Read saamia Ohubala 11 Bible Online

Ohubala 11 - saamia bible

Ohubala 11

¹Abaandu beemao bachaaka ohwekanyiirisira Omwaami hu bidinyu byaabwe. Mani Omwaami niyeecha yaabawulira, yanyoolera mani yaatuma omuliro eyiri abaandu. Kwabaaduhamo kwaasihirisa olwaande lulala lw'ekaambi.

²Abaandu balirira Musa nibadaha obuhoonyi; mani Musa yekweeda Omwaami yaasimya omuliro.

³Sakira abuundu ao yakulihwa ati “Tabbera”, olwohuba ao niwo yi muliro kw'Omwaami kwabaaduhiramo.

⁴Waliwo abaandu bateende baandi abali nibakeendera alala neende Abaisiraeli. Beecha banyoola esiwonya esihoongo muno esyohulyaho enyama, haandi kata Abaisiraeli beene bosi bachaaka ohwekanyiirisa nibaboola bati: “Nihwahanyoolaho sa enyama.

⁵Mu Misiri hwalichaanga enyama yituyera, ni hutayikulireho daawe. Yichuliseho kyukaamba, woondomachi, dania, ebituunguyu, neende ebituunguyu-saumu bi hwaliichingi nabyo?

⁶Nae bulaanu, amaani keefwe katuweeremo. Abulao esiindu syoosi si muundu yahalya daawe kata sa silala, ohutusaho mana bino buli buhya.”

⁷Bulaanu, mana byali ebiindu bifwaana koti obumwo bw'enuuni, nibifwaana rachaari ya namuki.

⁸Abaandu bali nibakeendaanga sa nibabidoola, nibabisya koti obusye, oba nibabisehula mu biswaakiro, mani nibabifukira mu ndamu, mani nibamala nibabiholamo ekeeki; mani hu lulimi byalichiingi koti ekeeki chibahubbiire amafuta.

⁹Nae olume nilwaamaanga mu kaambi, esiro, maana byosi byakwiiraanga abweene ao.

¹⁰Musa yawulira abaandu boosi nibeekanyiirisa nibeemere mu mikaanda mu milyaango ky'amayeema kaabwe. Yelalihirira muno olwohuba Omwaami yali amalire ohubanyoolerera,

¹¹mani yaboolera Omwaami ati, “Lwasiina wuuholere bubi oti? Lwasiina wuusinyihiire oti? Lwasiina waamberesa obunyala bw'ohuliinda abaandu bano boosi?

¹²Ese siniise owabaloonga, oba owakera beebulwa. Lwasiina ewe odaha ese ndeehole omulesi mbaakateenge mu mahono koti abadoto ohwoolera elalira mu syaalo si wasuubisa bakuuka yaabwe?

¹³Ndahanyoole yeena enyama yinyala ohuyera abaandu bano boosi? Beedinyire ohulumirira nibasaba enyama.

¹⁴Ese syeeng'ene haba siinyala huchuunirwa abaandu bano boosi; biihira muno.

¹⁵Nikali mbwe niwemeeda oti, maya kaanjiita-bwiita, haye ohwemeeda ohwesimiirisira obwaalaba bwao haandi.”

¹⁶Omwaami yaboolera Musa ati, Laanga abasaacha b'oluyaali amahumi kataanu-na-kabiri, abamanyihaane koti abeemirisi b'abaandu, mani obaleete yi ndi ena Eyeema ly'Ohubaao hwaange, obaboole bahweeme hu ndulo.

¹⁷Njicha ohwiiha njiche nomanome naawe eyo, mani mbukuleho hu mwooyo ku ndahuberesa mbabeerese.

¹⁸Bulaanu boolera abaandu oti, Mweelabye hulwa muchuli; muchia ohunyoola enyama y'ohulya. Omwaami awuliire nimuchuunirwa haandi nimuboola muti, mwekoombere ohubaaho neende enyama haandi muti mwali bilai muno mu syaalo sy'e Misiri ohuhiraho koti lu muli ano. Bulaanu Omwaami achia ohubaberesa enyama, muchia ohuyiriira elalira

¹⁹Muchia ohuyilya, ataali hu ludaalo lulala, oba hu ndaalo chibiri, oba chitaanu, oba ehumi, oba kata hu ndaalo amahumi kabiri,

²⁰nae hulw'omwoosi mulaamba, ohwoola lu yirinyalira ohubatula mu matwi keeng'we, ohwoola lu muliyisinyihira mwayisalaanga. Sino sichia ohuba sityo olwohuba mwahaya Omwaami obalimo ano haandi mwamwekanyiirisira muti muba mwahaya ohutula mu Misiri.

