Read saamia Amosi 3 Bible Online

Amosi 3 - saamia bible

Amosi 3

¹Eng'we Abaisiraeli, wulire emboosi chi Omwaami abalomaloomeho, eng'we mweesi abaandu bae ba yatusa mu syaalo sya Misiri:

²“Eng'we mweeng'ene mu baandu bomu syaalo syoosi, niing'we ba ndadoolamo; mani sakira njia ohubasaandya hulw'ebyonoono byeeng'we byoosi.

³“Abaandu babiri banyala ohukeendera alala nibatafukirisaanie mberi?

⁴Edalang'i yinyala ohubuluulira mu sichaha, nisibulao esiindu si yiitire? Edalang'i njere yinyala ohubuluulira mu ng'uungu, nisibulao esiindu si yidiirire?

⁵Eyoni linyala ohuwaambwa mu lukiriikiri nibataalitekere? Omuteego kunyala ohubbachuha niyibulao esikutekuule?

⁶Banyala ohuubba eturumbete y'ebiita mu siko, mani abaandu baahaya ohutya? Esibi siinyala ohwoola hu siko, Omwaami n'ataasisiindiihe?

⁷Mubwadyeeri bweene, sibulao esiindu si Omwaami Nasaae yahahola nataasifunulira mberi abahalaabani bae, abanabbi.

⁸Edalang'i niyibuluula; wiina mweene otahatya? Omwaami Nasaae naalomaloma; wiina mweene otahanyala ohulaangirira ebidiira hu mboosi yae?”

⁹Laangirire mu madooho komu Asiria neende mu madooho komu syaalo sy'e Misiri, nimuboola muti, “Mwebuusire hu ngulu chomu Samaria, mani mubone efuujo yisirimo, neende ohufwiinyirirwa husirimo.”

¹⁰Omwaami aboola ati: “Abaandu bano haba sibamanyire obwadyeeri.” “Enyuumba chaabwe cheechulamo ebiindu binyakirwe neende ebiibirwe.”

¹¹Mani sakira Omwaami Nasaae aboola ati: “Omusuku alyebodoohania esyaalo syaabwe, mani afunaka-funaka ebiko byaabwe, naanyaka ebiindu byomu nyuumba chaabwe.”

¹²Omwaami aboola ati: “Koti lu mwaayi yahaabina amakulu kabiri koong'ene, oba esituundu sy'ohutwi sa, ohutula mu munwa kw'edalang'i, nilwo lu Abaisiraeli bali mu Samaria bahawone hoomo badiidi, hu abo abakalaame hu bitaanda byaabwe bihoongo bulaanu buti.”

¹³Omwaami Nasaae w'Obunyala aboola ati: “Wulire, mani mulabule abeechuhulu ba Yakobbo muti:”

¹⁴ “Hu ludaalo lu ndahasaandisiryeho esyaalo sya Yisiraeli hulw'ebyonoono byasyo, njia ohusihirisa alutaari cha Bbeteli. Esoonda chohu alutaari choosi njia ohuchifunaka-funaka mani chikwe aasi hu loba.

¹⁵Njia ohulikula-likula enyuumba chaabwe chibamenyamo ebiha by'etoocho neende mu siminyu; njia ohusihirisa enyuumba chaabwe chibasaata neende ameeno k'enjofu. Enyuumba hoongo echo chichia ohusihirira.” Omwaami niye oboola.