Read saamia Habbakuuku 2 Bible Online

Habbakuuku 2 - saamia bible

Habbakuuku 2

¹Ese njia ohuniina hu munaara kwaange mani niinde ohubona esiindu si Omwaami achia ohumboolera ohulomaloma haandi neende esikobolomo syaachia ohutusa esidiira hu hwekanyiirisa.

²Omwaami yamberesa esikobolomo sino siti: “Ewe yandiika bulai hu bituundu by'amakina ebyo bi njia ohuhubwiihulira, binyale ohusomwa ehabi lala lyoong'ene.

³Byaandiike, olwohuba esiha sichia ohwiicha bwaangu, haandi esyo siinjia ohuhweekesa sichia ohwoolerera abweene. Haba sinyala ohuhiindaho ohwoola, nae ewe siliinde sa; ohwoola lu sichia ohubaao, haandi abula esyo esichia ohusihiisa ohwoolerera.

⁴Mani yino niyo emboosi eyo: ‘Abo ababi haba sibachia ohunyala ohuwonao, nae abo abaluungifu nibo abachia ohuwonao olwohuba beesika Nasaae.’ ”

⁵Emyaandu kibachirisa. Abaandu b'okuliira, b'esuunga haandi babeyabeya koti ohufwa hweene, haba sibekutaanga daawe. Esyo nisyo esikera nibayiingira ebyaalo nibaloondehania hulwaabwe abeene.

⁶Abaandu bayiingirwa bachia ohunyala ohuhyeena abo ababayiingiraanga mani babeekese okusinye kwaabwe hu beene abo. Bachia ohuboola bati, “Ewe obukulaanga ebyo ebitaali ebyao, mani chihwakaanire! Wahoole yeena bweene ohwekoonyeraanga emyaandu noyikaanga abahweeyola ohuhutuungirao?”

⁷Nae kata ewe notoola ohumanya otyo, ewe owayiingiraanga abaasyo, omweene ochia ohuba noomalire ohukwa mu makobi mani wesi oyiikwe ohukatuungiraho neende obuhala. Abasuku bachia ohwiicha mani bahutiise oteengerehe sa. Bosi bachia ohuhuseenakira sa!

⁸Ewe wanyalaanga hale ohusenakiraanga abaandu b'ebyaalo biingi muno, nae bulaanu, abo abadoong'ao, nibo abachia ohunyala ohuhuseenakira ohweema hu bwiita bu mweene wesi waholaanga, haandi ohweema hu butemo bwao eyiri abaandu baane b'ebyaalo biindi neende ebiko byabyo.

⁹Odibire! Ewe wakeraanga edaala lyao niliyiindiyala neende ebyo bi wayayaanga neende obutemo, haandi wateemaho ohuhola edaala lyao lyeene nalyo lyaaba neende omuleembe litaaliho kata esidinyu neende amasira daawe!

¹⁰Mani endekeha chao mbao chileetere esoni hu daala lyao; koti lu wasihirisaanga ebyaalo biingi muno otyo, hane nilwo lu weleeteraanga omusiho omweene.

¹¹Kata neende amakina k'ebida kosi kali ohuubba wuuwi nikahulira ewe, mani engeedi chosi chaloondamo ohulira hweene ohwo.

¹²Odibire! Woombaha esiko hu lwaalo lw'enduli mani waasyoombaha neende obwiiti.

¹³Ebyaalo bi wayiingiraanga byeemaliraangamo amaani nibihola emirimo kitaaliho obuhoonyi daawe, mani ebyo byoosi bi babechaanga niboombaha byeechiraanga sa omwoosi. Omwaami w'Obunyala bwoosi niye oholere sino mani.

¹⁴Nae esyaalo nasyo sichia ohudoong'a sa nisyeechulamo amakesi ak'oluyaali lw'Omwaami koti sa lu nyaanja cheechulamo amaachi.

¹⁵Ewe omalire ohudiba! Mu tima lyao waswasaanga haandi omala ochalaasa abamenyaane bao; wabahola badokaana koti abameerere.

¹⁶Ewe bulaanu muhwetuunga ochia ohwemooda esoni mu sifwo sy'oluyaali. Ewe mweene niiwe ochia ohung'wa mani odokaane. Omwaami achia ohuhuhola ewe omweene onyale ohweng'weera esikoombe syao esy'ohusaanda ewe omweene, mani oluyaali lwao lukaluuhanisibwe mu soni.

¹⁷Ewe wakwiisa esiparara sya Lebbanooni; bulaanu ewe mweene niiwe ochia ohukwiiswa. Wetaanga ebisolo byasyo; bulaanu ebisolo ebyo nibyo ebichia ohuhuteengya. Sino sichia ohunyala ohuba sa sityo ohweema hu bwiita bu ewe omweene woseresaanga, haandi ohweema hu butemo bwao omweene obwali eyiri abaandu bohu syaalo huno alala neende ebiko byasyo.

¹⁸Esiloongwaloongwe siri neende buhoonyi siina? Ngandi ni esiindu si muundu yabaacha omweene, mani sibulao esiindu syoosi si sinyala ohuhuboolera olutusaho obubacha bwoong'ene. Silai siina syeene si siindu esyo si nyala ohuholera owasibaacha hwaasyeesike atyo, nasaae atahanyala ohulomaloma daawe!

¹⁹Ewe wamala ohudiba! Mbwe ewe ochaaka otye ohulomalomeraanga esichihi sa mbwe oti, “Ewe siingira!” Oba hu situundu sy'ekina sa mbwe oti, “Ewe siingira!” Mani esiloongwaloongwe si nyala ohuhubwiihulira esiindu syoosi, kose? Si nyala ohuba nisyawomwaho efeesa, oba esaabbu, nae sibulamo obulamu bwoosi daawe.

²⁰Omwaami mbao ali mu Nyuumba ya Nasaae yae; lehe buli muundu yeesi oli hu syaalo huno awuleereenge sa chi, naali mu moni wae.