Read saamia Ohubala 13 Bible Online

Ohubala 13 - saamia bible

Ohubala 13

¹Omwaami yaboolera Musa ati,

²“Doola mulala hu beemirisi ohutula mu buli nono ehumi neende chibiri echio mani omale obatume koti abahemeresi ohuchia ohuseena mu syaalo sya Kanani, siinjia ohuberesa Abaisiraeli.”

³Mani Musa yaabatuma nibatula mu sichiimi sya Parani, ohweema hu silagiro sy'Omwaami, boosi nga bali abasaacha bali abeemirisi b'abaandu ba Yisiraeli.

⁴Kano niko akali ameeta kaabwe: Ohutula mu nono ya Rubbeeni, yali Samua omwaana wa Sakuri;

⁵ohutula mu nono ya Simeoni, yali Safati omwaana wa Hoori;

⁶ohutula mu nono ya Yuda, yali Kalebbu omwaana wa Yefune;

⁷ohutula mu nono ya Yisikari, yali Yigali omwaana wa Yosefu;

⁸ohutula mu nono ya Efuraimu, yali Hosea omwaana wa Nuuni;

⁹ohutula mu nono ya Bbenjamini, yali Paliti omwaana wa Rafu;

¹⁰ohutula mu nono ya Sebbuluuni, yali Gadieli omwaana wa Soodi;

¹¹ohutula mu nono ya Yosefu (Esyeekesa mbwe ohutula mu nono ya Manaase), yali Gaadi omwaana wa Suusi;

¹²ohutula mu nono ya Daani, yali Amieli omwaana wa Gemali;

¹³ohutula mu nono ya Aseri, yali Seturi omwaana wa Mikaeli;

¹⁴ohutula mu nono ya Nafutaali, yali Nahibbi omwaana wa Fofusi;

¹⁵ohutula mu nono ya Gaadi, yali Gueli omwaana wa Maachi.

¹⁶Bano nibo abali abahemeresi ba Musa yatuma ohuchia ohuseena eloba elyo.

¹⁷Musa niyabatuma batula baachia, yababoolera ati, “Muchie muniine emukulu nimutulira ano mu situundu sy'emwaalo sy'eloba lya Kanani, hu mumale muchie mwoole mu syaalo sy'ebigulu esyo.

¹⁸Teeberese mumanye embya y'esyaalo sino koti lu yiri, ni abaandu baanga abasimenyamo, haandi koti lu maani kaabwe kaaka.

¹⁹Teeberese mumanye oba eloba elyo lai oba bi, haandi oba abaandu bamenya mu biko bitaali ebisitirire, oba mu biko biri mu ngoba.

²⁰Teeberese mumanye oba eloba gimu haandi oba esyaalo sy'ebichaha. Muhole amaani mukaluheho neende ebyaamo byomu syaalo esyo.” (Syali esiha si emisabbiibbu kichaakiramo ohweenga.)

²¹Abasaacha abo beemao baaniina emukulu baalambuula esyaalo esyo ohutulira mu sichiimi sya Siini emwaalo, ohuniinana ohwoola Rehobbu, aambi neende Hamati-Pasi esiri emukulu bweene.

²²Bataangira ohuchia beengira mu situundu sy'emwaalo boola mu Hebburoni, yi njia cha Ahimani, Sesai, neende Talumai, abeechuhulu b'olwiibulo lwa kirahula, kilaangwa mbwe Anakimu, yi bali nibamenya. (Hebburoni syafuumbulwa emyaaka kitaanu-na-kibiri ohutaangirira Soani siri mu Misiri.)

²³Boola mu hoondo y'Esikoli, mani eyo baakula esaga lala elyaliho esibulyaata sy'emisabbiibbu esisito muno esyadaha abasaacha babiri ohusikiingira hu mutubaangiro kuba akati waabwe. Haandi baleetaho neende namulwa neende ochiooga.

²⁴(Abuundu ao yeecha yaakulihwa mbwe “Ehoondo y'Esikoli”, hulw'esaga ly'omusabbiibbu li Baisiraeli baakula eyo.)

²⁵Luunyuma lw'ohulambuula esyaalo esyo endaalo amahumi kane amalaamba, abahemeresi abo bakobola engo

²⁶eyiri Musa, Arooni, neende abaandu boosi aba Yisiraeli nibali mu Kadesi mu sichiimi sya Parani. Baboola byoosi bi bali nibabweene, haandi baabeekesa ebyaamo bi bali nibakiingire.

²⁷Baboolera Musa bati, “Hwalaambuulire esyaalo mani hwaabona huti, silai nisyo haandi sy'embolela; mani ano mbano aliwo ebyaamo byaasyo biindi.

²⁸Nae abaandu bamenyayo b'amaani muno, haandi ebiko byaabwe bi bihoongo muno haandi biri mu ngoba ndai muno. Haandi obudinyu buhira, hwabweeneyo abeechuhulu ba kirahula nibaliyo.

²⁹Abamaleki nibo abamenya mu situundu syasyo sy'emwaalo; Abahiiti, Abayebbusi, neende Abaamoori nabo bamenya mu syaalo sy'ebigulu; nae Abakanani nibo abamenya aambi neende Enyaanja ya Mediterania, haandi neende hu ndulo w'Omwaalo kwa Yorodaani.”

³⁰Kalebbu yawuleeresa abaandu bali nibali ohwekanyisaanga Musa, mani n'aboola ati, “Efwe huhoyere ohuseeta bulaanu buti mani huyaaye esyaalo sino; efwe huli neende amaani kanyala ohubayiingira.”

³¹Nae abasaacha bali nibachia neende Kalebbu baboola bati, “Haba, efwe sihuli neende amaani katunyalisa ohubaseeta daawe; abaandu bali eyo bali neende amaani kahira akeefwe.”

³²Abo bachaaka ohuwonia obubacha mu Baisiraeli obudiira hu syaalo sibali nibalaambuulire. Baboolaanga bati, “Esyaalo esyo kata sisinyala hwiibula ebyohulya binyala ohuliisa abaandu bamenyayo beene. Buli muundu yihwabonaangaho yalichiingi omuleeyi muno,

³³haandi hwabonayo neende kirahula kyeene nikiriyo, ekiichuhulu kya Anaka. Hwebonaanga koti amadeede mu moni waakyo, nihaandi nilwo lu hwabonehanaanga yi kiri.”