Read saamia Yona 3 Bible Online

Yona 3 - saamia bible

Yona 3

¹Omwaami mani naalomaloma neende Yona ehabi lyoohubiri n'aboola ati,

²“Siingira ochie Ninefe, esiko sihoongo esyo, mani oyaalire abaandu emboosi yihuboolera.”

³Mani Yona n'asiingira naachia Ninefe, koti lu Omwaami yali n'amuboolere. Bulaanu Ninefe syali esiko sihoongo muno, ohusihalakaniamo n'okeenda, olukeendo luyira endaalo chidatu.

⁴Yona yachaaka ohuchia mu siko esyo, yakeenda manin'ahalakaniamo olukeendo lw'oludaalo lulala lwoong'ene. Mani n'ayaala n'aboola ati, “Chidoong'ere endaalo amahumi kane koong'ene, esiko sya Ninefe sisihiriswe!”

⁵Abaandu b'e Ninefe mani nibafukiirira emboosi ya Nasaae; nibaheengao bati buli muundu asiibe, haandi befwaale ebigunia, ohutulira elalira hu muundu ohiramo obuhunuufu ohwoola hu muundu omalilihayo obuhunuufu; ohweekesa bati beeyolobye.

⁶Nae emboosi chino nichoolera omutuki wa Ninefe, yasiingira, yatula hu sisaala syae sy'obutuki, yefwaalula ekaanju lyae, mani niyebwiiha ebigunia, niyehala mu kohe.

⁷Omutuki n'alagira haandi naatusa omunwa mu Ninefe mwoosi ati, “Lino nilyo elako ly'omutuki neende abahunuufu bae. Lehe omuundu yeesi, oba esolo yoosi, oba eng'oombe yoosi oba esyaayo syoosi, sitahoombaho esiindu syoosi; lehe bitalyaaho, oba byaang'waaho amaachi.

⁸Nae lehe abaandu befwaale ebigunia nae ebisolo byosi bibwiihwe ebigunia chana, mani abaandu beekweede Nasaae omunyala w'ebiindu byoosi; eee, lehe buli muundu yefunake alehe ebiima byae bibi, neende ebiholwa byae bibi.

⁹Awuundi Nasaae anyala ohwefunaka yaakwa omwooyo, mani hwahaya ohusihiriswa!”

¹⁰Nae Nasaae niyabona esiindu si bali nibaholere, koti lu bali nibatulire hu biima byaabwe bibi, Nasaae yefunaka naahaya ohubasaandya koti lu yali n'amalirire ohuhola; mani haba siyabasihirisa daawe.