Read saamia Amosi 9 Bible Online

Amosi 9 - saamia bible

Amosi 9

¹Ndabona Omwaami niyeemere hu ndulo w'alutaari, mani n'aboola ati: “Huya neende amaani aakulu w'esiiro ch'Enyuumba ya Nasaae, omusiingi kwaao kudengaane. Likula esiiro echo mani chikwe hu mitwe ky'abaandu boosi. Mani abo abahadoong'eo, ndahabeetere mu biita. Abulao kata mulala hu baandu abo owaheeruhe, abulao kata mulala hu baandu abo owaheeyibe.

²“Kata bahayaba engira chaabwe ohwoola emakoombe, ndahabadiirire eyo mani mbatuseo. Kata bahaniina aakulu hu ngulu, ndahabaanuleo ndabeesa aasi.

³Kata baheekisa aakulu woolugulu lwa Karimeeli, ndahabakoonye eyo mani mbatuseyo. Kata baheekisa aasi mu lusiba lw'enyaanja, njia ohulagira endemo[3] yibalumire eyo.

⁴Kata abasuku baabwe bahabayira mu jeela, njia ohulagira babeetere mu biita eyo. Mani maliirise neende ohubakwiisaho amasira ataali ohubaholera ebilai.”

⁵Omwaami, Nasaae w'Obunyala, niye oyo odiira hu syaalo mani syaateengereha, mani abo boosi abalimo beeyendeherera, mani esyaalo syoosi syaaniina koti Omwaalo kwa Naili, mani syeebira haandi, koti Omwaalo kwa Naili kwa Misiri.

⁶Omwaami yoombaha enyuumba yae muukulu, haandi aakulu w'esyaalo mani n'ataao ebbaanga. Niye olaanga amaachi komu nyaanja, mani naakachuha hu syaalo. Eliita lyae nilyo Omwaami.

⁷Omwaami aboola ati: “Eng'we Abaisiraeli, mbaasa hu baandu ba Etiopia koti lu mbabaasaho. “Ndatusa Abafilisiti mu Kafutoori, neende Abasiria mu Kiri, koti lu ndatusa eng'we Abaisiraeli mu syaalo sy'e Misiri.

⁸Bone, bulaanu Ese Omwaami Nasaae ndi ohwehaliirisa obwaami bwa Yisiraeli obuhola ebyonoono, mani njia ohubusihirisa mbumaleo hu syaalo, nae haba siinja ohusihiirisa olwiibulo lwa Yakobo kata nabudiidi.”

⁹“Olwohuba bone, njia ohulagira, njia ohuchuunga Abaisiraeli mu byaalo byoosi koti omuundu yahachuunga neende esichuungo, nae abulao owahawone.

¹⁰Abaholi b'ebyonoono mu baandu baange boosi bahafwiire mu biita, abo ababoola bati, ‘Amasira haba sikahatwooleho daawe.’ ”

¹¹Omwaami aboola ati: “Oludaalo lwahoole mani siingise esikaali sya Daudi syakwa haandi ndereese ebida byasyo byanyaasiha, mani mbyoombahe buyaaha bikoboleo koti lu byali hale.

¹²Hu bulaanu Abaisiraeli banyale ohuyiingira esyaalo sy'Edomu esidoong'ereo haandi ebyaalo byoosi ebyalichiingi ebyaange.” Omwaami ohola sino nilwo lu aboola.

¹³Omwaami aboola ati: “Bone, endaalo chichia ohwoola, ekesa lyoole abaandu nibasisiiri ohumala ohutaaka, haandi ebiha by'ohuhunya emisabbiibbu byahoole abaandi nibasisiiri ohumala ohutaaka. Efiini y'emisabbiibbu ndai yahahulukuse niyitula hu ngulu, neende hu bigulu byoosi.

¹⁴Njia ohukobosera abaandu baange Abaisiraeli ehabi, mani boombahe buyaaha haandi bamenye mu biko byaabwe byanyaasiha ebyo; haandi bahataake emisabbiibbu mani bang'we efiini yakyo, haandi bahalime endalo mani balye ebyaamo byachio.

¹⁵Njia ohukobosa abaandu baange mu syaalo syaabwe, haandi haba sibahatuleho mu syaalo si ndababeresa daawe.” Omwaami Nasaae weeng'we niye oboolere.