Read saamia Ohubala 1 Bible Online

Ohubala 1 - saamia bible

Ohubala 1

¹Hu ludaalo lutaangira, olw'omwoosi kw'ohubiri, mu mwaaka kw'ohubiri, ohutula abaandu ba Yisiraeli nibali nibamalire ohutula mu Misiri, Omwaami haandi yalomaloma neende Musa nibali mu Yeema ly'Ohubaao hwae, nibali mu siparara sya Sinai. Yaboola ati,

²“Ewe neende Arooni muhoyere ohubala abaandu ba Yisiraeli, mu nono chaabwe, neende mu madaala kaabwe. Hole olukalala lw'ameeta k'abasaacha boosi

³ohutulira hu myaaka amahumi kabiri eky'obuhuluundu, neende ohuniina aakulu, mu Yisiraeli yoosi, abo abanyala ohuchia ohulwaana ebiita, ewe neende Arooni, muhoyere ohubataaho enaamba, mu buli mukaanda.

⁴Ohoyere ohuba neende omusaacha ohutula mu buli nono, nga buli musaacha oyo niye oba naali omutwe kw'edaala lya basimwaana.

⁵Mani bulaanu, kano niko ameeta k'abasaacha abahoyere ohuhuhalaabaniraanga. Ohutula hu Rubbeeni, Elisuuri omwaana wa Sedewuri;

⁶ohutula hu Simeoni, Selumieli omwaana wa Surisadai;

⁷ohutula hu Yuda, Nahasoni omwaana w'Aminadabbu;

⁸ohutula hu Yisakari, Netaneeli omwaana wa Suari;

⁹ohutula hu Sebbuluuni, Eliabbu omwaana wa Heloni;

¹⁰ohutula hu basyaani ba Yosefu, ohutula hu Efuraimu, Elisaama omwaana wa Amihudi, haandi ohutula hu Manaase, Gamalieli omwaana wa Pedahisuri;

¹¹ohutula hu Bbenjamini, Abbidaani omwaana wa Gideoni;

¹²ohutula hu Daani, Ahieseeri omwaana wa Amisadai;

¹³ohutula hu Aseri, Pagieli omwaana wa Okiraani;

¹⁴ohutula hu Gaadi, Eliasafu omwaana wa Dewela

¹⁵ohutula hu Nafutaali, Ahira omwaana wa Enani.”

¹⁶Bano boosi nibo abo abadoolwa ohutula mu mukaanda okwo kwoosi, abali nibali abeemirisi b'enono chaabwe ech'obwiibulanwa, haandi abali abeemirisi b'enono choosi cha Yisiraeli.

¹⁷Musa neende Arooni babukula abasaacha bano bahukuliihe ameeta,

¹⁸mani hu ludaalo lutaangira lweene, olw'omwoosi kw'ohubiri, bebuusira alala koti omukaanda mulala, abali nibeeyandiikisiire mu madaala, ohweema hu madaala ka basaabwe, haandi ohweema hu buungi bw'ameeta ohutula hu myaaka amahumi kabiri eky'obuhuluundu ohuniina aakulu, buli mwiimirisi,

¹⁹koti sa lu Omwaami yali n'alagiire Musa. Mani eyo mu siparara sya Sinai, niyo yi Musa yaandiikira abaandu abo.

²⁰Abaandu ba Rubbeeni, omwaana waamberi wa Yisiraeli, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo bano:

²¹obuungi bw'abaandu batula mu nono ya Rubbeeni bali elifu amahumi kane neende chisaasaba, neende emia chitaanu (46,500).

²²Abaandu ba Simeoni, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

²³obuungi bw'abaandu batula mu nono ya Simeoni bwali elifu amahumi kataanu neende chitaanu-na-chine, neende emia chidatu (59,300).

²⁴Abaandu ba Gaadi, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

²⁵obuungi bw'abaandu batula mu nono ya Gaadi bwali, elifu amahumi kane neende chitaanu, neende emia chisaasaba neende amahumi kataanu (45,650).

²⁶Abaandu ba Yuda, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ak'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

²⁷obuungi bw'abaandu batula mu nono ya Yuda bwali, elifu amahumi kataanu-na-kabiri neende chine, neende emia chisaasaba (74,600).

²⁸Abaandu ba Yisakari, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ak'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo bano:

²⁹obuungi bw'abaandu batula mu nono ya Yisakari bwali, elifu amahumi kataanu neende chine, neende emia chine (54,400).

