Read saamia Ohubala 10 Bible Online

Ohubala 10 - saamia bible

Ohubala 10

¹Omwaami yaboolera Musa ati,

²“Hola eturumbete chibiri ohutula mu feesa nyuhuule ohwehoonyerwaanga mu hulaanga abaandu bebuuse alala, haandi neende hulw'ohusakulaanga ekaambi.

³Ekono leeyi nilyuubba hu turumbete choombi, abaandu boosi baba bahoyere ohwebuusira yooli hu mulyaangiro kwiingira mu Yeema ly'Ohubaao hwaange.

⁴Nae eturumbete ndala niyihubba yoong'ene sa, mani abeemirisi b'enono boong'ene nibo ababa bahoyere ohwebuusira yooli.

⁵Nae amakono meembikiti nikaba niko akali ohuubbwa, enono chamenya ebukwe nichio echiba chichia ohutulayo.

⁶Nae haandi amakono meembikiti nikoobbwa ehabi lya habiri, enono ch'emwaalo nichio echiba nichicha ohutulayo. Mani amakono meembikiti niko akahoyeere ohuubbwaanga ohusakuula ekaambi,

⁷nae ohweenya ohulaanga abaandu boosi bebuuse alala, amakono maleeyi niko akahoyeere ohuubbwa.

⁸Eturumbete chino chihoyeerwe ohuubbwaanga neende abasyaani b'Arooni boong'ene, abalaamisi. “Elako liloondaho lino lihoyere ohuloondwaanga endaalo choosi chiri mu moni.

⁹Nimuba nimuli ohulwaana ebiita mu syaalo syeeng'we, nimuli ohwehiingaanga ohutula neende omusuku weeng'we oba naabaseetere, yubbeenge ahalolero heekesa ebiita nimwehoonyera eturumbete chino. Ese Omwaami Nasaae weeng'we, mba njia ohubahoonyaanga mbaonia ohutula hu basuku beeng'we.

¹⁰Haandi mu biha by'esangaalo koti esiha sy'Esidyaalo sy'Omwoosi Muyaaha haandi neende hu bidyaalo by'ediini biindi muhoyere ohuubbaanga eturumbete chino nimuli ohuyaana ebiyaanwa bisaambwa byaakwa ekohe, haandi neende hu huyaana ebiyaanwa by'ohuholegana. Mani mba njia ohubahoonyaanga. Ese niise Omwaami Nasaae weeng'we.”

¹¹Hu ludaalo lw'amahumi kabiri, mu mwoosi kwa habiri, mu mwaaka kwa habiri, abaandu nibali nibamalire ohutula mu Misiri, esireesi syalichiingi aakulu w'Eyeema ly'Ohubaao hw'Omwaami syeecha syaatulayo,

¹²mani Abaisiraeli bachaaka olukeendo lwaabwe ohutula mu sichiimi sya Sinai. Esireesi esyo syeecha syabeengaanga ohwoola lu syoola mu siparara sya Parani.

¹³Bachaaka ohuhuumbaanga nibaloondakirira esilagiro sy'Omwaami ohubitira mu Musa,

¹⁴mani buli siha si bakeendaanga, balichiingi sa mu hola yifwaanana. Abo abalichiingi aasi w'ebbeendera y'omukaanda kwali nikwiimirirwa neende enono ya Yuda, nibo abataangira ohuchaaka olukeendo, mu buli mikaanda, neende Nahasoni omwaana w'Aminadabbu n'ahulira.

¹⁵Netaneeli omwaana wa Suari yali naahulira enono ya Yisakari,

¹⁶nae Eliabbu omwaana wa Heloni naali ohuhulira enono ya Sebbuluuni.

¹⁷Ao bulaanu niwo yi Yeema lyooleraanga lyosi ohukiingwa, mani enono cha Gerisoni neende Merari, abali nibo abalikiingire, boosi booleraanga ohuchaaka olukeendo.

