Read saamia Ohubala 21 Bible Online

Ohubala 21 - saamia bible

Ohubala 21

¹Omutuki Mukanani w'Aradi esituundu sy'emwaalo wa Kanani niyawulira ati Abaisiraeli bali nibali ohwiichira hu ngira ya Atarimu, yachia yaabaseeta yaabapeeyaho abaandu baandi.

²Mani Abaisiraeli nibeecha nibahola esichubo eyiri Omwaami bati: “Niwahatuhoonye mani hwaayiingira abaandu bano, huchia ohweyaanayo yooli alala neende ebiko byaabwe, mani hubasihirise.”

³Omwaami yabawulira mani yabahoonya ohuyiingira Abakanani. Abaisiraeli basihirisira elalira neende ebiko byaabwe, mani nibalaanga abuundu ao bati, “Horima.”[1]

⁴Abaisiraeli batula hu Lugulu Hoori, nibaloonda hu ngira yichiira ena Musoma kwa Akabba, hu banyale ohwebodoohania obwaami bwa Edomu. Nae nibali hu bali hu ngira, abaandu bajoong'a ohwesimiirisa

⁵bachaaka ohumoonya Nasaae neende Musa. Bekanyisaanga bati, “Lwasiina mwatutusa mu Misiri ohwiicha ohufwiira mu siparara sino, eyibula ebyohulya kata sa amaachi? Humalire ohuhaya ohwemeeda nihwesimiirisira ebyohulya by'engisa bino!”

⁶Omwaami yabasiindihamo enjuha ch'obusiba, Abaisiraeli baangi nibalumwa mani nibafwa.

⁷Abaandu haandi bachia eyiri Musa baboola bati, “Hwonoonere nihulomaloome hu Nasaae, haandi neende nihulomaloome hu ewe. Nae bulaanu, ewe wekoongoye eyiri Omwaami amaleo enjuha chino.” Musa yasabira abaandu.

⁸Omwaami yaboolera Musa ohuhola enjuha y'esichuma haandi ohuyita hu muguulo, hu bulaanu buli muundu owalumwaanga, yachichaanga ohwewuunjaho mani awona.

⁹Musa yahola enjuha y'omugasa, mani yayaaniha hu muguulo. Buli muundu owalumwaangwaho, yachichaanga ohwewuunja hu njuha y'omugasa mani awona.

¹⁰Abaisiraeli haandi bakeenda nibawaao mani haandi baata ekaambi mu Obbooti.

¹¹Nibatula abuundu ao, baata ekaambi mu mukuunda kwa Abbariimu mu sichiimi siri ebukwe w'obwaami bw'Esimoabbu.

¹²Mani baata ekaambi mu Hoondo ya Seredi.

¹³Ohutula ao, bawuuya mani bachia haandi baata ekaambi hu lwaande lw'emukulu lw'Omwaalo Arinooni, okuli mu sichiimi silandaala syeengira mu bwaami bw'Esimoori. (Arinooni nilwo olwali olwaaho lwali akatikaati w'Abamoabbu neende Abaamoori.)

¹⁴Esyo nisyo esikera Esitabo sy'Ebiita by'Omwaami silomaloma hu “esiko sya Wahebbu abuundu wa Sufa, neende ehoondo; Omwaalo Arinooni,

¹⁵neende hu siholomoho hw'ehoondo chilandaala ohwoola mu siko sy'Ari haandi nichichiira hu lwaaho lwa Moabbu.”

¹⁶Nibatula ano, bemeeda mu moni mani bachia boola abuundu alaangwa “Welesi”, yi Omwaami yaboolera Musa ati, “Hung'aania alala abaandu, mani mbaberese amaachi.”

¹⁷Esiha esyo nisyo si baandu ba Yisiraeli beemberamo olweembo luno: “Ewe Welesi tusa amaachi kao; Mani hukaheesere olweembo

¹⁸Esulo yayabwa neende abaana b'omwaami Haandi neende abeemirisi b'abaandu, Yayabwa neende endabuhi y'obwaami Haandi neende esaala chaabwe.” Bakeenda baatula mu sichiimi, boola Matana,

¹⁹ohutula ao, bachia Nahalieli, ohutula Nahalieli bachia Bbamooti,

²⁰ohutula Bbamooti, bachia mu hoondo yali mu bwaami bw'Abamoabbu, aasi w'aakulu wa Lugulu Pisiga, olutingaalire aakulu w'esiparara.

