Read saamia Amosi 2 Bible Online

Amosi 2 - saamia bible

Amosi 2

¹Omwaami aboola ati: “Abaandu ba Moabbu bahola ebyonoono amahabi-na-mahabi. Mani sakira njia ohubasaandya, olwohuba basaamba amakuumba k'omutuki wa Edomu nikeehola ekohe.

²Sakira njia otubula omuliro hu syaalo sya Moabbu, mani kwahasaambe enyuumba cha Kerioti, mani abaandu ba Moabbu bahafwe nibalira, ao eturumbete ch'amaye nichihubba.

³Ndahasihirise omutuki wa Moabbu, alala neende abahunuufu bae.”

⁴Omwaami aboola ati: “Abaandu bomu Buyudaaya bahola ebyonoono amahabi-na-mahabi. Mani sakira njia ohubasaandya, olwohuba balekeeresa amalako kaange, haandi haba sibadiira amalako kaange. Nae banasaae bobubacha bakuuka yaabwe baloondekereraanga babadoondobaanie.

⁵Sakira njia otubula omuliro hu Buyudaaya, mani kuchia ohusaamba enyuumba chomu Yerusalemu.”

⁶Omwaami aboola ati: “Abaisiraeli bahola ebyonoono amahabi-na-mahabi. Mani sakira njia ohubasaandya, olwohuba bakusa mu buboye abaandu baluungifu neende abamanani batanyala kata ohutuunga ekobi ly'ebiraato.

⁷Baseenakira abataali neende amaani mu lufu, haandi beerusa abamanani ohutula mu moni waabwe. Omusyaani neende laatang'ene bahola obucheke hu muhasi mulala, mani nibanyaasa eliita lyaange lyoolerefu.

⁸Buli abuundu wohwiinamiramo, beeyalisa aasi hu ngubo chi bamanani babasiingireho. Haandi mu nyuumba ya Nasaae waabwe, nimwo mu bang'weera amalwa kabatoosere hu bamanani.

⁹ “Nae olw'ohuchuunirwa abaange, ndasihirisira elalira Abaamoori nimubona, abaandu bali abaleeyi koti emituumba, haandi ab'amaani koti emiseengese.

¹⁰Haandi syesi ndabatusa mu syaalo sy'e Misiri, mani nibeemirira mu siparara ohumala embaka y'emyaaka amahumi kane, mani nimbaberesa esyaalo sy'Abaamoori,

¹¹ Mani ndadoola abaandi hu basyaani baabwe babe abanabbi, haandi abaandi hu baraaga baabwe babe abanasareeti. Eng'we Abaisiraeli, haba sisiri sityo daawe?” Omwaami niye oboola.

¹²“Nae mwang'weesa abanasareeti[2] amalwa, haandi nimulagira abanabbi nimuboola muti, ‘Mutalaangirira daawe.’

¹³“Nae bone, njia ohubafwiinyirira aasi hu loba, mube koti ebigaari bikiingire engaano sito.

¹⁴Embiro haba sichahahoonye abeeruhi, haandi ab'amaani bahaweemo omwooyo, noomba abalulu beewonia abeene.

¹⁵Abalasi b'obusaale haba sibahagume ohweemao, abeeruhi b'embiro haba sibaheewonie abeene, noomba abeerusi b'efaraasi ohuwonia obulamu bwaabwe.

¹⁶Hu ludaalo olwo, abachweenufu bahiramo obwomiifu bahalakase ebilwaaniso byaabwe mani beeruha syeekenye.” Omwaami niye oboola.