Read saamia Ohubala 27 Bible Online

Ohubala 27 - saamia bible

Ohubala 27

¹Mahila, Nowa, Hogila, Milika, neende Tirisa bali abahaana ba Selofehaadi omwaana wa Hefeeri, omwaana wa Gileadi, omwaana wa Makiri, omwaana wa Manaase, omwaana wa Yosefu.

²Beema aambi neende Musa, Eliasaari omulaamisi, abeemirisi, neende omukaanda kwoosi okw'abaandu aambi neende omulyaangiro kw'Eyeema ly'Ohubaao hw'Omwaami mani baaboola bati,

³“Efwe seefwe yafwiira mu sichiimi n'atalehereho omwaana musyaani. Haba siyali mulala hu baloondi ba Koora, abajeemera Omwaami; yafwa hulw'esyonoono syae omweene.

⁴Nae olwohuba sa mbwe haba siyaliho neende omwaana musyaani, lwasiina eliita lya seefwe likota sa ohutula hu Yisiraeli? Fwesi mutukabireho esihirano mubeeho bakuuka yeefwe.”

⁵Musa yeecha yaayira omusaango kwaabwe okwo eyiri Omwaami,

⁶Omwaami yamuboolera ati,

⁷ “Esiindu si bahaana ba Selofehaadi basaba sihoyera; baberesere esihirano mu beeho ba laatang'ene. Leha esihirano yae yichie hu beene abo.

⁸Boolera abaandu ba Yisiraeli oti omusaacha yeesi naafwa n'atalehereho omwaana musyaani, omwaana muhaana wae niye onayiraanga esihirano yae.

⁹Naaba nataali neende omwaana muhaana, owa mwaanang'ina niye oba naanayisihiraanga.

¹⁰Naaba nataali neende bamwaanang'ina, mani aba mwaang'ina mwaanang'ina nibo ababa nibachia ohuyisihiraanga.

¹¹Naaba nataali neende bamwaanang'ina oba ba laatang'ene baandi, mani omwiiho wae w'aambi muno niye oba naachia ohuyiyiraanga mani aba nayo koti eyae yeene. Abaandu ba Yisiraeli bahoyere ohuloondakanaanga neende sino koti esihoyera esiri mu malako, koti sa ese Omwaami, mbalagiire eng'we.”

¹²Omwaami yaboolera Musa ati, “Ewe chia oniine aakulu w'Engulu cha Abbariimu, mani otingaale aakulu w'eloba li njia ohuberesa Abaisiraeli.

¹³Noonaba noomalire ohulibona bulai, ochia ohufwa, koti sa lu Arooni mwaanamao yafwa,

¹⁴olwohuba eng'we mweembi mwajeemera ebilagiro byaange nimuli mu sichiimi sya Siini. Omukaanda kw'abaandu bano boosi koti lu kwandeekanyiirisa nimuli mu Meribba, mwahaya ohufukiirira amaani kaange moolerefu mu moni waabwe.” (Meribba niyo esulo yiri mu Kadesi mu sichiimi sya Siini).

¹⁵Musa yasaba ati,

¹⁶“Ewe Omwaami Nasaae, ewe omweene bulamu bwoosi, omweene doola, hwekweedere, omusaacha onyala ohwiimirira abaandu bano

¹⁷haandi onyala ohubalagira nibali mu biita, hu mukaanda kw'abaandu bao kuno kuhaye ohufwaanana koti amakoondi akabulaho omwaayi.”

¹⁸Omwaami yaboobera Musa ati, “Ewe chia mani obukule Yosua omwaana wa Nuuni, omusaacha onyala oyo, ote amahono kao hu mutwe kwae.

¹⁹Muhole yeeme mu moni wa Eliasaari omulaamisi neende abaandu boosi, mani abweene ao mu moni waabwe boosi, mulaangirire koti omukerami wao.

²⁰Muberese hooho hu bunyala bwao, hu mukaanda kwoosi kwa Yisiraeli kunyale ohumuwuliraanga.

²¹Achia ohwehoonyeraanga Eliasaari omulaamisi, ochia ohumanyaanga ohudaha hwaange ohutula hu hwehoonyera Wurimu neende Tumimu. Mani mu ngira yino, Eliasaari aba achia ohunyala ohukerakira Yosua alala neende omukaanda kwa Yisiraeli kwoosi, mu bulamu bwaabwe bwoosi.”

²²Musa yahola koti lu Omwaami yali n'amulagiire. Yahola Yosua yeema mu moni wa Eliasaari omulaamisi neende omukaanda kw'abaandu abo kwoosi.

²³Koti lu Omwaami yali n'alagiire, Musa yata amahono kae hu mutwe kwa Yosua, mani n'amulaamira ohumukobola mu makulu.