²¹Bulaanu abaandu ba Yisiraeli batuma bawamwaanda eyiri omutuki w'Abaamoori Sihooni ohuboola bati:

²²“Tuleheho hubite huhalakanie mu loba lyao. Efwe, kata neende ebyaayo byeefwe, haba sihuchia hutulaho huungira, mani huchie hwiingireho mu mikuunda, mu mituli, haandi haba sihuchia hung'waaho hu maachi kali mu sulo chao daawe; huchia ohuhayira hu ngira ya nahuluungu ohwoola lu huchia ohuba nihumalire ohutula mu bwaami bwao.”

²³Nae Sihooni haba siyakanya ohufukiirira abaandu ba Yisiraeli ohubita baahalakania mu bwaami bwae. Nae yahung'aania alala amaye kae, mani yaamala yaatula yaachia mu Yahasi mu sichiimi mani n'aseeta Abaisiraeli.

²⁴Nae Abaisiraeli beeta abasuku baangi muno mu biita mani baanyala ohuyaaya eloba lyaabwe ohutulira elalira hu Mwaalo kw'Arinooni emukulu wa Yabboko, esyekeese siti ohwoola hu Abaamooni, olwohuba olwaaho lw'Esiamooni lwali nilwaliindwa neende amaani maangi muno.

²⁵Mani sakira abaandu ba Yisiraeli banyala ohudiira ebiko by'Abaamoori byoosi, n'oyiriramo neende Hesibboni neende ebiko byoosi ebisyebodohaanie, mani nibamala nibabimenyamo sa.

²⁶Hesibboni nisyo esyali esiko sihunuufu esy'omutuki w'Abaamoori Sihooni, owali niyalwaania omutuki muhale wa Moabbu mani niyanyala ohudiira eloba lyae lyoosi, ohwoolera elalira hu Mwaalo kwa Arinooni.

²⁷Esyo nisyo esikeraanga abacheresi nibeemba mbwe, “Ewe yicha mu Hesibboni, mu siko sya Sihooni! Hweenya huboneho nisinyala ohwoombahwa syakoboswao.

²⁸Hale mu siko sya Hesibboni sino Eeye lya Sihooni lyasobohayo koti omuliro; Lyasihirisa sa esiko sy'Ari mu Moabbu Haandi lyamuheenya ebigulu by'Arinooni emukulu.

²⁹Chibaakaanire eng'we abaandu ba Moabbu! Eng'we mbwe abeenamiri ba Kemosi basihiriiswe! Nasaae weeng'we yaleha sa abasaacha beehola namweyikami, Nae abahasi beehola abawaambe b'omutuki w'Abaamoori.

³⁰Nae bulaanu abeechuhulu baabwe bamalire ohusihiriswa, Ohutulira elalira hu Hesibboni ohwoolera elalira hu Dibboni, Ohutulira elalira hu Nasimu ohwoolera elalira hu Nofa, aambi neende Medeba.”

³¹Kata katyo, abaandu ba Yisiraeli banyala ohumenya mu bwaami bw'Abaamoori,

³²Musa yaatuma abasaacha bachie babone engira yihira obulai ohuseeteraho esiko sya Jaseeri. Abaisiraeli bachia baasidiira alala neende ebiko biindi ebyali nibisyebodohaanie, mani nibamala nibeerusamo Abaamoori boosi abali nibabimenyamo.

³³Bulaanu Abaisiraeli bakaluuhana badiira engira yichiira Bbasani, nihaandi omutuki Ogu owa Bbasani niyeecha nasiingira alala neende eye lyae, ohubaseetera Edirei.

³⁴Omwaami yaboolera Musa ati, “Ewe otamutya daawe. Ese niise ochia ohukera mu muyiingire, neende abaandu bae boosi, alala neende eloba lyae lyoosi. Mu muhole koti mwahola Sihooni, omutuki Muamoori owali naatukira mu Hesibboni.”

³⁵Kata katyo, Abaisiraeli beeta Ogu, abaana bae, alala neende abaandu bae, nibatalehao kata mulala, mani baamala baamenya mu loba lyae.