Read saamia Ohubala 33 Bible Online

Ohubala 33 - saamia bible

Ohubala 33

¹Enomanoma yiloondaho yino yibuula ameeta k'ebituundu bi Baisiraeli boombahaangamo ekaambi ohutula nibatula mu Misiri mu nono chaabwe aasi w'obwiimirisi bwa Musa neende Arooni.

²Ohweema huhulagira hw'Omwaami, Musa yaandiikaanga eliita ly'esituundu si boombahaangamo ekaambi bawuluuhirao.

³Abaandu ba Yisiraeli batula mu Misiri hu ludaalo lw'ehumi-na-hataanu olw'omwoosi kwataangira okw'omwaaka, oludaalo lwaloonda hu ludaalo lwa Paasaka yataangira. Nibali aasi w'obuliindi bw'Omwaami, baatula mu siko sihunuufu sya Ramesesi. Abamisiri boosi nibababona,

⁴nibali ohusihaanga abaana baabwe baamberi ba Omwaami yali niyeetere. Mu huhola sino, Omwaami yanyala ohweekesa ati yali neende obunyala ohuhiraho banasaae ba Misiri.

⁵Abaandu ba Yisiraeli batula mu Ramesesi mani baachia boombaha ekaambi mu Sukoti.

⁶Ekaambi yaabwe yiloondaho yali mu Etamu huundulo w'esiparara.

⁷Ohutula ao, baakobola enyuma boola hu Pi Hahiroti, ebukwe wa Bbaali Sefoni, mani baamala boombaha ekaambi aambi neende Migidooli.

⁸Beecha baatula mu Pi Hahiroti mani baabita baahalakania Enyaanja ya Ranjaai, mani boola mu siparara sya Suuri; nae luunyuma lw'endaalo chidatu nibahuumba, boombaha ekaambi mu Mara.

⁹Nibatula ao bachia boola Elimu, haandi yiboombaha ekaambi, olwohuba ao yaliwo esulo ehumi neende chibiri, haandi neende eminaasi amahumi kataanu-na-kibiri.

¹⁰Beecha baatula ao mu Elimu, mani bachia boombaha ekaambi aambi neende Omusoma kwa Suesi.

¹¹Haandi ekaambi yaabwe yaloonda hw'eyo yali mu siparara sya Siini.

¹²Haandi boombaha ekaambi yiindi mu Dofuka,

¹³nae haandi nibatula ao, bachia baata eyiindi mu Alusi.

¹⁴Ohuloondaho beema mu Refidiimu, eyali niyibulaho amaachi koosi, ak'ohung'wa.

¹⁵Haandi baatula mu Refidiimu, mani bachia boombaha ekaambi mu sichiimi sya Sinai.

¹⁶Haandi baatula mu sichiimi sya Sinai, nibamala bachia boombaha ekaambi mu Kibburooti-hatafa.

¹⁷Haandi baatula mu Kibburooti-hatafa, mani bachia boombaha ekaambi mu Haserooti.

¹⁸Haandi baatula mu Haserooti, mani bachia boombaha ekaambi mu Ritima.

¹⁹Haandi baatula mu Ritima, mani bachia boombaha ekaambi mu Rimoni-Pereesi.

²⁰Haandi baatula mu Rimoni-Peresi, mani bachia boombaha ekaambi mu Libbina.

²¹Haandi baatula mu Libbina, mani bachia boombaha ekaambi mu Risa.

²²Haandi baatula mu Risa, mani bachia boombaha ekaambi mu Kehelaata.

²³Haandi baatula mu Kehelaata, mani bachia boombaha ekaambi mu Lugulu Seferi.

²⁴Haandi baatula mu Lugulu Seferi, mani bachia boombaha ekaambi mu Harada.

²⁵Haandi baatula mu Harada, mani bachia boombaha ekaambi mu Makiheloti.

²⁶Haandi baatula mu Makiheloti, mani bachia boombaha ekaambi mu Tahati.

²⁷Haandi baatula mu Tahati, mani bachia boombaha ekaambi mu Tera.

²⁸Haandi baatula mu Tera, mani bachia boombaha ekaambi mu Mitika.

²⁹Haandi baatula mu Mitika, mani bachia boombaha ekaambi mu Hasimona.

³⁰Haandi baatula mu Hasimona, mani bachia boombaha ekaambi mu Moserooti.

