Read saamia Ohubala 24 Bible Online

Ohubala 24 - saamia bible

Ohubala 24

¹Ohwoola esiha sino Bbalamu bulaanu yali n'amalire ohumanya ati Omwaami yali n'amudahiise ohuberesa ehabi abaandu ba Yisiraeli, haba siyakobolayo ohuchia ohukoonyeresa obulolero daawe, koti lu yaholaanga hale. Yakaluuhana yatingaala ena siparara

²yabonera elalira abaandu ba Yisiraeli nibamenyere nibakabuhaaneengemo emikaanda-emikaanda ohweema hu buli nono. Mwooyo wa Nasaae bulaanu yamuniina,

³yatuumbula obunabbi buno buti: “Emboosi cha Bbalamu omwaana wa Bbeyore, Emboosi ch'omusaacha onyala ohubona bulai muno,

⁴Oyo onyala ohuwulira bi Nasaae alomaloma. Neende emoni chihang'aasire mbona mayuula Ohuboneherwa hutula eyri Nasaae w'Obunyala.

⁵Amayeema ka Yisiraeli nga manyirifu,

⁶Koti enyiriri endeeyi ch'eminaasi Oba koti endalo chohuugenya ly'omwaalo, Koti amakaha ka Omwaami yataaka Oba koti emiseengese kiri huundulo w'amaachi.

⁷Bachia ohunyoola efula embitiirifu Mani bataake emwo yaabwe mu mikuunda kirimo omunyiti kumala. Omutuki waabwe achia ohuba omuhunuufu ohuhiraho neende Agaga, Haandi obutuki bwae buchia ohubaambaliyisibwa mubuleeyi neende mu bubaambali.

⁸Nasaae niye owabatusa mu Misiri; Abalwaanira koti eng'oombe ndaawu ndalu. Beenyinya abasuku baabwe, Baata amakuumba kaabwe, nibahalaka-halaka obuyiingo bwaabwe.

⁹Esyaalo esiri koti edalang'i nwaani; Niyiri ohukona abulao oyo yeesi onyala ohwenyiira ohuyisiingisa. Oyo yeesi oberesa Yisiraeli ehabi yesi aba achia ohunyoola ehabi, Nae oyo yeesi obwaaba Yisiraiei yesi aba achia ohubwaabwa.”

¹⁰Bbalaki yafuumba ebikoonde neende etima mani yaboolera Bbalamu ati, “Ese hulaangire ohwiicha ohubwaaba abasuku baange, nae ewe bulaanu kano mahabi kadatu amalaamba n'obaberesaanga sa ehabi.

¹¹Mani bulaanu siingira oweeo ochie engo wao! Ndali nisuubiise ohuhutuula, nae hane mbao Omwaami ahuhaire ohunyoola omutuulu okwo.”

¹²Nae Bbalamu yakobolamo ati, “Ese naange ndali nindaboolera bawamwaanda ba waandumira endi

¹³kata neende niwahabeere noochia ohuumba efeesa yoosi neende esaabbu yoosi eyiri mu dooho lyao, kata sindahanyalire ohulekeeresa esilagiro sy'Omwaami ndaahola esiindu syoosi esyaange. Njia ohuboola ebyo byoong'ene bi Omwaami yamboolera ohuboola.”

¹⁴Bbalamu yaboolera Bbaraki ati, Ese bulaanu mbano ngobola engo eyiri abaandu baange, nae nitawaao, ndi ohuhulabula ebiindu bi, abaandu ba Yisiraeli bachia ohuhola abaandu bao mu ndaalo chiicha.

¹⁵Bulaanu yatuumbula obunabbi buloondaho buno buti: “Emboosi cha Bbalamu omwaana wa Bbeyori, Emboosi ch'omusaacha onyala ohubona bulai,

¹⁶Oyo onyala ohuwulira bi Nasaae alomaloma Haandi yakaanira amakesi katula eyiri oyo owa Aakulu Muno. Neende emoni hang'aase, mbona mayuula Ohuboneherwa hutula eyiri Nasaae w'Obunyala.

¹⁷Ndewuunja mu biha biicha, Mani ndaabona esyaalo sya Yisiraeli. Omutuki, oli koti eng'ining'ini yimesa, ochia ohwiihala hu butuki mu syaalo esyo. Koti efumo lyahabbyoosohe n'atulira mu Yisiraeli. Achia ohuhuya abeemirisi ba Moabbu Haandi aseenakire aasi abaandu boosi aba Seeti.

¹⁸Achia ohuyiingirira abasuku bae mu Edomu Mani ahole eloba lyaabwe libe elyae, Yisiraeli niyisichiiririra sa niyisiyiingiraanga.

¹⁹Esyaalo sya Yisiraeli sichia ohubaseenakira aasi Mani yimale yimaliirise abahabe nibawonao.”

²⁰Mani niyali n'asisiiri muhuboneherwa, Bbalamu yabona Abamaleki yatuumbula obunabbi buno buti: “Amaleki syali nisiri esyaalo sihiramo byoosi amaani, Nae muhumaliiriha sichia ohusihiririra elalira.”

²¹Niyali naali muhuboneherwa yabona Abakeeni, yaatuumbula obunabbi buno buti: “Abuundu yi mwamenya ao w'omuleembe, w'omuleembe koti esiswi syateengehwa aakulu hu lwaande lw'olwaanda,

²²Nae kata katyo eng'we Abakeeni muchia ohusihiriswa Asiria nisichia ohubapeeya ohuwaao naang'we.”

²³Bbalamu haandi yatuumbula obunabbi buno buti: “Baandu siina bano abali ohwebuusira emukulu?

²⁴Abaseeti bachia ohusyaabala ohutula mu Saipurasi; Bachia ohuyiingira Asiria neende Ebberi, Nae abeene abo, mu hukalulirwa, bachia ohusihirira endaalo choosi pe.”

²⁵Bulaanu, Bbalamu niyamala atyo, yeetekeha yaakobolayo engo wae, nae Bbalaki yediirira engira yae.