Read saamia Ohubala 34 Bible Online

Ohubala 34 - saamia bible

Ohubala 34

¹Omwaami yaberesa Musa

²ebilagiro biloondaho bino hulw'abaandu ba Yisiraeli: “Nimwiingira mu Kanani, eloba li njia ohubaberesa, enjaho ch'obwaami bweeng'we chichia ohuba chiti.

³Olwaaho lw'emwaalo luchia ohutulira hu sichiimi sya Siini hu lwaaho lwa Edomu. Luchia ohuchaakira ebukwe yi njakamo y'emwaalo w'Enyaanja y'omuunyu.

⁴Ao mani luba luchia ohukaluuhana nilwiiha emwaalo ahakira ha Akirabbiimu mani lwemeede niluchia nilubita mu Siini ohwoolera elalira emwaalo bweene mu Kadesi Bbarinea. Ao luchia haandi ohukaluuhana luchaake ohuniina emukulu w'emuumbo ohwoola hu Hasaari Adaari, haandi ohwemeeda niluchiiririra ohwoola hu Asimooni,

⁵yi luba luchia haandi ohukaluuhanira niluchoomere ehoondo yiri hu lwaaho lwa Misiri, mani lweemeo lwiiche lwoole hu nyaanja ya Mediterania.

⁶“Olwaaho lw'emuumbo nalwo luchia ohuba Enyaanja ya Mediterania.

⁷“Olwaaho lw'emukulu nalwo luchia ohuloondakana neende olunyiriri ohutulira hu Mediterania ohwoolera elalira hu Lugulu Hoori

⁸haandi ohutula abweene ao, ohwoola hu Hamati-Pasi. Luchia ohwemeeda ohuchia ohwoola elalira hu Sedadi

⁹neende hu Sifurooni, mani luchia ohwaakama hu Hasaari Enaani.

¹⁰“Olwaaho lw'ebukwe nalwo luchia ohuloondakana neende olunyiriri ohutulira elalira hu Hasaari Enaani ohwoolera elalira hu Sefamu.

¹¹Luchia haandi ohutula ao mani lwiihe lwiiche lwoole emwaalo hu Ribbila, ebukwe wa Aini, haandi mani lwemeede ohuchia ohwoola hu bigulu biri enaagenya ly'ebukwe ly'Enyaanja ya Galilaya,

¹²mani haandi lwiihe emwaalo niluchiana neende Omwaalo kwa Yorodaani, ohwoolera elalira hu Nyaanja y'omuunyu. “Chino nichio echichia ohuba enjaho chine ech'esyaalo syeeng'we.”

¹³ Musa yaboolera Abaisiraeli ati, “Lino bulaanu nilyo eloba li muchia ohukabanamo nimuubba eha, eloba li Omwaami mweene aleheere enono chitaanu-na-chine neende esituundu.

¹⁴Enono chia Rubbeeni neende Gaadi haandi neende olwaande lw'ebukwe lwa Manaase, abo bamala ohunyoola omukabo kwaabwe, okwakabanisibwamo ohweema hu madaala kaabwe,

¹⁵hu lwaande lw'ebukwe lwa Yorodaani, eyitekehaane neende Yeriko.”

¹⁶Omwaami haandi yeecha yaboolera Musa ati,

¹⁷“Eliasaari omulaamisi neende Yosua omwaana wa Nuuni nibo abachia ohukabaniamo eloba elyo hulw'abaandu boosi.

¹⁸Haandi chia odoola omwiimirisi mulala ohutula mu buli nono oba naachia ohubahoonyaho ohulikabaniamo.”

¹⁹Mani kano niko ameeta k'abasaacha abo: Ohutula mu nono ya Yuda, yali Kalebbu omwaana wa Yefune.

²⁰Ohutula mu nono y'abaana ba Simeoni, yali Semueli omwaana w'Amihudi.

²¹Ohutula mu nono ya Bbenjamini, yali Elidaadi omwaana wa Kisilooni.

²²Ohutula mu nono y'abaana ba Daani omwiimirisi, yali Bbuuki omwaana wa Yogili

²³Ohutula mu basyaani ba Yosefu bali bati: ohutula mu nono y'abaana ba Manaase omwiimirisi, yali Hanieli omwaana wa Efodi.

²⁴Mani haandi ohutual mu nono y'abaana ba Efuraimu omwiimirisi, yali Kemueli omwaana wa Sifatani.

²⁵Ohutula mu nono y'abaana ba Sebbuluuni omwiimirisi, yali Elisafani omwaana wa Parininaki.

²⁶Ohutula mu nono y'abaana ba Yisakari omwiimirisi, yali Palitieli omusyaa wa Asaani

²⁷Haandi ohutula mu nono y'abaana b'Aseri omwiimirisi, yali Ahihudi omwaana wa Selomi.

²⁸Ohutula mu nono y'abaana ba Nafutaali omwiimirisi, yali Pedaheeli omwaana wa Amihuudi.

²⁹Mani bano nibo abasaacha ba Omwaami yalagira ohuba neende obunyala ohukabaniamo obusiha bw'eloba ly'abaandu ba Yisiraeli mu syaalo sya Kanani.