Read saamia Ohubala 22 Bible Online

Ohubala 22 - saamia bible

Ohubala 22

¹Abaisiraeli bemeeda mu moni mani bachia boombaha ekaambi mu syaalo sya Moabbu sikwalaafu esiri ebukwe wa Yorodaani nae esitekehaane neende Yeriko.

²Mani omutuki wa Moabbu, Bbalaki omwaana wa Sipori, yeecha yaawulira bi Baisiraeli bali nibaholere Abaamoori, haandi neende koti obuungi bw'Abaisiraeli bwali,

³omweene neende abaandu bae bakwaamo oluteengo.

⁴Abamoabbu baboolera abeemirisi b'Abamidia bati, “Esikwamalalu sino hane mbano siri aambi bweene ohusihirisa buli siindu sitwebodohaanie, koti esurusi yaaya obunyaasi mu lwaayiro.” Mani sakira ewe omutuki Bbalaki

⁵tuma bawamwaanda bachie balaange Bbalamu omwaana wa Bbeyore, owali naali Petoori, aambi neende Omwaalo Ewufuraate mu syaalo sya Amawu. Bamuyirira ehuwa lino ohutula eyiri Bbalaki: “Ese ndaha ewe omanye oti esyaalo esilaamba nisyo esyatula mu Misiri; mani abaandu basyo bali ohusaalaanira buli abuundu, bali kata neende ohutiisa-tiisa bati banyala kata ohuyira eloba lyeefwe lyoosi.

⁶Batuhira obuungi, tuleheremo mani wiiche obateeho esibwaabo hulwaange. Mani awuundi efwe hwaheecha hwaanyala ohubayiingiraho hwaabeerusa baatula mu loba lyeefwe. Ese manyire endi ewe nosabira abaandu ehabi, abaandu abo bayinyoolaanga sa, nae noobabwaaba, baberaanga sa aasi w'esibwaabo esyo.”

⁷Kata katyo, omwiimirisi w'Abamoabbu neende owa Abamidia bakiinga bachia neende omutuulu kw'ohutuungira esibwaabo, bachia eyiri Bbalamu, mani baamala baamuberesa ehuwa ohutula hu Bbalaki.

⁸Bbalamu yababoolera ati, “Koneho ano esiro sino, mani muchuli mba njia ohubaboolera esyo syoosi si Omwaami aba achia ohumboolera.” Abeemirisi b'Abamoabbu bakanya ohuba neende Bbalamu.

⁹Nasaae nae yeecha eyiri Bbalamu mani yaamuteeba ati, “Abasaacha bano nibo ba naanu abadoong'ere naawe?”

¹⁰Nae yamukobolamo ati, “Omutuki Bbalaki owa Moabbu niye obatumire ohwiicha ohumboolera

¹¹mbwe abaandu batula mu Misiri basalaaniire mu syaalo sino syoosi. Mbwe ali ohudaha ese niise oba mbabwaabire hulwae, hu anyale ohubalwaania abeeruse batule baweeo.”

¹²Nasaae nae yaboolera Bbalamu ati, “Otachia neende abasaacha bano, haandi otabwaabaho abaandu ba Yisiraeli daawe, olwohuba abo baliho ehabi chaange.”

¹³Nibwahya echuli, Bbalamu yaachia eyiri bawamwaanda ba Bbalaki yababoolera ati, “Eng'we mukobole sa engo weeng'we; Omwaami ahaire ohuunganya njie naang'we.”

¹⁴Mani baakobola eyiri Bbalaki, nibamuboolera bati Bbalamu ahaire ohwiicha nabo.

¹⁵Bbalaki yatuma abeemirisi baangi muno ohuhiraho bala, abali neende oluyaali luhoongo luhiraho olw'abaandi bataangira bala.

¹⁶Bachia eyiri Bbalamu, mani nibamala nibamuberesa ehuwa lino liti ohutula eyiri Bbalaki: “Ndeheremo, otakanya esiindu syoosi syaahukaira ohwiicha yi ndi!

¹⁷Njia ohuhweebasa lukali muno haandi hole esiindu syoosi sy'ochia ohuboola. Ndeheremo wiiche obwaabe abaandu bano hulwaange.”

¹⁸Nae Bbalamu yakobolamo ati, “Ese kata neende Bbalaki niyahambeere efeesa yoosi neende esaabbu yoosi ebiri mu dooho lyae, haba sindahanyalire ohuhaya ohufunihira esilagiro sy'Omwaami, Nasaae waange, kata neende mu biindu bihiramo obudiidi.

¹⁹Nae kata katyo, mudoong'e eno esiro sino, koti lu baandi bala bosi bahola, hu nyale ohumanya oba Omwaami n'ali neende esiindu siindi esy'ohumboolera oba haba.”

²⁰Mani esiro esyo, Nasaae yeecha eyiri Bbalamu yamuboolera ati, “Nikali mbwe abasaacha bano beechere ano ohuhusaba mbwe ochie nabo, weetekehe ohuchia nabo, nae hola esyo syoong'ene siimba nihuboolere.”

