Read saamia Habbakuuku 3 Bible Online

Habbakuuku 3 - saamia bible

Habbakuuku 3

¹Huno nihwo ohwekongooya hwa Habbakuuku omunabbi:

²Ewe Omwaami, ese ndawulira ebyo bi wahola, mani ndeechula amawuumo. Haandi bulaanu holaho otyo mu biha byeefwe bino ebiholwa bihunuufu bi waholaanga hale. Ba ow'esisa, kata neende awahaba nooli omunyoolefu.

³Nasaae ali ohwiicha haandi naatula mu Edomu; Nasaae mwoolerefu ali ohwiicha naatulira ena bigulu bya Parani. Esibooyi syae syeechula muukulu, nae esyaalo syeechula efuma yae.

⁴Yeecha neende obulafu bw'olumesu; ohumyeesuha hw'obulafu nibutula mu muhono kwae, eyo yi bunyala bwae bweekisa.

⁵Yemiisemo oluumbe haandi alagira ohufwa ohumuloondaho emukoongo.

⁶Niyeema, esyaalo siteengereha; naaliimbula emoni chae, ebyaalo byoosi biteengereha sa. Engulu chayiindira endalo choosi chaadihanamo; ebigulu by'olubeerera byosi bisihama mu loba, ebigulu bi yakeendaangaho hale mu biha bihalee-hale.

⁷Ese ndeeboneraho omweene abaandu ba Kusani nibatiire mani abaandu ba Midia nibateengereha sa.

⁸Mani kyali emyaalo nikyo ekyahunyoolesa Omwaami, kose? Kose yali enyaanja eyakera waabira etima? Ewe wabeengeraanga sa hu maleesi; esireesi sy'esiifuusye nisyo esyali esigaari syao sihukiinga, noleetera abaandu bao obuyiingiri.

⁹Ewe weetekeha bulai ohwehoonyera obuyiingo bwao, nooli omweetekefu ohulasa obusaale bwao. Olumesu lwao lwaabulaniangamo esyaalo.

¹⁰Engulu nachio ni chahuubbyaho emoni, chosi chateengereha sa; amaachi kabbwomooha nikatula hu kulu. Amaachi kali aasi mu loba kawoola, mani amafwiinda kayo kaaniina aakulu.

¹¹Ohumyeesuha hw'obusaale bwao bweyuulao haandi neende olumesu lw'ohwaaduha hw'amafumo kao, elyuuba neende omwoosi byoombi byeema alala byedungeeresa.

¹²Ewe wahuumba noohalakania esyaalo nonyooleere; mu bululu bwao, ewe wasenakiraanga sa ebyaalo.

¹³Ewe watula waachia waawonia abaandu bao, ohuwonia omutuki wao mudoole. Ewe wahubba aasi omweemeresi w'abaandu babi mani wasihirisira elalira abaloondi bae.

¹⁴Obuyiingo bwao bwafumita omuhoongo w'eye lyae nilyeecha koti esiifuusye ohutusalaania, n'obikiicha koti abo abafwiinyirira bweekisi abaandu banaambula-buchiiro.

¹⁵Ewe waseenakira enyaanja neende efaraasi chao, mani amaachi masaabi kaabira efiro.

¹⁶Ese mbuliraanga bino byoosi mani ndeengereha sa; eminwa kyaange kyateengereha neende obuti. Omubiri kwaange kwoosi kufwa sa enakaasi, mani amakulu kaange keegumula aasi waange. Ese naange njia ohuliindirira sa masididye ebiha ebyo ohwoola bi Nasaae achia ohusaandisiramo abo abahatuseete.

¹⁷Kata neende byahaba mbwe emituli kibulaho ebyaamo haandi emisabbiibbu nikataama hu misaala misabbiibbu, kata neende ebyaamo by'emiseituuni nibihaya mani emikuunda kyaahaya ohwaamaho emere, kata neende amakoondi koosi nikafwa haandi neende ebidwooli by'eng'we nibidoong'a ebihaya,

¹⁸Ese njia ohudoong'a sa ni ndi omusangaafu haandi ni mweenya, olwohuba Omwaami Nasaae niye Omuwonia waange.

¹⁹Omwaami Muhunuufu niye owumbechaanga amaani. Yanyomiisa obuseenero bwaange koti obw'esijusu mani yaniinda ni ndi n'omuleembe ni ndi hu ngulu.