w'omulyaango kw'enyuumba y'Omwaami neende alutaari nibaboola bati: “Ewe Omwaami, kwiira abaandu bao esisa, mani otaleha abaandu bao baalekeereswa abaandu bomu byaalo biindi baabacheha. Otafukiirira abaandu bomu byaalo biindi beteeba bati, ‘Nasaae waabwe ali yeena?’ ”

¹⁸Ao mani Omwaami nachuunirwa esyaalo syae, haandi n'akwiira abaandu bae esisa.

¹⁹Mani Omwaami n'akobola mu baandu n'aboola ati: Bone, bulaanu njia ohubaberesa engaano, amalwa k'emisabbiibbu, neende amafuta, mani muchia ohwiikuta. Haandi haba siinjia huleha abaandu bomu byaalo biindi babalekeerese.

²⁰Njia ohubamalaho eye ly'esike elyatula emukulu, mani esike chiindi njia ohuchiirusa chichie mu siparara, esidiiyiha simalilihayo, njia ohusiirusa sikwe mu Nyaanja Y'omuunyu, nae esidiiyiha simaliirihayo, njia ohusiirusa sikwe mu Nyaanja ya Mediterania. Mani emilaambo kyacho kichia ohuwunya obubolu. Njia ohuchisihirisa hulw'ebiindu byoosi bi chahola.

²¹Ewe esyaalo, otatya daawe; nae sangaala haandi wehoye hulw'ebiindu bihunuufu bi Omwaami aholere!

²²Eng'we esolo chomu siino, mutatya daawe, olwohuba obunyaasi bwomu siino busebuuhe; emisaala kyaamireho ebyaamo, emituli neende emisabbiibbu kyaamireho ebyaamo biingi.

²³Eng'we abaandu bomu Siyooni, sangaale, haandi mwehoyere mu Omwaami, Nasaae weeng'we; olwohuba ababeresa efula ndai yomu toocho. Akwiisa efula nyiingi muno, ey'etoocho neende ey'esiruumbi.

²⁴Olwaanyi lw'ohwaanihamo lwaheechule, mani amahunyiro kahahuluukuse amalwa k'emisabbiibbu neende amafuta k'emiseituuni.

²⁵Njia ohubakoboserao ebiindu bimwafwiirwa mu myaaka ki esike chalya ebirime byeeng'we, eye ly'esike hoongo elyo li ndasiindiha ohubaseeta.

²⁶Bulaanu muchia ohunyolaanga ebyohulya biingi, mani munalicheenge nimwiikuta, mani nimukinia eliita ly'Omwaami, Nasaae weeng'we, oyo obaholeere ebiwuukisa. Mani abaandu baange haba sibahalekeereswe haandi daawe.

²⁷Ao mani nuwo yi eng'we Abaisiraeli, mwahamanye muti ndi akatikaati weeng'we, haandi muti Ese, Omwaami, niise Nasaae weeng'we haandi abulao owuundi. Mani abaandu baange haandi haba sibahalekeereswe daawe.

²⁸“Luunyuma lw'ebyo, njia ohukabira abaandu boosi Mwooyo waange; abaana beeng'we basyaani, neende abaana beeng'we bahaana, bahalaangirise ebiahakweeo. Haandi abaandu bakofu mweeng'we, bahaloote ebilooto, haandi abaraaga beeng'we bahaboneherwe.

²⁹Haandi mu ndaalo echo, abahalaabani basaacha, neende abahalaabani bahasi, bosi njia ohubakabira Mwooyo waange.

³⁰“Njia ohweekesa eby'amayia Muukulu neende hu syaalo. Wahabeeo amabaanga neende omuliro, neende esiiro y'omwoosi.

³¹ Elyuuba lyaheehole esiirima, haandi omwoosi kwahahanye koti amabaanga. Ebyo nibyo ebyahataangirire oludaalo lw'Omwaami, oluhuluundu haandi olutiisa muno.

³² Mani oyo yeesi owahekongooye Omwaami, aliwona, olwohuba hu Lugulu lwa Siyooni neende mu Yerusalemu, bahabeeo abaliwona koti lu Omwaami yaboola. ‘Haandi mubahawoneo, mulibaamo abaandu ba Omwaami alaanga.’ ”