Read saamia Nahumu 3 Bible Online

Nahumu 3 - saamia bible

Nahumu 3

¹Chisyakaanire esiko esibacha, haandi esiiti esyo, esyeechula omwaandu okucha ohupeeywa mani kunyaaswe!

²Wulireho! Ohwaayuha hw'olubbariki, embiindo ch'emipiira, ohuduumakala hw'efaraasi, neende ohuchwiila hw'ebigaari!

³Abalwaanira hu faraasi baseeta, engaanga chimyeesuha-myeesuha, amafumo kamesamesana! Emilaambo kyebbiibanaho ebituuli, abafu batabaliha abasaacha babeegumulaho sa!

⁴Ninefe esicheke siri ohusaandisibwa. Esing'enaang'ena nae esyeechulamo amayiriisi keeta, esyateengiaanga ebyaalo nisibiwaamba.

⁵Omwaami w'Obunyala aboola ati, “Ese njia ohuhusaandya ewe Ninefe! Ese njia ohuhufwaalula odoong'e syeekenye mani hole ebyaalo biindi bihweehoyere, bahweebonere mu soni chao.

⁶Ese njia ohuhudiira neende okusinye mani hubwiiheho obunyaka. Abaandu bachia ohuhutingaala neende obuti.

⁷Abo boosi abachia ohuhubonaho bachia ohwehuuna bakobolereho. Bachia ohubolaanga bati, ‘Ninefe sidoong'ere amagiingiri mahaaya! Naanu mweene ochia ohumukwiira esisa? Wiina mweene ochia ohwekoomba ohumwomiisa?’ ”

⁸Ewe Ninefe, alihooyo syohirira Tebbeesi, Esiko sihoongo sy'e Misiri mani? Syosi syali omwaalo kwali okw'ohusiliinda koti esida Naili nikwo okwali obuliindi bwasyo.

⁹Syatukaanga Etiopia neende Misiri, mani amaani kasyo kabulaho esyaakamo daawe; Libbya nisyo esyamuhoonyaanga.

¹⁰Kata katyo, abaandu ba Tebbeesi bakiingwa sa baayirwa mu bwiiruhiro. Mu buli soonda y'engira, abaana baabwe batoochwaanga nibeetwa. Abasaacha baabwe bahiramo bosi bakiingwa sa baayirwa nibaboyerwe eminyororo mani baakabanwamo mu bapeeyi abo.

¹¹Ewe Ninefe, ewe wesi ochia ohukwa sa mu busiru bw'obumeesi! Ewe wesi ochia ohuteemaho ohweeyiba hu basuku bao.

¹²Engaka chao choosi chichia ohufwaana koti emituli kiriho enduli enyengu: odengaania emisaala ekyo, mani ebyaamo nibikwa sa mu munwa kwao bweene!

¹³Abanamaye bao nga babula engaanga yoosi, haandi esyaalo syao siri koti esitanyala ohweliinda mu moni w'abasuku bao daawe. Omuliro kuchia ohusihirisa amabbaara koosi akahulimo.

¹⁴Daya amaachi ni weetekehera ohwebodoohanwa, mani womiise engaka chao! Swaala eloba ly'endamu weetekehe ohusaamba amatafwaali, mani otereese esiroombe syako!

¹⁵Kata neende ohole si, ohusaambwa neende omuliro ofwe, oba wiitirwe mu biita. Ochia ohweeywa omalweo koti ebilime biriibwa neende esike. Weebulana koti esike!

¹⁶Ewe watulaangamo abachurusi abaangi ohuhiraho eng'ining'ini chiri muukulu obuungi! Nae bulaanu bamala ohweweerao, koti esike, babaambula embaya chaabwe mani beebburuhira beweerao.

¹⁷Abahoongo bao, bafwaana koti eyiicho ly'esike chebaanda hu bida hu ludaalo lw'efuumbi. Mani elyuuba nilitula sa liti, chibburuha cheweerao, mani yaabulao oyo yeesi onyala ohumanya yi chiba nichichiriire!

¹⁸Ewe Omutuki wa Asiria, bagafana bao abo bamala ohufwa, haandi abasaacha bahunuufu bao bosi beeyalisira elalira! Abaandu bao basalaanira muungulu, haandi abulao oyo yeesi onyala ohuchia yaabakobosa engo haandi.

¹⁹Abulao obuyaambi bwosi-bwoosi obw'ohunyaaliha hwao, haandi amakoonjo kao kosi haba sikanyala ohuwonisibwa daawe. Abo boosi abawulira amakeni kadiira hu husihiriswa hwao, bahubba sa amayu neende esangaalo. Mani ali hoo oyo yeesi owanyala ohweebalula etima lyao ly'endaalo choosi?