Read saamia Sekaria 6 Bible Online

Sekaria 6 - saamia bible

Sekaria 6

¹Haandi ndanyoola ohuboneherwa huundi. Ehabi lino ndabona ebigaari by'efaraasi bine nibitulira akatikaati w'engulu chibiri ech'esibya sy'omugasa.

²Esigaari sitaangira syali nisiri ohuhwehweeswa neende efaraasi chia ranjaayi, esya habiri syali ni sihwehweeswa neende efaraasi cha dichooli,

³esya hadatu syali ni sihwehweeswa neende efaraasi cha dibbo, nae esya hane syali ni sihwehweeswa neende efaraasi cha rabbwoori.

⁴Haandi ndateeba malaika oyo endi, “Ewe omuhuluundu, ebigaari by'efaraasi bino byeekesa siina syeene?”

⁵Nae yakobolamo ati, “Bino nibyo emiyaka kine; hu kyahakobola sa nikitula mu moni w'Omwaami w'esyaalo syoosi.”

⁶Mani esigaari esihwehweeswa neende efaraasi cha dichooli nisyo esyali nisichiira emukulu wa Bbabbilooni, efaraasi cha dibbo nachio chali nichichiira emuumbo, nae echa rabbwoori nachio chali nichichiira mu syaalo sy'emwaalo.

⁷Mani koti lu faraasi cha rabbwoori chali huchitula muu sa chiti, chali nichetekeehe ohuchia chilambuule esyaalo. Nae malaika yaboola ati, “Eng'we ngaandi muchie sa mulambuule esyaalo esyeene esyo;” mani chosi chaahola sa chityo.

⁸Bulaanu malaika oyo yandehuuma n'alira n'aboola ati, “Eng'we boneho, ngaandi efaraasi chiniiniire emukulu eyiri Bbabbilooni chira hane chimalire hale ohukwiisa etima ly'Omwaami.”

⁹Omwaami yaamberesa emboosi chino.

¹⁰Yamboolera ati, “Ewe bukula ebiyaanwa byoobbwa neende abeeruhira mu byaalo by'erwaanyi koti Helidai, Tobbiya neende Yedaya, ochie bwaangu mu daala lya Yosua omwaana wa Sefania. Mbao boosi bamalire ohukobola ohutula mu bwiiruhiro bu balimo mu Bbabbilooni.

¹¹Hola ekofia y'obutuki ohutula mu feesa neende esaabbu chi bayaana, mani omale ochie ofwaale hu mutwe kw'Omulaamisi Muhuluundu, Yosua oyo omwaana wa Yehosadaki.

¹²Chia omuboolere oti Omwaami w'Obunyala aboola ati, ‘Omusaacha olaangwa mbwe Esaga niye ochia ohutabaala mu bweyaango bwaalimo obwo, mani anyale ohwoombaha buyaaha Enyuumba ya Nasaae.

¹³Oyo niye ochia ohunyala ohuyoombaha mani anyoole oluyaali luhoyera omutuki, mani anyale ohutuka abaandu bae. Omulaamisi achia ohweemaanga aambi neende esisaala syae sy'obutuki, mani baholereenge alala mu muleembe neende ohuwuliirisania.’

¹⁴Ekofia yae y'Obwaami yicha ohuba esiichuliso siri mu Nyuumba ya Nasaae mu luyaali lwa Helidai, Tobbiya, Yedaya, neende Yosia omwaana wa Sefania.”

¹⁵Abaandu bamenya eyale muno, bachia ohwiichaanga nibahoonya ohwoombaha buyaaha Enyuumba ya Nasaae y'Omwaami. Mani ni yiliba niyimalire ohwoombahwa buyaaha, niwo yi ewe wahamanyire oti hane Omwaami w'Obunyala niye owaanduma yooli. Sino sichia ohwoolerera nikali mbwe ewe wooseresa ohufunihira ebilagiro by'Omwaami Nasaae wao.