Read saamia Sekaria 13 Bible Online

Sekaria 13 - saamia bible

Sekaria 13

¹Omwaami w'Obunyala aboola ati, “Esiha esyo nisyahoole, esulo yahatuumbulwe ohudiinyaanga abeechuhulu ba Daudi, haandu ba Yerusalemu ohubakabulaanga ohutula hu byonoono byaabwe haandi neende obudaamba.

²Esiha syeene esyo, ese njia ohutusao ameeta k'ebiloongaloongwe byoosi mu syaalo muno, mani abuleo oyo yeesi ochia ohunyala ohukechulisaangaho daawe. Ese njia ohumalao oyo yeesi ochia ohwelangaanga mbwe ali omunabbi, haandi maleo neende obwekoombi bw'ohwiinamiraanga ebiloongaloongwe bwoosi.

³Mani niyibaayo oyo yeesi ochia ohuwaanda hu huholaanga obunabbi, laatang'ene mweene neende ng'ina mweene nibo abachia ohumutuumbuliraanga bati ahoyere ohwiitwa sa, ohweema hu hubolaanga mbwe ali ohulomalomaanga emboosi y'Omwaami, nihane alomalomeenge sa obubacha bwae obweene. Nikali mbwe achia ohuholaanga sa obunabbi, laatang'ene mweene neende ng'ina mweene nibo abachia ohumweefumitiraanga afwe.

⁴Esiha syeene esyo nisyahoole, abulao omunabbi yeesi ochia ohwesungiraanga muhuboneherwa hwae hwoosi, kata sa ohweeholaho koti omunabbi, haandi kata neende ohwefwalaanga amaganjuula k'obunabbi mbwe hu anyaleenge ohubachaanga abaandu.

⁵Mubweyaango obwo, achia ohubolaanga ati, ‘Ese haba si ndi omunabbi daawe. Ese ndi sa omulimi mani ndahalimanaanga sa eloba lyaange endaalo choosi ech'obulamu bwaange.’

⁶Mani niyibaayo oyo yeesi onyala ohumuteeba ati, ‘Nae amakoonjo kahuli hu sirifu hwao ohwo nako ka siina syeene’ nae aba achia ohumukobolaangamo ati, ‘Ese ndakanyoolera mu nyuumba y'omwiicha waange.’ ”

⁷Omwaami w'Obunyala bwoosi aboola ati, “Ewe simuha, ewe olugaanga mani oseete omwaayi oyo owunjairaanga! Mwiite, mani amakoondi kasalaane. Ese njia ohuseeta abaandu baange

⁸mani mu syaalo muno mwoosi, ebituundu bibiri hu bidatu by'abaandu bachia ohufwa.

⁹Mani naange male heme esituundu silala hu bidatu esinaba nisidoong'ereo, mani mba chweenule koti lu feesa yichwenulwaanga neende omuliro. Ese njia ohubateeema koti sa esaabbu yitemwaanga. Mani hu banyale ohunaamaanga, mani naange nyaleenge ohubakobolaangamo koti lu badaha. Njia ohubaboolera endi, abo baandu baange nibo, mani nabo beeyame bati ese ndi Nasaae waabwe.”