Read saamia Ohubala 12 Bible Online

Ohubala 12 - saamia bible

Ohubala 12

¹Musa yali niyadeehya omuhasi Mukuusi, mani Miriamu neende Arooni nibamufunaana muno hulw'esiholwa sino.

²Baboola bati, Mani Omwaami alomalomeraanga sa mu Musa yeeng'ene? Efwe fwesi haba saanyala ohutulomalomerahoomo? Nae Omwaami hane yaawulira ebiindu bi bali nibaboola.

³(Musa yali omusaacha muloonga, omuloonga muno ohuhira omuundu yeesi owali hu syaalo huno.)

⁴Abweene ao, Omwaami yaboolera Musa, Arooni, neende Miriamu ati, “Ndaha eng'we mweesi badatu mutule mwiiche ena Yeema ly'Ohubaao hwaange.” Batula baachia,

⁵mani Omwaami yesi yeehera aasi mu siiro y'esireesi, mani yeecha yeema mu mulyaangiro kw'Eyeema, yahuuma n'aboola ati, “Arooni! Miriamu!” Mani babiri abo nibeetusayo,

⁶mani Omwaami n'aboola ati, “Bulaanu eng'we mutekeerese bulai bi njia ohulomaloma! Abanabbi nibaba mweeng'we, ese mbeyekesera mu huboneherwaanga mani nomanoma nabo mu bilooto.

⁷Sikabuhaaneho muno neende ese niinomanoma neende Musa omuhalaabani waange; Ndamuhola yaaba otuka abaandu baange boosi, Yisiraeli.

⁸Mani nomanomaanga nae, emoni-hu-moni, alafu bweene ataali mu minae daawe; yamala neende ohubonaho koti lu ndamera! Mani mwoola mutye ohumoonya Musa omuhalaabani waange?”

⁹Omwaami yabanyoolerera muno; mani koti lu yali n'awaao,

¹⁰esireesi syatula hu Yeema, mani esihoba sya Miriamu syoosi syafuunihwa neende oluumbe lubi mani syaakaluhaana syafwaana rachaari koti ebbaraafu. Arooni niyamutingaalaho, mani yabona ati Miriamu afuniihwe neende oluumbe lubi olwo,

¹¹yaboolera Musa ati, “Ndeheremo, Omuhuluundu, otaleha sa efwe hwasaandisibwa neende esinyaaso sino daawe, hulw'esyonoono syeefwe si siru sino.

¹²Otakera yoola ohufwaana koti esiindu syeebulwa nisifwiire, nisiliirwe esituundu sy'enyama yasyo yoosi.”

¹³Mani Musa yalirira Omwaami ati, “Ewe Nasaae, muwonie!”

¹⁴Omwaami yakobolamo ati, “Simwaana aba niyamufuucha mu bweeni bwae, aba yahadoong'ere mu soni echio endaalo chitaanu-na-chibiri. Mani leha mberi yeekalirweho erwaanyi w'ekaambi ohumala ejuma ndala hooho, hu mani luunyuma hu anyale ohwiingiswa haandi mukati.”

¹⁵Mani Miriamu yeecha yeekalirwa erwaanyi w'ekaambi endaalo chitaanu-na-chibiri enaamba, abaandu boosi baahaya ohukeenda ohwoola lu bamukobosa mu kaambi.

¹⁶Mani bulaanu batula mu Haserooti baachia boombaha ekaambi mu sichiimi sya Parani.