²¹Musa yaboolera Omwaami ati, “Ese mbano ndi ohwiimiriraanga abaandu elifu emia chisaasaba (600,000), naawe oboola oti ochia ohunyala ohubaberesa enyama yibaera omwoosi omulaamba?

²²Mani eng'oombe neende amakoondi binyala ohubaao ebinyala ohwiitwa byaaera ohubeekusa? Eng'eeni chomu nyaanja choosi mani chahabaera?”

²³“Mani yiriyo esikero sy'obunyala bwaange?” Omwaami yakobolamo ati, “Ochia ohubona bi mboolere bino nibichia ohwehoola, oba haba.”

²⁴Musa yatula erwaanyi yaachia yaboobera abaandu ebiindu bi Omwaami yali naaboolere. Yalaaliha abeemeresi amahumi kataanu-na-kabiri mani yaabahola beebodoohania Eyeema.

²⁵Mani Omwaami yeeha aasi naali mu sireesi, yaalomaloma nae. Yabukula hu mwooyo ku yali niyaberesa Musa, yaakuberesa abeemirisi abo amahumi kataanu-na-kabiri. Mani omwooyo okwo nikwamala ohubeehaho, bachaaka ohwaayula koti abanabbi, nae hulw'esiha sidiidi sa.

²⁶Babiri hu beemirisi amahumi kataanu-na-kabiri, Elidaadi, neende Medadi, bali nibadoong'ere mu kaambi nibataatulire erwaanyi bachia eyiri Eyeema. Era yi bali nibali mu kaambi, omwooyo okwo kweecha kwaaboolaho, mani bosi baachaaka ohwaayula koti abanabbi.

²⁷Omusyaani muraaga wuundi yeeruha yaatula erwaanyi mani yaachia yaboobera Musa bi Elidaadi neende Medadi bali nibahola.

²⁸Mani Yosua omwaana wa Nuuni owali naali omuhoonyi wa Musa ohutula naali omusyaani muraaga, yalomalamera aakulu mani yaboobera Musa ati, “Omuhuluundu, ewe baakamie sa.”

²⁹Musa yakobolamo ati, “Ewe, ebiindu bi ndaha hane wesi bihuchuuna sa? Ese ndekoomba endi Omwaami yahahoyere yaakaba mwooyo wae abaandu bae boosi mani haandi yaabahola boosi baayulaanga koti abanabbi.”

³⁰Mani Musa alala neende amahumi kataanu-na-kabiri hu Abaisiraeli baakobola engo mu kaambi.

³¹Abweene ao, Omwaami yatuma omuyaka okwaleeta esiindu ohutula mu nyaanja, nichibburuhira aasi atahira emiita ndala ohutula hu loba. Cheecha chaakwa mu kaambi mwoosi, neende ohwebodoohania ekaambi eyo, ekilomiita enyiingi muno buli lubeka. Chakwa mu kaambi haandi neende ohwebodoohania ekilomiita enyiingi muno, ohwoola lu chebuungihanaho chiola esituuli sy'emita ndala ohutula hu loba.

³²Mani oludaalo olwo lwoosi, neende esiro esyo syoosi, haandi hwoola oludaalo lwaloondaho lwoosi, abaandu bali nibaholaanga sa omulimo kw'ohudoola esiindu; abulao omuundu wadoola echiri aasi wa ekiloguraamu elifu ndala. Mani baachibakala ohwooma mu kaambi yoosi.

³³Mani enyama nichali nichisisiiriwo esaabi ech'ohulya, Omwaami haandi yanyoolerera abaandu abo mani yaabakwiisamo oluumbe lubi.

³⁴Abuundu ao yakulihwa ati Kibburoti Hatafa (esyeekesa mbwe, “Eng'ani ch'Obuluma”), olwohuba ao niwo yi basiiha abaandu bafwa obuluma bw'enyama.

³⁵Nibatula ao, abaandu bawuuya bachia Haserooti, yiboombaha ekaambi yiindi.