¹⁸Ohuloondaho, bali abo abali aasi w'ebbeendera y'omukaanda kwahulirwa neende enono ya Rubbeeni kwoosi kwoola ohuchaaka olukeendo, mu buli mikaanda, neende Elisuuri omwaana wa Sedewuri n'akuhuliire.

¹⁹Selumieli omwaana wa Surisadai niye owali n'ahuliire enono ya Simeoni,

²⁰neende Eliasafu omwaana wa Dewela owali n'ahuliire enono ya Gaadi.

²¹Bulaanu hu nono ya Kohati yitulana hu nono ya Leefi yosi yihoyera ohuchaakaanga olukeendo, niyikiingire ebiindu byoolerefu. Mu siha sibooleraanga mu kaambi yiloondaho, Eyeema lyalichiingi nga limalire ohwoombahwa haandi.

²²Oludaalo lwaloondaho, abo abali aasi w'ebbeendera y'omukaanda kweemirirwa neende enono ya Efuraimu bosi bachaakaanga olukeendo, mu mikaanda, neende Elisaama omwaana w'Amihudi, naabeemiriire.

²³Gamalieli omwaana wa Pedasuuri yali naahulira enono ya Manaase

²⁴nae Abbidaani omwaana wa Gideoni yali naahulira enono ya Bbenjamini.

²⁵Muhumaliiriha, abo abali aasi w'ebbeendera y'Omukaanda kwali nikwiimiriirwe neende enono ya Daani, okwali nikuhola koti okuliinda enyuma bweene w'emikaanda kyoosi, hu kwosi kwoola ohuchaaka olukeendo, mu mikaanda, neende Ahieseeri omwaana wa Amisaada naakuhuliire.

²⁶Pagieli omwaana wa Ochirani yali n'ahulira enono ya Aseri,

²⁷nae Ahira omwaana wa Enani naahulira enono ya Nafutaali.

²⁸Yino mani niyo eyali endekeha y'ohuhuumba, mu mikaanda, buli lu Baisiraeli basakuulaanga ekaambi, mani bachaaka olukeendo ohuwuuya.

²⁹Musa yaboolera muhweeng'ene, Hobbabbu omwaana wa Reweli Omumidia ati, “Huli aambi ohuchaaka olukeendo ohuchia abuundu yi Omwaami yaboola ati achia ohutuberesa. Yasuubisa ohuhola Yisiraeli yi yiindiyale, mani yicha huchie naawe, mani hu hukabaneho naawe obuyiinda bweefwe obwo.”

³⁰Hobbabbu nae yakobolamo ati, “Haba, ese ngobola engo eyiri eloba lyeefwe liibulanwa.”

³¹Musa yaboola ati, “noojama otatuleha.” “Omanyire yi hunyala hw'ombaha ekaambi mu sichiimi, mani onyala weecha waatweekesa.

³²N'okanya ohwiicha hwaachia naawe, huba huchia ohukabana naawe ehabi choosi chi Omwaami achia ohutuberesaanga.”

³³Mani abaandu nibatula Sinai, olugulu lwoolerefu olwo, bakeenda ohumala endaalo chidatu enaamba. Esanduuku ly'Endagaano lyabataangiriraanga sa mu moni ohunyoola obweyaango bu banyala ohwoombahamo ekaambi.

³⁴Mani koti lu batulaanga mu buli kaambi, esireesi sy'Omwaami esyo, syababechaangaho sa aakulu esideete syoosi.

³⁵Buli lu Sanduuku ly'Endagaano lyachaakaanga olukeendo, Musa yaboolaaga ati, Siingira, Omwaami; sakuula abasuku bao mani odumuule abo abahusyuula.

³⁶Haandi buli lu lyemaanga, yaboolaanga ati, Kobola, Omwaami, eyiri amadaala elifu neende elifu aka Yisiraeli.