³⁰Abaandu ba Sebbuluuni, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

³¹obuungi bw'abaandu batula mu nono ya Sebbuluuni bwali, elifu amahumi kataanu-na-kabiri, neende emia chine (57,400).

³²Abaandu ba Yosefu, abalaangwa ohuba abaandu ba Efuraimu, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

³³obuungi bw'abaandu batula mu nono ya Efuraimu bwali, elifu amahumi kane, neende emia chitaanu (40,500).

³⁴Abaandu ba Manaase, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

³⁵obuungi bw'abaandu batula mu nono ya Manaase bwali, elifu amahumi kadatu neende chibiri, neende emia chibiri (32,200).

³⁶Abaandu ba Bbenjamini, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

³⁷obuungi bw'abaandu batula mu nono ya Bbenjamini bwali, elifu amahumi kadatu neende chitaanu, neende emia chine (35,400).

³⁸Abaandu ba Daani, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

³⁹obuungi bw'abaandu batula mu nono ya Daani bwali, elifu amahumi kasaasaba neende chibiri, neende emia chitaanu-na-chibiri (62,700).

⁴⁰Abaandu ba Aseri, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

⁴¹obuungi bw'abaandu batula mu nono ya Aseri bwali, elifu amahumi kane neende ndala, neende emia chitaanu (41,500).

⁴²Abaandu ba Nafutaali, ohweema hu lwiibulo lwaabwe, ohweema hu madaala kaabwe, ohweema hu nyuumba cha basaabwe, ohweema hu buungi bw'ameeta, buli mwiimirisi, buli w'esisaacha ohutulira elalira hu myaaka amahumi kabiri ey'obuhuluundu, neende ohwemeeda aakulu, abo boosi abali nibanyala ohuchia ohulwaana ebiita nibo:

⁴³obuungi bw'abaandu batula mu nono ya Nafutaali bwali, elifu amahumi kataanu-na-chidatu, neende emia chine (53,400).

⁴⁴Bano nibo abo boosi abanyala ohubalwa, ba Musa neende Arooni babala nibahoonyerwaho neende abeemirisi ba Yisiraeli, abasaacha ehumi neende babiri, buli otula nga ahihirira enyuumba ya laatang'ene.

⁴⁵Mani obuungi bw'abaandu boosi aba Yisiraeli, ohweema hu nyuumba cha basaabwe, ohutulira hu myaaka amahumi kabiri neende ohwemeeda aakulu, buli musaacha onyala ohuchia yalwaana ebiita mu Yisiraeli

⁴⁶obuungi bwoosi ohuyirira alala bali, elifu emia chisaasaba neende chidatu, emia chitaanu neende amahumi kataanu (603,550).

⁴⁷Nae Abaleefi boosi haba sibabalirwa hu nono chiindi,

⁴⁸olwohuba Omwaami yali niyaboolera Musa ati,

⁴⁹“Nooba noobala abaandu ababa nibanyala ohuhalaabana mu biita, otayiriramo neende enono ya Leefi daawe.

⁵⁰Mu bweyaango obwo, bukula Abaleefi boosi obateeho omulimo kw'ohuhalaabana mu Yeema ly'Ohubaao hwaange, alala neende ebiindu byoosi ebirichiiraho. Nibo abachia ohulikiingaanga alala neende ebiindu byoosi ebyahwo, bahalaabanemo, mani boombahe ekaambi yaabwe yilyebodoohanie.

⁵¹Mani buli lu munawuyiaanga ekaambi yeeng'we, Abaleefi nibo abanakiingaanga Eyeema elyo mani bachia balyoombahira mu buli abuundu ayaaha yi munabechaanga nimwoombahemo ekaambi yeeng'we. Omuundu wuundi yeesi ochia ohusudaanga hu Yeema, aneetwaanga.

⁵²Abaisiraeli badoong'ereyo boosi nibo abachia ohwoombahaanga ekaambi, mu buli mukaanda, buli musaacha neende omukaanda kwae, haandi neende ebbeendera yae yeeng'ene.

⁵³Nae Abaleefi nabo bachia ohwoombahaanga ekaambi yaabwe nibebodoohania Eyeema elyo ohuliliindaanga, hu abuleo omuundu yeesi onyala ohusuda yi riri mani asiingise etima lyaange ohwiihira hu luyia luno lwoosi olwa Yisiraeli.”

⁵⁴Mani abaandu ba Yisiraeli boosi bahola buli siindu si Omwaami yali n'alagiire Musa.