³¹Haandi baatula mu Moserooti, mani bachia boombaha ekaambi mu Bbenejakaani.

³²Haandi baatula mu Bbenejakaani, mani bachia boombaha ekaambi mu Horihagidagadi.

³³Haandi baatula mu Horihagidagadi, mani bachia boombaha ekaambi mu Yotibbata.

³⁴Haandi baatula mu Yotibbata, mani bachia boombaha ekaambi mu Abburona.

³⁵Haandi baatula mu Abburona, bachia boombaha ekaambi mu Esionigebberi.

³⁶Haandi baatula mu Esionigebberi, mani bachia boombaha ekaambi mu sichiimi sya Siini (yaani mbwe, Kadesi).

³⁷Haandi baatula mu Kadesi, bachia boombaha ekaambi mu Lugulu Hoori, huundulo w'eloba lya Edomu.

³⁸Mani ohweema huhulagira hw'Omwaami, Arooni omulaamisi yaachia yaniina hu Lugulu Hoori, mani yafwiirayo,

³⁹hu mwaaka kwae kw'emia ndala neende amahumi kabiri neende kidatu (123), hu ludaalo lutaangira olw'omwoosi kwa hataanu okw'omwaaka kw'amahumi kane ohutula Abaisiraeli nibatula mu Misiri.

⁴⁰Mani Omukanani, omutuki Aradi, owali niyamenya mu Negebbu mu loba lya Kanani, yaawulira hu hwiicha hw'abaandu ba Yisiraeli.

⁴¹Haandi baatula mu Lugulu Hoori, mani bachia boombaha ekaambi mu Salimona.

⁴²Haandi baatula mu Salimona, mani bachia boombaha ekaambi mu Punoni.

⁴³Haandi baatula mu Punoni, mani bachia boombaha ekaambi mu Obboti.

⁴⁴Haandi baatula mu Obboti, mani bachia boombaha ekaambi mu Abbariimu mu bwaami bwa Moabbu.

⁴⁵Baatula mu Yiyimu, mani bachia boombaha ekaambi mu Dibbonigaadi.

⁴⁶Haandi baatula mu Dibbonigaadi, mani baachia boombaha ekaambi mu Alumoni-dibbulataimu.

⁴⁷Haandi baatula mu Alumoni-dibbulataimu, bachia boombaha ekaambi muungulu cha Abbariimu, notoola mu Nebbo.

⁴⁸Haandi baatula muungulu cha Abbariimu, bachia boombaha ekaambi mu syaalo syakwalaala sya Moabbu aambi neende Yorodaani mu Yeriko;

⁴⁹boombaha ekaambi aambi neende Yorodaani ohutula mu Bbetiyesimooti nooli aambi ohwoola mu Abbelisitiimu mu syaalo syakwalaala sya Moabbu.

⁵⁰Mu syaalo syakwalaala sya Moabbu engereha wa Yorodaani ohutula mu Yeriko, Omwaami yaaberesa Musa

⁵¹amakerako ka Yisiraeli kaloondaho kano kati: “Nimwaambuha Yorodaani nimwiingira mu syaalo sya Kanani,

⁵²muhoyere ohwiirusa mwaamalamo abaandu basimenyamo boosi. Sihirise amakina kaabwe koosi, neende ebiloongaloongwe by'echuma byaabwe byoosi, haandi ebituundu byaabwe by'ohwiinamiraangamo byoosi.

⁵³Mwoombahe mu syaalo omwo mani mumenyemo, olwohuba ese niise oli ohusibaberesaanga.

⁵⁴Kabaniemo esyaalo esyo ohweema hu njia cheeng'we neende enono cheeng'we nimwehoonyera ohuubbaannga eha, nimuberesaanga eloba hoongo enono hoongo, nae ediidi enono ndiidi.

⁵⁵Nae nimutanyala ohwiirusamo abamenyamo, abo boosi abachia ohudoong'amo bachia ohudoong'a nibali abebidinyu muno koti otuwaawa mu moni cheeng'we haandi koti amawa muumbafu weeng'we, haandi baba bachia ohubalwanianga sa.

⁵⁶Nimutabeerusa bawaamo, ese omweene njia ohubasihirisa, koti sa lu ndali nindatekeha ohusihirisa abeene abo.”