²¹Nibwahya muchuli, Bbalamu yata esisaala hu suhiri yae, n'achia neende abeemirisi b'Abamoabbu.

²²Nasaae yanyoolera muno ohubona mbwe Bbalamu yali naali ohuchia koti lu Bbalamu yali naniinire hu suhiri yae n'awaao, n'achiaana neende abahalaabani bae babiri, malaika w'Omwaami mani yeema mu ngira ohumwikalira engira.

²³Mani esuhiri niyabona malaika oyo niyeemere ao n'adiirire olugaanga, yakabuha yaatula hu ngira mani niyimaala mu mikuunda. Bbalamu yahuya esuhiri eyo ohwoola lu yayikobosa hu ngira.

²⁴Bulaanu malaika yachia abuundu yi ngira yinyereerera niyibita akatikaati w'endalo chibiri ech'enduli, mani yaliwo esida sy'amakina hu buli lwaande.

²⁵Esuhiri haandi niyabona malaika wula, yehuluuda hu sida mani yakuuda esikala sy'ohukulu hwa Bbalamu hu sida ohwo. Bbalamu haandi yahuya esuhiri yae.

²⁶Haandi ehabi liindi, malaika oyo yasuda mu moni; yachia yeema abuundu adiiyu muno eyali n'abula obweyaango bwoosi hu nyaande choombi.

²⁷Ehabi lino, esuhiri niyeecha yaabona malaika oyo, yakona sa aasi hu buloba. Bulaanu Bbalamu yatula mu mbeera, mani n'achaaka ohutoocha esuhiri yae neende endabuhi yae.

²⁸Bulaanu Omwaami yaberesa esuhiri eyo obunyala bw'ohulomaloma, mani esuhiri yaboolera Bbalamu yiti, Siina syeene si huholere? Lwasiina wahaahuya amahabi kano kadatu koosi?

²⁹Bbalamu nae yakobolamo ati, “Olwohuba ewe oli ohuuholaanga fwaana koti omusiru! Mba mbeere neende olugaanga mba malire ohuhwiita sa.”

³⁰Esuhiri yosi yamukobolamo yiti, “Ese haba siniise esuhiri yeene yira eyahahukiinga obulamu bwao bwoosi.” Bbalamu nae yakobolamo ati, “Haba.”

³¹Bulaanu Omwaami yeecha yaakera Bbalamu yaanyala ohubona malaika niyeemere abweene ao neende olugaanga lwae; mani Bbalamu yeehubba aasi mafumaame neende obweeni bwae hu buloba.

³²Malaika yateeba Bbalamu ati, “Ewe lwasiina wahahuya esuhiri yao otyo amahabi kadatu amalaamba? Ese njichire ohwiikala engira yao, olwohuba ewe sooba nooli ohuchia olukeendo luno daawe.

³³Nae esuhiri yao yibeere niyimbweene hale, niyikabuheenge amahabi kadatu amalaamba. Yiba niyibeere niyitambweene, mba malire ohuhwiita hale, nae ohuleha esuhiri enamu.”

³⁴Bbalamu bulaanu yakobolamo ati, “Ese hane nyonoonere. Haba simbeere niimanyire endi hane ewe weemere mu ngira ohuungaira; nae bulaanu nikali mbwe obaasa oti sisobyo nisyo ese ohwemeeda neende olukeendo luno, ha ngaluuhane ngobole engo.”

³⁵Nae malaika n'aboola ati, “Ewe chiaana neende abasaacha bano, nae chia oboole esyo syoong'ene si njia ohuba nihubooleere.” Mani Bbalamu yemeeda ohuchaana neende abasaacha abo.

³⁶Bbalaki niyawulira ati Bbalamu yali niyeecha, yatula ohumubukaanira mu Ari, esiko sihuluundu esiri hu Mwaalo Arinooni hu lwaaho lwa Moabbu.

³⁷Bbalaki yamuboolera ati, “Lwasiina ewe haba siweecha nindahulaanga olwataangira? Wabaasa oti ese haba siindi neende obunyala bw'ohuhweebasira ebiindu biyera?”

³⁸Bbalamu nae yakobolamo ati, “Ngaandi ese ndeecha, kose haba? Nae kata bulaanu buti, bunyala siina bu ese ndi nabwo? Ese nyala ohuboola esyo syoong'ene si Nasaae yamboolera ohuboola.”

³⁹Mani katyo, Bbalamu yaachia neende Bbalaki mu siko sya Husoti,

⁴⁰yi Bbalaki yasiinjira eng'oombe neende amakoondi, naakabaho Bbalamu enyama chiindi neende abeemirisi baandi bali bachiire alala nae.

⁴¹Nibwahya echuli yaloondaho, Bbalaki yabukula Bbalamu mani yamuniinia yamwoosa Bbamooti-bbaali, yi Bbalamu ananyala ohubonera esituundu sy'abaandu ba Yisiraeli.