Read saamia Ohubala 5 Bible Online

Ohubala 5 - saamia bible

Ohubala 5

¹Omwaami yaboolera Musa ati,

²“Lagira abaandu ba Yisiraeli ohwiirusa ohumala mu kaambi buli muundu yeesi oli neende obulwaae bubi obw'esihoba, oba oliho hu mubiri kwae esiindu sisulula syoosi neende oyo yeesi oliho omusiro ohweema hu hwegeeng'a hu mulaambo kwoosi.

³Tuse erwaanyi, abaandu bano boosi abali ab'omukwoobo ohweema koti emiduunga ky'ediini kiri, hu bahaye ohubaha ekaambi yoosi omukwoobo okwo, mu ese mweene ndamenya mu baandu baange.”

⁴Abaisiraeli bafukiirira mani beerusa abaandu bali batyo boosi baatula mu kaambi, koti lu Mwaami yali yababoolera ohuhola.

⁵Omwaami yaberesa Musa

⁶ebilagiro biloondaho bino hulw'abaandu ba Yisiraeli. Omuundu yeesi niyeehola otaali omweesikwa eyiri Omwaami, mani yaaholera owaasye esiindu sihyaamu,

⁷ahoyere ohuchia mani yeeyolobya esyonoono syae esyo, mani yoobba efaini enjichufu, haandi yameedaho amahumi kabiri kabuli emia y'efaini eyo, eyiri omuundu yaaba niyakosera.

⁸Nae omuundu yi yakosera naaba niyamala ohufwa, nihaandi abulaho omwiiho wae w'aambi owadoong'ao, yi bahoyere ohutuunga efaini eyo, yiba yichia ohubeereswa Omwaami hulw'omulaamisi. Efaini yino yiba yemeeda hu koondi emiiku eliba nilyehoonyerwa ohuhola omuduunga kw'ohulabiswa omuundu oba n'aliho omusaango.

⁹Haandi buli siindu sy'obuhoonyi syoosi si Baisiraeli bayaana eyiri Omwaami, siba siri esy'omulaamisi yi baba nibasidiisire.

¹⁰Buli mulaamisi yeesi ahoyeere ohubihaanga ebiyaanwa bino ebiba nibimudiisirwe.

¹¹Omwaami yalagira Musa ati,

¹²“Chia oboolere abaandu ba Yisiraeli oti, omuhasi w'omuundu yeesi naakota mani yaamuholera ebiindu bitaali eby'obweesikwa,

¹³omusaacha wuundi niyeyalisa nae koti omusaacha wae, mani byaakiswa eyiri wamwe yaahaya ohubimanyaho, mani yaahaywa ohufuumbula kata neende omweene niyamala ohweebaha omukwoobo okwo, nihaandi abulao omuloli yeesi onyala ohumulumirisa, koti lwaaba natadiirwa naali ohusihola,

¹⁴nae omwooyo kw'embaliha nikudiira omusaacha wae oyo, mani yadiirira omuhasi wae oyo embaliha aba niyebahire omukwoobo; oba omwooyo kw'embaliha nikumudiira, mani yadiirira omuhasi wae oyo embaliha, kata neende naaba n'atebaha omukwoobo;

¹⁵omusaacha oyo aba ahoyere ohuyira omuhasi wae oyo eyiri omulaamisi, mani yaamuleetera esiyaanwa sihoyera omuhasi oyo, silala sy'ehumi sy'obusye bw'amabere masuungu; haba saabuchuhaho amafuta koosi daawe, haandi haba sataaho obubbaani bwoosi, olwohuba sino siba siri esiyaanwa sy'emere sy'embaliha, esiyaanwa sy'emere sy'esichuliso, ohwebwaaba esiichuliso.”

¹⁶Mani omulaamisi aba achia ohusudya aambi omuhasi oyo, mani ate omuhasi oyo mu moni w'Omwaami;

¹⁷mani omulaamisi aba achia ohubukula amaachi moolerefu akali mu sidayiro sy'eloba, haandi abukuleho hu lufu luli mu bweeru bw'Eyeema, alusaase mu maachi ako.

¹⁸Mani omulaamisi aba achia ohuta omuhasi oyo mu moni w'Omwaami, atuumbulule efwiiri ly'omutwe kw'omuhasi oyo, mani ate esiyaanwa sy'emere sy'esiichuliso mu mahono kae, esiba nisiri esiyaanwa sy'emere sy'embaliha. Mani omulaamisi nae aba achia ohuba n'akiingire amaachi malulu akaleeta esibwaabo.

¹⁹Bulaanu, omulaamisi aba achia ohuhola omuhasi oyo afukiirisanie neende esichubo sino koti lu silomwalomwa neende omulaamisi siti, “Nooba nootayiraane, haba soochia ohuholwaho esyonoono syoosi neende esibwaabo si maachi kano kaleeta.

²⁰Nae nooba noyiraane,

²¹Omwaami ahoya yaahola eliita lyao lyaaba esibwaabo mu baandu bao. Omwaami ahoya yabwaaba ebituundu by'obuhasi byao byehuuna alala mani enda yao yafwiimba.

²²Amaachi kano kahoya keengira mu nda yao, mani kaakera yafwiimba yaayiriha nae ebituundu byao by'obutye byehuuna byeekalira.” Mani omuhasi oyo aba achia ohukobolamo ati, “Ese fukiirira; Omwaami ahoya yaahola atyo.”

²³Bulaanu omulaamisi aba achia ohwaandiika aasi esibwaabo sino, amale yoosere obwaadiike buno neende amaachi nibukwa mu sidayiro sirimo amaachi malulu kano.

²⁴Mberi n'atahola omuhasi wuno yaang'wa amaachi kano, akaba nikachia ohumuleetera obuchuuni bululu,

²⁵omulaamisi aba achia ohutaangiraanga mberi abukula esiyaanwa sy'obusye ohutula mu mahono k'omuhasi oyo, mani abukiinge koti obuyaanwayo eyiri Omwaami, mani amala abuyira abuta hu alutaari.

²⁶Bulaanu aba achia ohubukulaho esifuusi sy'obusye buundi, ohuba koti esiyaanwa sy'ohuboneraho sa mani asaambire hu alutaari. Mani luunyuma aba achia ohuhola omuhasi oyo ang'we amaachi ako.

²⁷Mani omuhasi oyo n'aba n'ayiraaneho, amaachi ako kaba kachia ohumuleetera obuchuuni bululu; enda yae yiba yichia ohufwiimba yiyirihe, ebituundu by'obutye byae byosi byehuune biikalire. Eliita lyae liba lichia ohweehola ely'esibwaabo mu baandu bae.

²⁸Nae naaba nataaliho omusaango kwoosi, haba saaba naachia ohuholwaho obubi bwoosi daawe, haandi aba achia sa ohunyala ohwiibulaanga bulai.

²⁹Lino nilyo elako lihola mu biha by'embaliha, nikali mbwe omuhasi oba n'asisiiri mu bunyala bw'omusaacha wae achia yahyaama mani yeebaha omukwoobo,

³⁰oba omwooyo kw'embaliha nikuniina omusaacha mani yadiirira omuhasi wae embaliha; mani omusaacha oyo aba achia ohuta omuhasi wae oyo mu moni w'Omwaami, mani omulaamisi yeemeo ahole omuhasi wuno koti elako lino lyoosi lilaka.

³¹Wamwe aba achia ohumalibwaho omusaango, nae omuhasi naaba nanyoolehana neende omusaango, aba ahoyere ohusaandisibwa koti lu bihoyera.