Read saamia Yona 4 Bible Online

Yona 4 - saamia bible

Yona 4

¹Nae sino sisyasangaasa Yona, yanyoolera muno.

²Mani Yona yasaaba Omwaami n'aboola ati, “Husaba, Omwaami sino haba sinisyo si ndaboola nisisiiri mu syaalo syaange! Sino nisyo esyakera ninjiruhira Tarisiisi; olwohuba ndamanya endi, ewe oli Nasaae w'esisa haandi oleheramo, otaanguya ohunyoolera haandi oweechulamo obuheeri, oweefunaka mani yaahaya ohusaandya.

³Bulaanu sakira ewe Omwaami, hwekweeda, ndehe fwe, olwohuba bilai fwe ohuhira ohubaao omulamu.”

⁴Nae Omwaami n'amuteeba ati, “Obaasa oti ewe ohoyere ohunyoolera?”

⁵Yona naatula mu siko niyehala erwaanyi ebukwe w'esiko; niyeyombahira eyo ahakaali; niyehala mu siniha syaho, n'aliinda ohubona esinaakwe hu siko sya Ninefe.

⁶Omwaami Nasaae mani n'akera edoongo-doongo nilimera, nilihula nilibwiiha Yona. Yona naaba mu siiniha syalyo omubasu muungi nikuhaya ohumuubba. Mani omusaala okwo kwakera Yona n'asangaala muno.

⁷Nae obwiire nibwahya, hu ludaalo luloondaho, Nasaae yatuma enyeende ohulya omusaala okwo, mani nikuhooha.

⁸Nae elyuuba nilyatula, Nasaae yatuma omuyaka kutula ebukwe, mani omubasu kwachaaka ohuubba hu mutwe kwa Yona, yaaba aambi ohufwa; niyekweeda omweene ati afwe n'aboola ati, “Silai ese fwe ohuhira ohubaao omulamu.”

⁹Nae Nasaae n'ateeba Yona ati, “Ewe obaasa oti ohoyere onyoolere hulw'edoongo-doongo elyo?” Mani Yona n'akobolamo ati, “Hoyeere nyoleere, nyoleere kata niifwa, fwe.”

¹⁰Nae Omwaami n'aboola ati, “Ochuunirwa edoongo-doongo elyo, ly'otahalaabanira, oba wakera lyaahula, elyamerera mu siro silala haandi elihooheere mu siro siindi.

¹¹Nae ese haba sindahachunirwe Ninefe, esiko sihoongo esyo, esirimo abaandu babita elifu emia ndala neende amahumi kabiri abatanyala ohwawula esibi neende esilai, haandi esirimo ebyaayo biingi?”