Read saamia Ohubala 36 Bible Online

Ohubala 36 - saamia bible

Ohubala 36

¹Abeemirisi b'amadaala b'enono ya Gileadi, omwaana wa Makiri, haandi omwiichuhulu wa Manaase omwaana wa Yosefu, bachia eyiri Musa alala neende abeemirisi baandi.

² Baboola bati, “Omwaami yabalagira ohukabaniamo eloba abaandu ba Yisiraeli nibeehoonyera ohuubbaannga eha. Haandi yabalagira ohukaba esihirano y'omwiiho weefwe Selofehaadi abahaana bae.

³Nae yichulise muti, nikali mbwe banyala bachia badeehera abasaacha b'oluyia luundi, esihirano yaabwe eyo, bulaanu yiba yichia ohuba ey'oluyia olwo, mani ngaandi, obuungi bwalyo buba nibwatubeereswa buba buchia ohuduuduyaanga sa.

⁴Mu Mwaaka kw'Ohukobosera, ebiindu byoosi ebiba nibyakuswa bikoboswayo eyiri abeenebyo bataangira ohuba nabyo, esihirano y'abahaana ba Selofehaadi yiba yichia ohumeederwa elalira hu nono ya oluyia lu baba nibadeehamo mani yiba yimalire ohufwiirwa elalira neende enyuumba yeefwe.”

⁵Mani Musa yaaberesa yalagira Abaisiraeli ebilagiro biloondaho bino ohutula eyiri Omwaami. Yaboola ati, “Ebiindu bi nono ya Manaase luli ohuboola byadyeeri nibyo,

⁶mani sakira bulaanu Omwaami aboola ati abahaana ba Selofehaadi bali neende edeembe ohudeehera omuundu yeesi yi baba nibadahire, nae ohutusaho mu nono yaabwe yoong'ene.

⁷Esihirano ya buli Mu Yisiraeli yichia ohudoong'aanga niyiyambaaniiswe hu nono yae.

⁸Mani buli muhasi yeesi osihira esihirano mu nono y'EsiYisiraeli yoosi aba ahoyera ohudeheraanga omusaacha w'enyuumba yeene oluyia olwo. Mani mu ngira yino yoong'ene nimwo mu Baisiraeli boosi baba nibachia ohunyala ohusihiraanga esihirano y'abaandu baabwe bafwa,

⁹mani esihirano eyo yaahaya ohuduuma yaachia yoola yaakwa hu nono yiindi. Buli nono yichia ohwemeeda ohubechaanga neende emyaandu kyayo yoong'ene.”

¹⁰Mani abahaana ba Selofehaadi bafukiirira mani baahola koti lu Omwaami yali n'alagiire Musa;

¹¹olwohuba Mahila, Tirisa, Hogola, Milika neende Nuwa, boosi abahaana ba Selofehaadi, baadeehera abaana ba bamwaanang'ina saabwe.

¹²Beecha badeeha mu madaala k'abaana ba Manaase omwaana wa Yosefu, mani esihirano yaabwe yadoong'a mu luyia lw'edaala lya saabwe.

¹³Mani kano niko amalako, haandi neende ebilagiro bi Omwaami yalagira ohubitira mu Musa eyiri abaandu ba Yisiraeli abali nibamenya mu syaalo sikwalaafu sya Moabbu, huundulo wa Yorodaani mu Yeriko.