Read saamia Ohubala 19 Bible Online

Ohubala 19 - saamia bible

Ohubala 19

¹Omwaami yalagira Musa neende Arooni

²ohuberesa Abaisiraeli ebilagiro biloondaho bino. Leete eyiri Musa neende Arooni, eng'oombe ya laando aai eyibulaho obufwoolwa bwoosi, haandi eyisisiiri ohwehoonyerwaho ohuhola omulimo kwoosi,

³bayiberese Eliasaari omulaamisi. Yiba bulaanu yihoyeere ohutusibwa erwaanyi w'ekaambi, mani yiitirwe mu moni wae.

⁴Bulaanu Eliasaari aba achia ohubukulaho hu mabaanga kayo, mani niyehoonyera olwaala lwae, akaanyuse amahabi kataanu-na-kabiri n'alingiisye eyiri Eyeema.

⁵Esyaayo syoosi, n'oteereho neende eseero lyeene, enyama, amabaanga, neende amala, bihoyere ohusaambirwa mu moni w'omulaamisi ohwoola lu bikwa ekohe.

⁶Mani bulaanu ahoyere ohubukulaho embaao ch'omutuumba, esijuuru sy'omululuusa, neende omukoye kwa ranjaai, mani amale abisukune mu muliro.

⁷N'amalire atyo, ahoyeere ohuchia yoosa engubo chae mani yeechuhaho amaachi ako, huyeengira mu kaambi; nae adoong'a sa n'asisiiri ow'omusiro ohwoola engoloobe.

⁸Omusaacha oba niye osaambire eng'oombe eyo, yesi aba ahoyere ohwoosa engubo chae mani yeechuhaho amaachi ako, mani adoong'a sa naali ow'omusiro ohwoola engoloobe.

⁹Mani omusaacha wuno naali ow'omusiro, aba niye oba achia ohubuusa alala ekohe ly'eng'oombe ya laando elyo, mani amale alikiinge alite abuundu alafu koti emiduunga kiboola, erwaanyi w'ekaambi, yirihoyere ohubiihirwa abaandu Baisiraeli ohwehoonyeraanga mu hutekeha amaachi kamalaho omusiro koti emiduunga kiboola. Omuduunga kuno kuholwaanga ohumalao esyonoono.

¹⁰Omusaacha oba n'abuusire ekohe elyo aba ahoyere ohwoosa engubo chae, nae omweene adoong'e sa naali ow'omusiro ohwoola engoloobe. Esilagiro sino sichia ohuholaanga ebiha byoosi ebiicha mu moni, byoombi hu Baisiraeli neende hu bateende baba nibabamenyamo.

¹¹Oyo yeesi odiira hu mulaambo, aba yeebahire omukwoobo ohumala endaalo chitaanu-na-chibiri.

¹²Aba ahoyere ohweelabya neende amaachi k'ohulabisibwa hu ludaalo lwa hadatu, haandi neende hu ludaalo lwa hataanu-na-habiri, ao hu anyale ohuba naali omulafu. Nae n'atelabya hu ndaalo echo choombi, olwa hadatu neende olwa hataanu-na-habiri, haba saaba naachia ohuba naali omulafu.

¹³Oyo yeesi odiira hu mulaambo mani yaahaya ohwelabya, adoong'a sa naali ow'omusiro, olwohuba amaachi k'ohulabisibwa haba sikaba nikamweeyanyukuliireho. Bulaanu aba abaha Eyeema ly'Omwaami omukwoobo, mani haandi saaba naachia ohuba nasiiyirwa koti mulala hu baandu ba Nasaae daawe.

¹⁴Omuundu yeesi n'afwiira mu Yeema, omuundu yeesi oba naali mu yeema omwo esiha syeene esy'ohufwiiramo esyo, oba oyo yeesi oliingiramo, yeehola sa ow'omusiro hu ndaalo chitaanu-na-chibiri.

¹⁵Buli jaagi, kata neende esyoongo yoosi ebiba nibiri mu yeema omwo, ebitafuniihweho, byoosi byeehola sa eby'omusiro.

¹⁶Omuundu yeesi naadiira hu muundu oba niyeeterwe, oba naaba omweene n'afwiire sa oluumbe lwabuli nyaanga, naali erwaanyi, oba omuundu yeesi niyeecha yadiira hu kuumba oba esiriindwa sa, yeehola ohuba neende omusiro ohumala endaalo chitaanu-na-chibiri enaamba.

¹⁷Ohumalaho omusiro okwo, ekohe liindi ohutula hu ng'oombe ya ranjaai eyiba niyasaambwa ohumalao esyonoono, nilyo eliba nilichia ohubukulwa, mani liteebwe mu ndamu, mani amaachi malai kachuhweho.

¹⁸Muhutaangira hweene, omuundu oba niye oli neende omusiro, ahoyere ohubukula omujuuru kw'omululuusa, mani akwiinihe mu maachi, mani amale ayaanye hu yeema, neende hu buli siindi syomuukati syoosi, neende abaandu boosi ababa nibabeere mu bweene omwo. Mu huloondaho, omuundu oba nataaliho omusiro, niye oba naachia ohwaanyukulira amaachi hu musaacha oba n'adiirireho hu kuumba oba omubiri kufwiire, oba sa hu siriindwa.

¹⁹Hu ludaalo lwa hadatu, haandi hu ludaalo lwa hataanu-na-habiri, omuundu oba naali omulafu, niye oba nahoyeere ohuchia yaayanyukulira amaachi ako hu muundu w'omusiro. Hu ludaalo lwa hataanu-na-habiri, niye oba n'ahoyeere ohulabya omusaacha oyo, yi, luunyuma lw'ohwoosa engubo chae, haandi n'amalire neende ohwechuhaho amaachi ako, yeehola omulafu elyuuba nilikwa.

²⁰Omuundu yeesi omalire ohweebaha omukwoobo, nae haba saachia yeelabya, adoong'a sa naali ow'omusiro, olwohuba amaachi k'ohulabisibwa haba sibakaba nikamwaanyukulirwaho daawe. Aba abaha Eyeema ly'Omwaami omukwoobo mani haba saaba naachia ohuyirwa koti mulala hu baandu ba Nasaae daawe.

²¹Muhoyere ohuloondakana neende elako lino ebiha byoosi ebiicha mu moni. Omuundu ohwaanyukulusa amaachi k'ohulabisibwa yesi ahoyere ohwoosa engubo chae; haandi omuundu yeesi okadiiramo, yesi adoong'a sa naali ow'omusiro ohwoola engoloobe.

²²Buli siindu syoosi si muundu w'omusiro adiiraho syosi siba syeholere esy'omusiro, nae haandi oyo yeesi osidiiraho yesi adoong'a sa naali ow'omusiro ohwoola engoloobe.