Read saamia Habbakuuku 1 Bible Online

Habbakuuku 1 - saamia bible

Habbakuuku 1

¹Buno nibwo obunabbi bu Omwaami yabwiihulira omunabbi Habbakuuku.

²Ewe Omwaami, ndahaake yeena ohuhwekongooya otuhoonye hu weemeo onyale ohutuwulira, haandi hw'onyale ohutuwonia obutemo buno?

³Siina syeene esikera ewe nookera nimbona kano? Onyala otye ohweema sa mani waata emoni hu budoondobanu buno oti? Ohusihirira neende obutemo bindebodoohaanie, haandi ohulwaanakana neende ohusoolana biri buli abuundu.

⁴Amalako makata, haandi sikahoonya daawe, haandi obwadyeeri bwosi bubulao. Abaandu babi nibo abanyoola ebihiramo obulai eby'abaluungifu, mani obwadyeeri bwahyaamisibwa.

⁵Mani Omwaami yeemao yaboolera abaandu bae ati, “Mwewuunjeho ebyaalo bi beebodoohaanie, muba muchia ohwesiinduha esyo si muchia ohubona. Ese njia ohuhola esiindu si mutachia ohufukiirira nimuchia ohusiwulira.

⁶Ese ndi ohuleeta Ababbabbilooni mu bunyala, abaalaba, haandi abaandu batayeera. Mbao bali ohuhuumba nibahalakania esyaalo ohuchia ohulwaania neende ohuyiingira ebyaalo biindi.

⁷Bali ohusasaania amatiichasi neende oluteengo, haandi mu suunga yaabwe, abeene nibo abeetuka.

⁸“Efaraasi chaabwe ch'embiro ohuhiraho eng'we, haandi njalaba ohuhiraho amabbwe kali enjala. Abalwaani bohu faraasi beecha nibeerusa nibatula mu byaalo by'eyale muno; efaraasi chaabwe chiri ohulimulula eloba. Beekobya koti eeswi chibweene esyohulya.

⁹“Amaye kaabwe koosi koti ohuhuumba koti abayingiire, mani buli muundu yeesi yakwaamo oluteengo koti lu basuda aambi. Abaambe baabwe babitiirifu koti emoni ch'omusenye.

¹⁰Bayira sa abatuki neende okusinye mani nibacheheerera abahoongo b'akulu. Abulao olukoba lwoosi olunyala ohubakaira daawe, basibbiibaho amadosi mani baasiyaamba.

¹¹Mani beeya bwiiya nibechiira koti omuyaka, mani ni bahamyuuhao, abasaacha bano abeesika amaani kaabwe koti nasaae waabwe.”

¹²Omwaami, ohutulira elalira hu njaako, ewe wali sa Nasaae. Ewe niiwe Nasaae waange, omwoolerefu haandi otaakama. Omwaami, Nasaae waange, haandi omuliindi waange, ewe wadoola Ababbabbilooni mani waabahola ab'amaani banyale ohutusaandya.

¹³Nae ewe onyala otye ohugumira abasaacha babacha bano haandi ababi baakiire ao? Emoni cheeng'we njolerefu muno echitahanyala ohwewuunja hu syonoono, haandi ewe haba soonyala ohwesimiirisira ohubona abaandu nibali ohwonoona. Mani siina syeene esikera ewe n'onyityoohera otyo, abo nibali ohusihirisa abaandu babahira obuluungifu?

¹⁴Wahadiira otye abaandu koti eng'eeni sa, kata sa koti obuduhunyi bw'ebikooko ebitaaliho neende omweemeresi obyeemerera?

¹⁵Ababbabbilooni baloba abaandu neende amalobo, oti bali eng'eeni sa. Babahwehweesa ni babayirira mu njero nibacheheerera enjeho koti lu babadiirire!

¹⁶Beenamira sa enjero chaabwe echio ni bachiweerera ebiyaanwa, olwohuba enjero chaabwe nichio echibaberesaanga buli silai syoosi si badaha.

¹⁷Mani bachia ohunyala ohwehoonyeraanga emboosi chaabwe echio olubeerera, nibemeeda ohusihirisaanga ebyaalo neende egiili?