Read saamia Sekaria 14 Bible Online

Sekaria 14 - saamia bible

Sekaria 14

¹Ludaalo lu Omwaami yaheehalireho ohuheenga emisaango luli aambi. Olwo nilwo lu Yerusalemu sichia ohuyaaywa, mani ebiyaayirwe bikabanwe n'oteereho emoni chao.

²Omwaami achia ohuleeta ebyaalo byoosi alala bilwaanie Yerusalemu. Esiko sihunuufu sino sichia ohubukulwa, enyuumba chiyaaywe, haandi abahasi bakwiibweho. Esituundu sy'abaandu bachia ohuchia mu bwiiruhiro, nae abadoong'ereo haba sibachia hutuswa mu siko omwo daawe.

³Ao niwo yi Omwaami achia ohutulira erwaanyi mani achaake ohulwaania ebyaalo biindi ebyo koti lu yali ni yabilwaaniaho hale.

⁴Esiha syeene esyo, achia ohusiingira mani yeeme hu Lugulu lw'Emiseituuni, oluli ebukwe wa Yerusalemu. Oluguli lw'Emiseituuni olwo luchia ohwaadihanamo habiri ohuchaakira ebukwe ohwoolera elalira emuumbo mani luhole ehooho ebaambali muno. Esituundu sy'olugulu olwo sichia ohusudisibwa emukulu, nae esituundu siindi sisudisibwe emwaalo.

⁵Mani eng'we muchia ohweyibira mu hooho lyeene lino elikabuhaniamo olugulu luno mu mahabi kabiri. Mwesi muchia ohweyiruhira koti sa lu bakuuka yeeng'we bahola lu ohuteengereha hw'esyaalo hwahabeeo mu ndaalo cha Omutuki Wusia owa Yuda. Omwaami Nasaae waange achia ohwiicha, niyeecha neende bamalaika boosi nibali alala nae.

⁶Esiha esyo nisyahoole, siyicha hubechaangao etoocho kata sa omunyiti,

⁷kata sa esiirima. Eyo yicha ohubechaangayo sa omubasu kwoong'ene, kata neende mu siro. Esiha si sino syahabeere sityo haba sisimanyihaaneho eyiri omuundu yeesi ohutusaho Omwaami yeeng'ene.

⁸Oludaalo olwo nilwahoole, amaachi malayi kachia ohuchaaka ohuhulukusaanga nikatula mu Yerusalemu, esituundu syakwo nisichiira eyiri Enyaanja y'Omuunyu, nae esituundu siindi nasyo nisichiira eyiri Enyaanja Hoongo ya Mediterania. Omwaalo okwo kuchia ohunyala ohuhulukusa ohumalaho esiha sy'omwaaka mulala omulaamba, mu biha by'esiminyu neende ebiha by'etoocho.

⁹Ao niwo yi Omwaami achia ohubeera omutuki wohu syaalo huno hwoosi; buli muundu achia ohumwiinamiraanga koti owiinamira Nasaae, mani bamumanye neende eliita nasilala elyo.

¹⁰Esituundu sy'esyaalo esyo syoosi, ohutulira elalira hu Gebba emukulu bweene ohwoolera elalira hu Rimoni emwaalo bweene, bicha ohuba esipaapi sy'akanilira. Yerusalemu nasyo sichia ohuhuuliha sibe aakulu w'esyaalo sisyebodohaanie; esiko esyo sichia ohunyala ohutulira hu Siruwa sya Bbenjamini ohwoolera elalira hu Siruwa syoohu Soonda, eyo yi siruwa sihale syalichiingi, haandi ohutulira elalira hu Munaara kwa Hananeeli ohwoolera elalira hu bihunyiro by'efiini by'obwaami.

¹¹Mani abaandu boosi bachia ohumenyaanga omwo mu muleembe, nibatatya ohusihirira.

¹²Omwaami achia ohuleeta oluumbe lutiisa hu byaalo byoosi ebichia ohulwaaniaanga Yerusalemu ebiita. Enyama chichia ohubuleeraanga sa hu mibiri kyaabwe nibasisiiri abalamu; emoni chaabwe neende enimi chaabwe chichia ohubolaanga sa.

¹³Esiha syeene esyo, Omwaami achia ohubahola batabuhe haandi baticheenge ohwoola lu buli muundu achia ohukwichaanga hu muundu oli aambi nae mani achaaka ohulwaanakana nae.

¹⁴Abaandu ba Yuda bachia ohulwaanilira Yersaalemu neende amaani. Bachia ohuyira obuyiinda bw'ebyaalo biindi byoosi koti ebipeeye; esaabbu, efeesa, neende eby'efwaalo mu buungi.

¹⁵Oluumbe lw'amatiichasi olwo luchia ohudiira kata neende efaraasi, esuhiri njere, engamia, kata esuhiri neende hu bisolo byoosi ebiri mu kaambi ch'abasuku.

¹⁶Mani bulaanu, hu abo boosi abachia ohuwonamo ohutula mu byaalo byali ni byaseetaho Yerusalemu banyale ohuchichaangayo lulala hu buli mwaaka ohwiinamiraanga Omwaami w'Obunyala bwoosi koti niye omutuki waabwe, haandi neende ohuhusaanga Esidyaalo by'Ebikaali.

¹⁷Mani nikali mbwe abaao esyaalo syoosi esichia ohuhaya ohuchichaanga haandi neende ohwiinamiraanga Omwaami w'Obunyala bwoosi koti omutuki, abulao efula yoosi eyichia ohudonyaangaho hu loba lyasyo daawe.

¹⁸Nae nikali mbwe Abamisiri bosi bahaya ohuhusaanga Esidyaalo sy'Ebikaali, mani baba bachia ohudirwaanga neende oluumbe luli lutyo lu Omwaami mweene achia ohubechaanga naatumire eyiri buli syaalo esiba sinahayaanga ohuchichaanga ebweene eyo.

¹⁹Sino nisyo esibonereso sichia ohukwa hu Misiri haandi neende hu byaalo biindi nikali mbwe bichia ohuhaya ohuhusaanga Esidyaalo sy'Ebikaali.

²⁰Esiha syeene esyo, endeke ch'efaraasi chichia ohusatwaangaho emboosi chino mbwe, “Yayaanwayo eyiri Omwaami.” Ebideeherwangaho ebyomu Nyuumba ya Nasaae bichia ohubechaanga ebilafu koti sa ebbakuli chalichiingi mu moni w'alutaari.

²¹Buli siindu sideeherwaangaho mu Yerusalemu kata neende mu Yuda bichia ohukabulwaanga endulo byehoonyerweenge mu hwiinamiraanga Omwaami w'Obunyala bwoosi. Abaandu bayanaanga ebiyaanwa baba bachia ohubyehoonyeraanga nibadeeha enyama y'ebiyaanwa ebyo. Esiha esyo nisyoola, eyo haba siyichia ohubechaangao omuchurusi yeesi mu Nyuumba ya Nasaae w'Obunyala bwoosi.