Read saamia Ohubala 32 Bible Online

Ohubala 32 - saamia bible

Ohubala 32

¹Enono cha Rubbeeni neende Gaadi chali neende ebituke ebiingi muno. Mani koti lu chabona obulai bw'eloba lya Yaseeri neende Gileadi koti lu bwali hulw'ebyaayo,

²bachia eyiri Musa, Eliasaari, neende abeemirisi baandi b'omukaanda kw'abaandu abo mani baboola bati,

³“Atarooti, Dibboni, Yaseeri, Nimura, Hesibboni, Eleale, Sebbima, Nebbo, neende Bbeoni,

⁴eloba li Omwaami yayiingira mu moni wa Yisiraeli, loba lai ly'eng'oombe; nihaandi abahalaabani bao bano mbano bali neende eng'oombe enyiingi muno.”

⁵Mani tubeerese eloba lino libe elyeefwe, mani ohaye ohutukanya hwaambuha Omwaalo kwa Yorodaani mani humenye mu bweene omwo.

⁶Musa yakobolamo ati, “Eng'we mudaha ohudoong'a ano muti, Abaisiraeli baasyeeng'we nabo nibachia ohulwaana ebiita?

⁷Munyala mutye ohusinyisa abaandu ba Yisiraeli ohwaambuha Yorodaani, neende ohuchia beengira mu loba li Omwaami yababeresa?

⁸Esyo nisyo sa si bakuuka yeeng'we bahola nindabatuma ohutula mu Kadesi Bbarinea ohuchia balambuule eloba.

⁹Bachia boola mu Hoondo ya Esikoli mani baabona eloba elyo, nae nibakobola engo, bachaaka sa ohusema abaandu batachia beengira mu loba elyo, li Omwaami yali naababereese.

¹⁰Omwaami yeecha yanyoolera muno ludaalo olwo mani yaahola esisuubise ati:

¹¹‘Ese ndeechuba endi olwohuba abo bahaya ohudoong'a nibali abeesikwa yiindi, mani abulao kata mulala hu basaacha abo onyala ohwiingira mu loba li ndasuubisa Abburahamu, Yisaka, neende Yakobbo’

¹²Sino syayirira alala neende buli muundu yeesi, ohutusaho Kalebbu omwaana wa Yefune Omukenisi neende Yosua omwaana wa Nuuni; bano nibo abali nibadoong'a nibali abeesikwa eyiri Omwaami.

¹³Omwaami yeecha yanyoolerera abaandu mani yaabahola badaliima mu sichiimi ohumala emyaaka amahumi kane, ohwoola lu lwiibulo olwo lwoosi olwamusinyisa ohwoola lu lwafwa lwaawa.

¹⁴Mani bulaanu mbao mu malire ohubukula obweyaango bwa bakuuka yeeng'we abo, olwiibulo luyaaha luno olw'abasaacha bonooni, abali abeetekefu ohwiisa etima lyaalaba ly'Omwaami hu Yisiraeli ehabi lyoohubiri.

¹⁵Mani nikali mbwe eng'we abaandu ba Rubbeeni neende Gaadi muhaya ohumuloonda bulaanu buti, aba achia haandi ohujwaang'a abaandu bano boosi mu sichiimi, mani eng'we niing'we ababa nimuchia ohufunaanibwa hu husihirira hwaabwe.”

¹⁶Beecha baasuda eyiri Musa mani baboola bati, “Mberi, ewe leha efwe hwoombahe ebida by'amakina ano byebodoohanie amakoondi keefwe, haandi neende ebiko by'engoba eby'abaandu beefwe batahanyala ohwelwaanaho.

¹⁷Ao bulaanu efwe huba huchia ohunyala ohuchaana neende Abaisiraeli baasyeefwe mu biita nihwiimirira mu huseeta ohwoolera elalira lu hulinyalira ohubeehasa mu syaalo syahabe esyaabwe. Nae esiha sino siti, abaandu beefwe batanyala ohwelwaanaho, bahahoyere ohudoong'a nibasiimenyere ano mu biko by'engoba bino, nibewoniisye abaandu bomu syaalo muno.

¹⁸Haba sihuchia ohukobola mu madaala keefwe, ohwoola lu Baisiraeli baandi abo bachia ohuba nibamalire bosi ohunyoola eloba libababeresa.

¹⁹Haba sihuchia ohubukulaho ebiindu byaabwe byoosi ebiri engereha wa Yorodaani, olwohuba efwe hwamala ohunyoola omukabo kweefwe ano ebukwe wa Yorodaani.”

²⁰Musa nae yakobolamo ati, “Nikali mbwe mubwadyeeri bweene muli ohweekesa si muli ohuboolaanga, mani ano bweene mu moni w'Omwaami, mweetekehe ohuchia mu biita.

