Read saamia Amosi 7 Bible Online

Amosi 7 - saamia bible

Amosi 7

¹Bino nibyo bi Omwaami Nasaae yanjekesa: Bone, Omwaami yali n'atekeha eyiicho ly'esike nibamalire ohubeta obunyasi bw'omutuki, haandi nibuchaaka ohusebuha sa buti.

²Nae esike nichamala ohulya obunyasi hu syaalo, mani nimboola endi: “Ewe Omwaami Nasaae, husaba, lehera! Abaisiraeli banabeeo batye? Olwohuba badiidi haandi babula obwiiruhiro!”

³Mani Omwaami n'akaluuhania ebibaaso byae; mani n'aboola ati: “Esyo haba sisicha hubaao daawe.”

⁴Bino nibyo bi Omwaami Nasaae yanjekesa: Bone, Omwaami Nasaae yali n'atekeha ohuheenga omusaango kw'ohusaandya abaandu niyehoonyera omuliro. Omuliro okwo kwasaamba enyaanja hoongo yiri aasi w'eloba, mani nikuniina nikuchaaka ohusaamba aakulu hu loba.

⁵Mani nimboola endi: “Ewe Omwaami Nasaae, husaba, yakama esyo! Abaisiraeli banabeeo batye? Olwohuba badiidi muno haandi babula obwiiruhiro!”

⁶Mani Omwaami n'akaluuhania ebibaaso byae; Omwaami Nasaae n'aboola ati: “Sino syosi haba sisicha hubaao.”

⁷Bino nibyo bi Omwaami yanjekesa: Bone, Omwaami yali niyeemere hu ndulo w'esida esyali nisyoombahwa neende ebbirigi yipiima. Omwaami yali n'adiirire ebbirigi yipiima.

⁸Mani Omwaami niyandeeba ati: “Amosi, oli ohubona siina syeene?” Mani ningobolamo endi, “Ebbirigi yipiima.” Mani Omwaami n'aboola ati: “Bona, ndi ohwehoonyera ebbirigi yipiima ohweekesa Abaisiraeli endi bali koti esida syeekodere. Mani haba siinja ohukaluuhania ebibaaso byaange, njia ohubasaandya.

⁹Obweyaango buhoongo bu beechuhulu ba Yisaka beenamiramo byahanyaaswe. Neende alutaari cha Yisiraeli chahasihiriswe. Mani abomu nyuumba y'omutuki Yerobboamu ndahabeetere mu biita.”

¹⁰Amasia omulaamisi wa Bbeteli yatuma emboosi eyiri Yerobboamu omutuki wa Yisiraeli, n'aboola ati: “Amosi ali ohuhuhoba mu Abaisiraeli. Buli siindu sy'alomaloma, abulao onyala ohusyesimiirisa.

¹¹Olwohuba Amosi aboola ati: ‘Yerobboamu achia ohufwiira mu biita, haandu Abaisiraeli bachia ohutuswa mu syaalo syaabwe bayirwe mu jeela.’ ”

¹²Ao mani Amasia n'aboolera Amosi ati: “Ewe omunabbi, waao, kaluha mu syaalo sya Buyudaaya, mani oholere eyo omulimo kw'obunabbi haandi eyo niyo yooba onyoola ebyohulya bi onaalye.

¹³Nae haba otakobolaho ohuholera omulimo kw'obunabbi Bbeteli ano haandi. Olwohuba ano niwo abuundu w'omutuki wohwiinamiramo, haandi niyo Enyuumba ya Nasaae mu bwaami buno.”

¹⁴Amosi yakobola mu Amasia n'aboola ati: “Ese haba sindali omunabbi, oba omwaana w'omunabbi, nae ndali omwaayi, haandi omubeenji w'emihuyu.

¹⁵Nae Omwaami yandusa hu mulimo kwaange kw'obwaayi, mani niyamboolera ati: ‘Chia otuse obunabbi eyiri abaandu baange Abaisiraeli.’

¹⁶Mani bulaanu wulira emboosi y'Omwaami. Ewe oboola oti: ‘Yakama ohulaangirira ebidiira hu Abaisiraeli, haandi yakama ohuyaalaanga ebinyoolesa Abaisiraeli.’

¹⁷Mani sakira Omwaami aboola ati: Omuhasi wao yaheehole omucheke mu siko sino, haandi abaana bao basyaani neende abaana bao bahaana baheeterwe mu biita. Eloba lyao lyahakabulwemo, mani likabwe abaandu baandi. “Mani ewe omweene wahafwiire mu syaalo sy'abonooni, haandi mubwadyeeri bweene, Abaisiraeli bahayirwe mu jeela, eyale muno neende esyaalo syaabwe.”