²¹Abasaacha beeng'we balwaani boosi bahoyere ohwaambuha Yorodaani, mani nibali aasi w'obwiimirisi bw'Omwaami bachie baseete abasuku beefwe, ohwoola lu Omwaami achia ohubayiingira

²²mani ayire esyaalo esyo. Esyo nisiwa, ao muba muchia ohunyala ohukobola engo, olwohuba ao muba mumalire ohwooseresa obufunaanibwa bweeng'we eyiri Omwaami, haandi neende eyiri Abaisiraeli baasyeeng'we. Ao bulaanu Omwaami aba achia ohwomiisa ati hane eloba lino eliri ebukwe wa Yorodaani ne elyeeng'we.

²³Nae nimutooseresa esisuubise syeeng'we esyo, ese ndi ohubalabula endi, muba muchia ohuba nimuli ohwonoona eyiri Omwaami mweene. Mutawubanaho kata nabudiidi hu sino; muchia ohubonereswa hulw'esyonoono syeeng'we esyo.

²⁴Mani bulaanu eng'we mbweyoombahire sa ebiko byeeng'we, neende engoba hulw'amakoondi keeng'we, nae muhoya mwaahola esiindu simusubiise esyo!”

²⁵Abasaacha ba Gaadi bano neende abaana ba Rubbeeni nabo baboola bati, “Omuhoongo, efwe huchia ohuhola sa koti lwolagiire.

²⁶Abahasi beefwe neende abaana beefwe, neende eng'oombe cheefwe, neende amakoondi keefwe, byoosi bichia ohudoong'a ano mu siko sya Gileadi sino.

²⁷Nae efwe fweesi huli abeetekefu ohuchia mu biita aasi w'ohulagira hw'Omwaami. Huchia ohwaambuha Yorodaani, mani hulwaane, koti sa luwaboolere.”

²⁸Musa yaberesa ebilagiro bino Eliasaari, Yosua, neende abeemirisi baandi ba Yisiraeli:

²⁹“Abasaacha ba Gaadi neende Rubbeeni nibamala baambuha Yorodaani, nibamalire ohweetekehera ebiita ohweema huhulagira hw'Omwaami, nihaandi nikali mbwe alala neende obuhoonyi bwaabwe onyala wayiingira esyaalo esyo, ao bulaanu oba ochia ohunyala ohubaberesa eloba lya Gileadi libe elyaabwe.

³⁰Nae nibatanyala ohwaambuha Yorodaani mani bachia mu biita alala naawe, baba bachia ohukabana omukabo kwaabwe mu loba lya Kanani, koti sa ewe oba ochia ohuhola.”

³¹Abasaacha ba Gaadi neende Rubbeeni baakobolamo bati, “Ewe omuhuluundu, efwe huchia ohuhola koti lu Omwaami alagiire.

³²Nihuli aasi w'ohulagira hwae, huchia ohwaambuha hwiingire mu loba lya Kanani, mani humale huchie mu biita, hu hunyale ohudoong'ya obusiha bweefwe eno ebukwe wa Yorodaani.”

³³Kata katyo, Musa yakaba enono cha Gaadi, neende Rubbeeni, haandi neende esituundu sy'enyuumba ya Manaase obwaami bwoosi obw'Omutuki Sihooni ow'Abaamoori, neende Omutuki Ogu owa Bbasani, n'oyiriiremo neende ebiko neende ebyaalo bibyebodohaanie.

³⁴Enono ya Gaadi yoombaha buyaaha ebiko by'engoba bya Dibboni, Atarooti, Aroeri

³⁵Aturoti Sofani, Yaseeri, Yogubbeha,

³⁶Bbeti Nimura, neende Bbeti Harani.

³⁷Enono ya Rubbeeni yoombaha buyaaha Hesibboni, Eleale, Kiriataimu,

³⁸Nebbo, Bbaali Meyoni (eliita lino mani nilichuuswa), neende Sibbima. Beecha baakulihaanga ameeta mayaaha ebiko bi boombahaanga buyaaha.

³⁹Enono ya Makiri omwaana wa Manaase yeecha yaseeta eloba lya Gileadi, yalimenyaho, mani yaamala yeerusamo Abaamoori abali nibalimenyamo.

⁴⁰Musa yeecha yakaba Gileadi enono ya Makiri, mani baamala baamenya abweene ao.

⁴¹Yairi, ow'enono ya Manaase, yaseeta mani yaamala yadiira engoongo chiindi mani naamala naachikuliha ati “Engoongo chia Yairi”.

⁴²Noobba yesi yaseeta mani yadiira Kenati alala neende engoongo chasyo, mani yaamala yaachikuliha ameeta kaandi mbwe “Noobba”, ohutulana hu liita lyae omweene.